Şêniyên Mexmûrê bertekên tûnd nîşanî biryara qedexeya hevdîtinê ya bi Rêber Apo re dan û bang li tevahî Kurd û dostên Kurdan kirin da ku li dijî tecrîdê bibin xwedî helwest.

Armanc Herekol


Li Îmraliyê her ku diçe tecrîd û êşkenceya li ser Rêber Apo giran dibe. Ev zêdeyî 3 salanin ango 1161 rojin agahî ji Rêber Apo nayê sitandin. Ne malbat û ne jî parêzer nikarin hevdîtinê bi Rêber Apo re pêkbînin. Her roja ku Rêber Apo di bin wê tecrîdê de be, ewqas jî gelê Kurd di bin wê êşkenceyê de ye. Di van rojên dawî de carekdin hat zanîn ku 6 heyvan qedexeya hevdîtinê dane Rêber Apo.

Şêniyên Wargeha Penaberan a Şehîd Rustem Cûdî (Mexmûr) jî li dijî tecrîd û qedexeya hevîtinê ya li ser Rêber Apo ji rojnama me re axivîn û bertekên tûnd nîşanî tecrîdê dan.

Gelê azadîxwaz tê tecrîdkirin

Şêniya bi navê Oznur Mamxûrî di destpêka axaftinên xwe de anî ziman ku ev zêdeyî 3 salanin, ne parêzer û ne jî malbat nekarîne hevdîtin bi Rêber Apo re bikin û got: “CPT ku weke Komîteya Pêşîlêgirtina Êşkenceyê ye, li hember vê tecrîd û êşkenceya li ser Rêber Apo bêdeng e. Raporên xwe yên rewşa gireva Îmraliyê eşkere nekirin. Ev nêzikatî bixwe êşkence û sucek e. Rêber Apo ne girtiyek ji rêzê ye, Rêber Apo temsîla milyonan gelê bindest e. Ji bo azadiya gelan, li ber xwe dide û têkoşîn dike. Ji ber wê yekî, tecrîdkirina Rêber Apo, tecrîdkirina gelê azadîxwaz e.”

‘Em qedexeya hevdîtinê qebûl nakin’

Herî dawî Oznur da zanîn ku Rêber Apo, Rêberê tevahî gelan e, taybet jî di roja me ya îro de gelê Ereb xwedîderketinek mezin nîşanî Rêber Apo dide û wiha pêde çû: “Ji bo azadiya Rêber Apo, li her derê çalakî û meş hene. Hemû qad bûne cihê têkoşîna ji bo azadiya fîzîkî ya Rêber Apo. Hemû dewletên di komployê de cih girtî, ji jiyana Rêber Apo berpirsyarin. Rêber Apo jiyana xwe ji bo gelê azadîxwaz feda kiriye. Her çend heyvan carekî cezayê disiplînê li Rêber Apo dibirin. Ev yek dijî mafê girtiyan e. Em vê biryarê qebûl nakin û şermezar dikin. Rêber Apo dixwaze ku em hemû netew bi hev re azad bijîn. Azadiya Rêber Apo, dawî anîna alozî û qeyranan e. Em wek gelê Mexmûrê jî heta azadiya fîzîkî ya Rêber Apo mîsoger nebe, em dest ji têkoşîna xwe bernadin. Bila hemû kes rabin ser lingan û têbikoşin.”

‘Tecrîd derbasî qonaxekî nû bûye’

Her wiha Şêniyê bi navê Hadî Akêdî jî hestên xwe anîn ser ziman û ev tişt gotin: “Rêber Apo ne kesek ji rêzê ye û dîlgirtina wî jî wisa ne ji rêzê bû. Komployek mezin hat pêkanîn. Rêber Apo bi hêz û vîna xwe rêxistin çêkir, gel bi rêxistin kir û gel kir xwedî zanist. Ji ber wê bû hedefa hêzên komploger. Ji ber ku tevahî cîhanê dît ku Rêber Apo dibe alternatîfa pergala heyî û ev yek bû tirsek mezin di dilê komplogeran de. Ev 25 salin, Rêber Apo di gireva Îmraliyê de tê girtin û her roja ku diçe jî tecrîd li ser didin meşandin. Bi wê ve girêdayî, ev zêdeyî 3 salanin jî ev tecrîd derbasî qonaxekî nû bûye û êdî bi ti şêwazê agahî ji Rêber Apo nayê standin.”

‘Divê em Rêber Apo bi fîzîkî azad bikin’

Hadî Akêdî herî dawî ev bang kir: “Rêber Apo roja yekem a dîlgirtina xwe de, sekna xwe da nîşandan û diyarkir ku wê têkoşîn berdewam be. Hertim nivîsî û parêzname çêkirin. Hertim bû çavakaniya serhildan û pêşketinan. Dagirkeran berê xwe dayê, Rêber Apo di girtîgehê de jî têkoşîna xwe berdewam dike, vê carê jî tecrîd derbasî qonaxekî hîn girantirkirin. Hevdîtin qedexekirine û em êdî nikarin agahî ji Rêber Apo bigirin. Ev yek nayê qebûlkirin. Bi navê cezayê disiplînê, hevdîtin tên qedexekirin. Divê gelê Kurd hîn zêdetir xwedî li Rêbertî derbikevin. Çalakiyên heyî tecrîdê naşkîne, lê divê em Rêber Apo bi fîzîkî azad bikin.”