Cejna Newrozê bi coş û moralek mezin li Wargeha Penaberan a Mexmûrê hat pîrozkirin. Di Newrozê de hate gotin: “Wê Newroz bibe, Newroza azadiya fîzîkî ya Rêber Apo.”
Duh bi şev Cejna Newrozê bi coş û moralekî mezin li Wargeha Penaberan a Şehîd Rustem Cûdî (Mexmûr) hat pîrozkirin. Pîrozbahî li Navenda Çand û Huner a Mexmûr pêk hat. Qada şahiyê bi al û posterên Rêber Apo, alên PKK, KJK, KCK, YJA-STAR û wêneyên şehîdên pêşeng hat xemilandin.
Piştî hatina bi hezaran welatî, xwendekar û mêvanên ji derve hatîn, şahî bi deqeyek rêzgirtina ji bo tevahî şehîdên Tevgera Azadiyê destpêkir. Piştî rêzgirtinê agirê Newrozê bi kelecanekî mezin ji aliyê malbatên şehîdan ve hate pêxistin û diruşmeyên ‘Newroz pîroz be’ , ‘Bijî Rêber Apo’ û ‘Bê Serok jiyan nabe’ hatin berzkirin.
Piştî wê nirxandinên Rêberê Gelê Kurd Abdullah Ocalan ên di derbarê Newrozê de hate gûhdarkirin.
Piştre li ser wate û girîngiya rojê Hevserokê Meclîsa Gel a Demokratîk ya Mexmûrê Ehmed Şehbaz axivî û di serî de cejna Newrozê li Rêber Apo, şehîdan, girtiyên siyasî, malbatên şehîdan û tevahî gelê Kurd pîroz kir got: “Mazlûm Dogan û hevalên wî, ev roj ji bo me ronî kirin. Van şehîdan çiruska Newrozê geş kirin û bûn sembola azadiyê. Îro cejna me ye. Divê em xwedî li Newrozê derbikevin û rojên ku Newroz dihatin qedexekirin ji bîr nekin. Newroza me wê bibe Newroza serkeftin û azadiya gelê Kurd. Wê Newroz bibe Newroza aştî û azadiya mirovatiyê. Wê bibe Newroza azadiya fîzîkî ya Rêber Apo. Dûbare em cejna vejînê li we tevan pîroz dikin.”
Piştî wê Hûnermend Feyzî Kiliç hat ser dîkê û bi sitranên xwe reng da şahiyê. Her wiha li pey wî koma govendê ya Peymangeha Şehîd Kerîm Kato bi cil û bergên xwe yên gelêrî ve govenda xwe pêşkêş kirin.
Her wiha ji partiyên siyasî ku wek mêvan ji Navçeya Mexmûrê beşdarî şahiya Newrozê bibûn, peyamên partiyên xwe dan.
Di peyama Yekitiya Niştîmanî Kurdistan (YNK) ya Navçeya Mexmûrê de hat gotin: “Em cejna vejînê li Rêber Apo, gerîla, pêşmerge û tevahî şehîdan pîroz dikin. Em li vir bang dikin, pêwîste tevahî partî û hizbên Kurdî yekitiya xwe çêbikin. Tenê yekbûn me serdixe. Divê em bibin yek û nehêlin dijmin dagirkeriyê bike. Em wek YNK dibêjin, tenê pêwistiya me Kurdan bi yekitiya Kurdan heye.”
Her wiha Hizbî Zehmetkêşanî Kurdistan ya Navçeya Mexmûrê jî di peyama xwe de got: “Silav ji Rêber Apo û Qendîlê re. Silav ji gerîla û pêşmergeyan re. Çareserî tenê yekgirtine. Dijminê me yeke û divê em li her derê Kurdistanê yekitiya xwe çêbikin. Dûbare em silavên xwe ji Qendîlê re dişînin.”
Hizba Şûî Kurdistan a navçeya Mexmûrê jî di peyama xwe ya ji bo Newrozê de got: “Em jî vê cejnê li we tevan pîroz dikin. Kurdistan di pêvajoyek girîng de derbas dibe. Dijmin bê navber êriş dike. Dijmin bê navber planên dagirkeriyê li ser Kurdistana me çêdikin. Dûbare cejna we pîroz be û giyanê şehîdan şad û aram be.”
Piştî peyaman Hozan Welat hat ser dîkê û bi stranên xwe gel mest kir û çoş da şahiyê.
Herî dawî jî Hûnermend Şemdîn hat ser dîkê û gel bi hatina Hûnermend Şemdîn kêfxweşî û kelecanek mezin girt. Hûnermend Şemdîn jî bi stranên xwe coş da şahiyê û gelê wargehê bi Hûnermend Şemdîn re stran dûbare kir.
Herî dawî ber bi derengiya şevê ve bernameya pîrozbahiyê bi gerandina govendê bi dawî bû.
0 Yorumlar