Li Mexmûrê ji bo Şehîd Azê Erdal konê sersaxiyê hat vedan

Li Wargeha Penaberan a Mexmûrê ji bo gerilaya YJA-Star Azê Erdal (Kurdistan Sîdar) konê sersaxiyê hat vedan. Endamên sazî û meclisên wargehê bi awayekî girseyî serdana konê sersaxiyê kirin û soza şopandina rêya şehîdan hate dayîn.

Li Wargeha Penaberan a Şehîd Rûstem Cûdî (Mexmûr) ji bo gerilaya YJA-Star Azê Erdal (Kurdistan Sîdar) ku di Tebaxa sala 2022’an de li Metînayê şehîd bûyî, konê sersaxiyê hat vedan.

Konê sersaxiyê ji aliyê xelk û endamên sazî û meclisên wargehê ve hat ziyaretkirin. Beriya ku axaftin were kirin deqeyek rêzgirtin ji bo tevahî şehîdên tevgera azadiya Kurdistanê hat girtin. Piştî rêzgitinê li ser navê xelkê wargehê Mamoste Bêrîvan Demir axivî.

Bêrîvan Demir di destpêka axaftina xwe de hemû şehîdên şoreşa Kurdistanê bibîr anî û wiha axivî: “Wek tê zanîn em di pêvajoyek gelek giran re derbazdibin, li tevahî cîhanê jî pêngavên ku tên avêtin, şerên herî giran ku weke şerê cîhanê yê sêyemîn tê binavkirin. Em jî hem wek gelê Kurd û hem jî wek gelê wargehê para xwe ji vî şerî dibînin. Ji ber ku her şoreşek, her xebat ku bê kirin pêwîstî bi berdêlên herî mezin heye ku weke serkeftinekê bê jiyankirin. Me wek wargeh jî gelek rêheval, zarok û ciwanên xwe ku wek leheng û qehreman tên zanîn berdêl dane û gihiştine şehadetê. Ji bo em jî nirxên şehîdên xwe bizanibin, li çand, hebûn, rûmet û axa xwe xwedî derbikevin û bikaribin vî dijminê ku para xwe ji mirovahiyê negirtî têkbibin divê em têbikoşin. Divê em viya bi dijmin bidin fêhmkirin ku heta zarokekî me di landikê de mabe wê Kurdistan azad bibe, wê nivîsîna vê dîrok tine nebe û were berdewam kirin.”

Li ser navê malbata Şehîd, Mamoste Yusif Gundikî jî axivî û destpêkê xêrhatina xelkê amade kir û wiha peyîvî: “Ev sê rojin tevahî xelkê wargehê, sazî û rêveberiyên wargehê xema me hemû parvekirin em sipasiya wan hemûyan dikin. Destpêkê em çalakî û berxwedanên bi armanca azadiya fîzîkî ya Rêbertî ya ku di vê pêvajoyê de wekî pêngav hatî destpêkirin, em silav dikin. Em wek malbat dikarin bêjin ew soza ku me destpêkê dayî şehîdan heta azadiya welatê me mîsoger dibe, emê bi soza şehîdên xwe ve girêdayî bin û emê heta dawiyê vê tekoşînê berdewam bikin. Em dibêjin despêkê bila serê Serok Apo, rêhevalên wê yên ku îro li serê çiyan di bin hemû şert û mercan de li beramberî dijminê hov li ber xwe didin saxbe, her wiha bila serê gelê Kurd ê welatparêz û xelkê wargeha Mexmûrê saxbe.”