JI NIHA VE AMADEKARIYÊN 8’Ê ADARÊ TÊN KIRIN

Li Wargeha Mexmûrê dewreyek ya perwerdeya Erebane ji aliyê Tevgera Jinên Ciwanan a Mexmûrê (TJCM) ve hatiye destpêkirin. Bi vê perwerdeyê amadekariyên 8’ê Adarê tên kirin.

Xurbet Tallî

Wek tê zanîn li xaka kevnar ya Mezopotamyayê, Erebane weke dengê pîroz yê bi hezaran salan ê jinê tê pênasekirin. Ji Sumeran heta vê serdemê amûrekî pênc hezar salî ya xaka Mezopotamyayê ye. Yek ji wan amûrane ku gelek çand û bawerî xwe bi wê îfade dikin. Erebane bi zimanê Erebî û Farisî dibêjin ‘Def’, bi zimanê Kurdî jî dibêjin ‘Erebane’. Amûra Erbane bi sedan salin di her qada jiyanê de cihê xwe heye. Li şîn û şahiyan her wiha di mewlûdan de weke dengekî rûhanî hatiye pênasekirin.

Di derbarê vê amûrê de dewreyek ya perwerdeyê li Wargeha Penaberan a Şehîd Rustem Cûdî (Mexmûr) ji aliyê Tevgera Jinên Ciwanan a Mexmûrê (TJCM) ve di 1’ê Çileyê de hatiye destpêkirin. Ev perwerde ne tenê ji bo fêrkirinê ye, di heman demê de ji bo amadekariyên 8’ê Adarê ye jî. Têkildarî vê mijarê Şîlan Bayar ku ew jî di perwerdeyê de cih digire ji Rojnameya me re axivî.

‘Min lêdana Erebane pir mereq dikir’

Şîlan Bayar di destpêka axaftina xwe de behsa mereqa xwe ya ji bo lêdana Erebanê kir û wiha got: “Beriya ku ez beşdarî vê perweredeyê bibim jî, min lêdana Erebane pir mereq dikir. Lê dema min di torên civakî de jî lêdana amûra Erbane didît pir kêfa min jêre dihat. Piştî ku min dît li vêderê dewreyek ya Erebane hatiye vekirin, ez jî tevlî vê dewreyê bûm. Mereqa min ya ji bo Erebane yek ji ber ku amûrek di nava gelê Kurd de dîrokekî xwe yê kevnar heye û ya din jî herî zêde ji aliyê jinan ve tê lêdan. Ji bo wê jî dema min bihîst li vêderê dewreyek ya Erebane hatiye vekirin, ez jî tevlî wê perwerdeyê bûm.”

‘Niha em li ser stiranan dixebitin’

Bayar wiha dirêjî da axaftina xwe: “Em ne tenê ji bo xwe fêrkirinê perwerdeya Erebane dibînin, em bi vê perwerdeyê amadekariyên 8’ê Aadarê jî dikin. Dewreya me ji 13 kesan pêktê, her wiha rojên ku em perwerde dibînin ji yekşemê heta pêncşemê ye. Bi wê ve girêdayî demjimêrên perwerdeya me jî ji 15:00 heta 16:00’an e. Me notayên xwe dîtine û niha jî em li ser stiranên ku em li ser dikê li Erebanê bidin, dixebitin. Perwerdeya me heta niha baş derbaz dibe û hîn jî didome.”

‘Dikarî bi wê amûrê hestê xwe bînî ziman’

Şîlan Bayar herî dawî ev bang kir: “Banga min ji bo tevahî gelê Kurd ewe ku di her cûrê amûrê mûzîkê de xwe fêr bikin û pêşbixin. Xwe fêrkirina amûrên mûzîkê tiştekî gelek başe, hem tû xwe pêşdixî, hem derdorê xwe fêrdikî û hem jî dikarî bi wê amûrê hestê xwe bînî ziman.”