Xelkê Mexmûrê: Dewleta Iraqê ti pêwîstiyên me pêk nayne

Xelkê Wargeha Penaberan a Mexmûrê bang li dewleta Iraqê kirin ku li hemberî wargehê erk û berpirsyatiyên xwe pêkbînin û wiha got: “Gelek karkerên me di rêyan de ji ber pirsgirêkên nasnameyan hatin girtin û zivirandin. Pêwîste Iraq û NY li ser vê mijarê rawest û di demek nêz de çareser bikin.”

Jiyan Pîran

Her sê sal carekê nasnameyên xelkê Wargeha Penaberan a Mexmûrê ji aliyên Neteweweyên Yekbûyî NY ve tê çêkirin.  Gelê wargehê bi vê nasnameyê dikarin li bajarên Iraqê hatin û çûyînê pêkbîne. Lê di demên dawî de çêkirina nasnameyên wargehê ji aliyên Iraq û NY bûyî ve tê piştguh kirin, têkildarî piştguh kirina nasnameyan şêniyên Wargeha Penaberan a Mexmûrê ji rojnameya me re axivîn.  

‘Bila cîhan çavê xwe li me veke’

Jina bi navê Rihan Hevlerî di destpêka axaftina xwe de balkişad li ser bê mafiyên ji aliyê Hikumeta Iraqê ve li ser gelê Wargehê tê pêkanîn û wiha got: “Piştî rûxandina rejîma Seddam Hisên, wargeha me ket di bin sêwana Hikumeta Iraq û herêma Kurdistanê de û niha jî em di bin sêwana Hikumeta Iraqê û NY de ne. Wek hemû penaberê cîhanê pêwîstiyên me jî hene, çawa îro pêwîstiyên penaberên di nava axa Iraqê de tê pêşwazî kirin divê pêwîstiyên me jî werin pêşwazî kirin. Divê Hikumeta Iraqê pêwîstiyên me yên jiyanî pêşwazî bikin. Pêwîstiya me ya sereke jî nûkirina nasnameyên me yên penabertiyê ye.  Ji ber ku di hatin û çûyînê de ji bo nexweş û karkerên me pirsgirêkan derdixin. Gelek karkerê me di rêyan de ji bo pirsgiêkên nasnameyan hatin girtin û zivirandin. Pêwîste Iraq û NY li ser vê mijarê raweste û di demek nêz de çareser bikin. Em di bin banê hikumeta Iraqê de ne, divê Iraq li me bibe xwedî. Dewleta Iraqê dibêje, emê nasnamyên we nûbikin  niha jî li gotinên xwe nabin xwedî. Em di bin zilm û zoriyê de ne, bila cîhan çavê xwe li me veke.”

‘Pirsgirêkên hatin û çûyînê çêdibe’

Her wiha Hemid Otun jî di destpêka gotinên xwe de diyar kir ku dewleta Iraqê gelek soz ji wan re dane lê heta niha ti sozên xwe bi cih ne anîne û wiha got: “Dewleta Iraqê dibêje em ji wargeha Penaberan a Mexmûrê berpirsyarin, lê ti pêwîstiyên me pêk naînin. Gelek hevdîtin li ser rewşa wargehê bi dewleta Iraqê re hatine pêkanîn, di hemû hevdîtinan de jî gotine; ‘Emê li hemberî we erkên xwe pêkbînin’ lê mixabin ev erkê wan tenê di gotinê wan de man. Em di bin berpirsiyatiya Hikumeta Navendî ya Iraqê de ne. Dîroka nasnameyên me ya penabertiyê qediyaye, di rêyan de ji bo karker û nexweşên me pirsgirêkên hatin û çûyînê çêdibe. Lê hikumeta Iraqê bi me re nebûye alîkar, erk û berpirsyatiyên beramberî me pêknaîne. Em xelkê Wargeha Penaberan a Şehîd Rustem Cûdî (Mexmûr) penaberên siyasîne û di bin siwana Hikumeta Iraqê de ne. Pêwîste di hemû şert û mercên jiyanê de li vî gelî bibe xwedî. Gotin û nêrînên Hikumeta Iraqê yên di hevdîtinan de li ser mêze dimîne. Ne tenê Hikumeta Iraqê, ti saziyên mafê mirovan jî li vê wargehê xwedî dernakeve. Em bang li Hikumeta Iraqê dikin ku li gotin û nêrînên xwe bibe xwedî û erk û berpirsyatiyên li hemberî vî gelî bi cih bîne.”