‘WÊ VÎNA GEL TECRÎDÊ BIŞKÎNE!’

Şêniyên Wargeha Penaberan a Mexmûrê tecrîda girankirî ya li ser Rêberê Gelê Kurd Abdullah Ocalan bi tûndî şermezar kirin û bang kirin da ku bi lezgînî parêzer bi Rêber Apo re hevdîtin pêkbînin.

Armanc Herekol

Şêniyên Wargeha Penaberan a Şehîd Rustem Cûdî (Mexmûr) têkildarî tecrîda girankirî ya li ser Rêberê Gelê Kurd Abdullah Ocalan, ji rojnama me re axivîn û bang kirin da ku gelê Kurd li dijî tecrîdê dakevin kolanan û bi lezgînî parêzer hevdîtinê bi Rêber Apo re pêkbîne.

‘Rêber Apo rêberê mirovahiyê ye’

Şêniyê bi navê Abdullah Mijînî di destpêka axaftinên xwe de tecrîd weke sûcê dijî mirovahiyê bi nav kir û got. “Rêber Apo, Rêberê mirovahî, aştî, wekhevî, demokrasî û tevahî zindîweran e. Ji bo vê tevahî dagirker û xwînmijên mirovahiyê, li dijî Rêber Apo di nava planên qirêj de ne. Dixwazin fikrên azad ên Rêberê mirovahiyê ji holê rabikin. Ji ber ku ev fikir û felsefeya Rêber Apo ji bo mirovahiyê kilîla jiyana azad e. Bi Rêber Apo re hevdîtin çênabe û tecrîdek girankirî li ser serokê me heye. Ev tecrîd dijî mirovahiyê ye.”

‘Divê bi lezgînî hevdîtin bê kirin’

Abdullah Mijînî di axaftinên xwe de anî ziman ku girankirina tecrîdê pêşî lê girtina aştiyê ye û wiha pêde çû: “Di girtîgeha Îmraliyê de sûcê dijî mirovahiyê tê pêkanîn. Rojname, hevdîtin û tevahî mafên girtiyan ên rewa ji Rêber Apo re qedexekirine û her roj tecrîda heyî jî girandikin. Ev tecrîd gelê Kurd aciz dike û ev 21 heyvin gelê Kurd di bin tecrîdekî girankirî de ne. Em wek gelê Kurd vê yekê qebûl nakin û divê bi lezgînî hevdîtin bê kirin. Ji bo wê jî ez bang dikim, tevahî gelê ku azadiya xwe dixwaze, bila dakevin kolanan.”

‘Ji fikrên Rêber Apo ditirsin’

Her wiha jina bi navê Hazar Ûçar jî li ser heman mijarê nêrînên xwe parvekirin û diyar kir ku gelê Kurd û Tevgera Azadiya Kurdistanê serdemek dîrokî jiyan dikin û wiha axivî: “Ev dijminên ku hebûn, destkeftin û serkeftina xwe bi qirkirina Kurdan ve girêdane, bi hemû rêbazên qirêj êrişî Tevgera Azadiya Kurd dikin. Tişta ku dijmin jê ditirse û dixwaze ji holê rake, fikir û ramanên Rêber Apo ye. Ya ku gelê Kurd ji tûnebûnê rizgarkiriye û aniye vê astê Rêber Apo ye. Roja me ya îro berxwedana Kurdan ji hemû gelên bindest re bûye mînak û çavkanî. Dewleta Tirk a ku nikare bi operasyonên leşkerî, êrişên bi çekên kîmyewî û qedexekirî encam bigire, berê xwe daye Îmraliyê û tecrîdê giran dike. Bi vê yekê hewl dide têkiliya Rêber Apo ya bi siyaset û civakê re qut bike.”

‘Jin hêza sereke ya xwedî li Rêber Apo derketinê ye’

Hazar Ûçar di nava axaftinên xwe de tecrîd weke rêbazek şerê taybet pênasekir û wiha axaftinên xwe domand: “Tevî hemû zext, êriş û astengiyan jî di her meş û mitîngan de azadiya fizîkî ya Rêber Apo tê xwestin û wijdana cîhanê tê hejandin. Tecrîda li Îmraliyê êdî bûye pirsgirêka hemû cîhanê û ji bo me Kurdan jî şikandina wê bûye sedema rûmet û serkeftinê. Nêzî du salane ji Rêber Apo agahî nayê girtin. Ev jî, hêrsa gelê Kurd mezintir dike. CPT beriya du heyvan neçar ma û bi daxuyaniyek ne rast, xwest hêrsa gelê Kurd bide rawestandin. Jin hêza sereke ya xwedî li Rêber Apo derkertinê ye. Bi saya Rêber Apo, îro jin dikare têkoşînê bike û xwedî li Rêber Apo derbikevin. Jin divê tecrîda li ser Rêber Apo bişkîne û têkoşînê xurt bike.”