Lorîn Arzû ya biçûk a ji Wargeha Mexmûrê, piştî 5 salan nû zanî ku bavê wê Osman Arzû di 2017’an de ji aliyê balafirên dewleta Tirk ve hatiye şehîd xistin. Lorîn piştî 5 salan çû ser gora bavê xwe û hesreta wê ya 5 salan kêmek jî be sivik bû.
Têkoşer, fermandar, şoreşger û gerîlayê 30 salan Seîd Tanit bi nasnav Bedran Cûdî ku di nav civak û refên gerîlayan de wek Bedran Gûndikremo tê nasîn, li gel kurê xwe Mehmet Tanit, Mûrat Atak (Zekî) ku xezûrê Mehmet Tanite, xizmê wî Evdilkerim Îzer û hevalê wan Osman Arzû, ji bo debara jiyana xwe li Amediyê kar dikirin, di 22’yê Nîsana 2017’an de, di encama êrişên balafirên şer yên artêşa Tirk a dagirker de şehîd bûn.
Li ser Şahadeta wan her 5 lehengan re 5 sal derbasbûn. Osman Arzû ku bavê 3 keçan e, dema ku şehîd dibe keça wê Lorîn hîn di zikê dayîka xwe de bû. Piştî ku Lorîn ji dayîk dibe, bi ti awayî malbat û derdor nabêjin Lorîn bavê te şehîd bûye. Lê piştî ku Lorîn dibe 3 salî êdî dikeve nav lêgerîna bavê xwe û ji malbatê pirsa bavê xwe dike. Lê malbat 5 salan bi hinceta ku bavê wê ji derve kar dike, jêre nabêjin. Lê hertim di xeyalê Lorîn de bavê wê ji derve li ser kare û wê rojekê bihata û Lorîn gerandiba. Lê mixabin ev xeyal ji ber hovîtiya dewleta Tirk ti caran pêknehat. Lê Lorîna biçûk piştî 5 salan zanî ku ew êdî keça Şehîd Osman e. Ev nav tenê ji Lorîna biçûk re êdî meznahiyek da avakirin.
‘Ji bo wesiyeta Şehîd Osman me navê keça xwe kir Lorîn’
Hevjîna Şehîd Osman, Rehmê Arzû ji ajansa me re qala wan salên zehmet û dirêj dike û dibêje: “Hevjînê min di sala 2017’an de dema ku kar dikir, ji aliyê dewleta Tirk a faşîst ve bi hovane hat qetilkirin. Dema ku Osman şehîd bûyî, hîn Lorîn jidayîk nebibû. Lorîn piştî şahadeta bavê xwe 2 heyvan nû ji dayîk bû. Beriya ku Lorîn ji dayîk bibe, Şehîd Osman ji me re gotibû navê Lorîn xweşe û me jî ji bo wesiyeta wî navê keça xwe kir Lorîn.”
‘Di nava xeyalan de rastiyek jiyan kir’
Rehmê da diyarkirin ku êşa malbatên şehîdan girane û wiha axivî: “Şehadet giranin, lê dema ku di rêya heqîqetê de şehîd dibin, êdî ew dibe serbilindî. Em wek malbatên şehîdan bi şehîdên xwe serbilindin. Her du keçên min ên din zanîn ku bavê wan şehîde, lê Lorîn piştî 5 salan nû me jêre got. Dema ku Lorîn pirsa bavê xwe dikir, me digot bavê te li kare. Hertim di xeyalên Lorîn de bavê wê li kar bû. Lorîn bi van xeyalan mezin bû. Min jî heta 5 saliya wê, nexwest wê xeyalê bişkînim. Lê piştî ku çû rex hevalên xwe û hat, rojekê ji min re got bavê min ne li kare, li goristanê ye! Hingê min ne karî ez tiştekî bêjim û min hêcetek din avakir û min got, ew cêwika bavê te ye li goristanê. Bi vê hêcetê jî min demekê jê veşart. Bi hêceta nexweşxaneyê em diçûn li ser goristanê. Herî dawî van rojan hat malê û got, tû ne rast dibêjî, bavêmin şehîd bûye. Me jî êdî jêre got bavê te ji aliyê dewleta Tirk ve hatiye şehîdxistin û tu keça şehîdanî. Piştî wê me bir ser goristanê bavê wê û bi kelecanekî mezin gora bavê xwe maçkir û hembêz kir.”
Rehmê Arzû bilêv kir, ew kêliyên ku Lorîn çûyî ser gora bavê xwe gelek hestiyar bûn û ji bo wê 5 sal têr, tejî, zorî û zehmetî derbas bûne.
Li ser bingehê welatparêziyê keçên xwe mezin dike
Her wiha Rehmê Arzû di dawiya axaftinên xwe de anî ziman ku dijmin dixwaze tevahî Kurdan qir bike û wiha axaftinên xwe domand: “Dijmin li her derê êrişî Kurdan dike û dixwaze zarokên Kurdan sêwî bihêle û wan zarokan jî li gor xwe bixapîne. Lê zarokên şehîdan li hember dewleta Tirk tejî kîn û hêrs bûne. Bila ti caran dijmin nebêje emê dayîk û bavên wan bikûjin û zarokên wan wek xwe lêbikin. Ev xeyala wan bi destê zarokên şehîdan her roj têk diçe. Zarokên min li ser rêya bavê xwe diçin û ez wan li ser bingehê welatparêziyê mezin dikim.”
.JPG)
0 Yorumlar