Şehîd Bêrîtan sembola artêşbûna jina azad e

Mamosteya Wargeha Penaberan a Mexmûrê, Ayten Sûre têkildarî Festîvala Çand û Hunerê ya ku bi navê Şehîd Bêrîtan her du salan carekê tê lidarxistin axivî û diyar kir ku şehîd Bêrîtan bi çalakiya xwe ya fedayî bûye sembola artêşbûna jina Kurd.

Xurbet Tallî

Bêrîtan Hêvî bi nasnav Gulnaz Karataş ku li himberî dagirkerî û nokeriyê xeta azadiyê xêzkirbû, ji bo jinên Kurd û tevahî jinên azadîxwaz bû sembola azadiyê. Xeta azadiya jinê ya ku Şehîd Bêrîtan vekiribû îro li tevahî cîhanê belav bûye. Xiyaneta PDK’ê û êrişên dewleta dagirker ya Tirk di sala 1992’an de gihiştibû lûtkeyê. Di wan deman de Şehîd Bêrîtan û hevalên xwe destanên dîrokî dinivîsandin.

Şehîd Bêrîtan di salvegera Şihadeta xwe de li Wargeha Penaberan a Mexmûrê her du salan carekê bi Festîvalekê tê bîranîn. Têkildarî Şehîd Bêrîtan Hêvî, Mamoste Ayten Sûre ji rojnama me re axivî. 

‘Di her kêlî û demê de xiyanet heye’

Mamoste Ayten Sûre di destpêka axaftina xwe de Şehîd Bêrîtan û tevahî şehîdên Kurdistanê bibîr anî û wiha got: “Şehîd Bêrîtan a ku bûyîn nîşaneya 30’emîn ya artêşbûna jina Kurd, bi taybet ji bo me jinan xetek daye avakirin. Dema mirov behsa wê dema ku ew têde jiyan dikir, berxwedaniya ku wê di wêdemê de kirî dihizire, mirov matmayî dimîne. Şehîd Bêrîtan xwedî vîn, bawerî û pêşketinek ewqas bi hêz bû ku karibû ew komploya pêşmergehên PDK’ê ya ku dixwestin li himberî wê pêkbînin, bi zanebûn û taktîkên xwe vala derbixe. Şehîd Bêrîtan heta kêliya ku biryara xwe fedakirinê jî dide, ji aliyê pêşmergeyên PDK’ê ve bi gotinên, em birane, em tiştekî bi te nakin û hwd digotin, lê Şehîd Bêrîtan ketibû ferqa vê xeta xiyaneta navxweyî, ji bo wê ne hat van lîstokên PDK’ê. Ya herî bi êş ewe ku Kurdek ji aliyê Kurdekê ve bê qetilkirine. Şehîd Bêrîtan ev xeta xiyanetê ya heyî ji bo bi dîlgirtina wê re pêşnekeve canê xwe feda kir. Eger wê demê Şehîd Bêrîtan teslîmbûn qebûl bikiribûya, belkî niha jiyan bikiribûya, lê wê rewşa wê ji jinekî kilasîk û ji rêzê ya ku xiyanet pejirandî ne cûdabûya. Lê Şehîd Bêrîtan bi perwerdeya ku di akademiyên Rêbertî de dîtî, îradeya ku ji partiya PKK’ê standî, zanabûnek wisa pêre pêşketibû ku wê demê di kesayeta xwe de dabû nîşandan ku xeta xiyaneta navxweyî heye. Divê her kes wekî Şehîd Bêrîtan xwe di her alî de pêşbixe û serwext bibe, ji ber ku di her kêlî û demê de xiyanet heye. Dewleta Tirk ti caran ji bo gelê Kurd nebûye dost, hertim dijmintiya gelê Kurd kiriye û hîn jî dike. Ji bo dewleta Tirk ferqa ti Kurdekî nîne, ev jin be, zarok be, ciwan be, pîr û kalek be yan jî fikra Kurdbûnê li cihekê bê parastin, ew cih, ew kes di hedefa wî de ye. Ji bo berjewendiyên xwe serî li her rê û rêbazên qirêj û xapînok dide û niha jî ji bo bigihije armanc û xeyalên xwe bi PDK’ê re di nava hevkariyekê de ye.”

‘Armanca me ewe ku bi gelên cihanê re bê ferq û cûdahî jiyan kirine’

Ayten di berdewama axaftinên xwe de wiha qala hovîtiya dewleta Tirk kir: “Li hemberî êrişên dewleta Tirk berxwedaniyek bê hempa ya ku bi ruhê Şehîd Bêrîtan û şehîdên wekî wê tê kirin destanan dinivîsînin. Em dibînin li çiya gelek êrîşên hovane ku ti exlaqê şer nasnake tê kirin. Dewleta Tirk ti rê û rêbaz, taktîk ne maye ku serî lê nedayî, lê bi saya berxwedaniya bi hezaran şehîdên wek Şehîd Bêrîtan ku canê xwe ji bo gelê Kurd fedakirî, nehiştîn heta niha jî dewleta Tirk bigihije armanca xwe. Festîvala ku bi navê Şehîd Bêrîtan ku her du salan carekê li wargehê weke Mihrîcana Çand û Hunerê ya ku tê lidarxistin, wekî çandekê lêhatiye. Pêwîste ne tenê her du salan carekê festîval bê çêkirin, divê her meh li ser kesayeta Şehîd Bêrîtan Semîner, dîmenên ku jiyana xwedawendên wek Şehîd Bêrîtan ji bo zarokan bên nîşandan ku zarok jî wan xwedawendan nasbikin.”

Mamoste Ayten Sûre wiha dawî li axaftinên xwe anî: “Em hewil bidin wan di dîroka xwe de zindî bigrin, mîrateya ku wan ji bo me hiştîn em deyîndarê wanin. Em dikarin bêjin di kesayeta şehîdên wek Şehîd Bêrîtan û têkoşîna azadiya jina Kurd de, jinên tevahî cîhanê hişyar bûye. Wek jinên Kurd me zemînek wisa daye avakirin ku bala jinên cîhanê jî kişaye ser xwe, em hewil bidin xeta jina azad, jina Kurd hîn pêşdetir bibin daku em bikaribin mîrateyên wekî yên Şehîd Bêrîtanan nemir bikin. Armanca me di vê cihanê de ewe ku em hemû gel û netew bêyî ku ferq û cedahî, bi awayek wekhev û azad jiyan bikin.”