Dayîkên Mexmûrê: Jin ne amûrek ya zarok çêkirinê ye!

Dayîkên Wargeha Penaberan a Mexmûrê bi boneya 25’ê Mijdarê wiha gotin: “Şîdet kiryarek dijî mirovahiyê ye. Divê jin û zilam bi hev re li dijî hişmendiya zilam-dewlet têkoşîn bidin meşandin û dem dema azadiya jinê ye.”

Armanc Herekol

Dayîkên Wargeha Penaberan a Şehîd Rustem Cûdî (Mexmûr) bi boneya 25’ê Mijdarê roja têkoşîna li dijî şîdeta li ser jinê, ji rojanama me re axivîn û banga li dijî şîdeta li ser jinê derketinê kirin.

‘Divê hişmendiya zilam-dewlet bê hilweşandin’

Dayîka bi navê Bedrê Kapar di destpêka axaftinên xwe de anî ser ziman ku heta roja îro jî şîdet li dijî jinan tê pêkanîn û got: “Beriya PKK’ê di her malê de şîdet di asta herî jor de bû. Lê piştî PKK derket û şûnde fikrên Rêber Apo belavbû, asta şîdetê kêm bû. Lê mixabin heta niha jî şîdet li ser jinê tê kirin. Divê êdî ev hişmendiya zilam-dewlet ji nav civakê rabe. Dem ne dema şîdetê ye. Jin divê êdî şîdetê li ser xwe qebul neke û li her derê rabe ser lingan. Her wiha divê zilam jî li hember şîdetê rabe, têkoşîna ku jin didin meşandin wê serbikeve. Ji bo wê jî divê jin û zilam bi hev re, li her derê cîhanê rabin ser xwe û şerê vê hişmendiya zilam-dewlet bike.”

‘Ji şîdeta li ser jinê re na!’

Bedrê di dewama axaftinên xwe de diyarkir ku şîdet ne tenê lêdane û wiha pêde çû: “Şîdeta bi ziman, ji ya lêdanê xerabtir e. Hertim keda jin tûne tê hesibandin. Dema mirov li dîrokê temaşedike, berhem hemû bi detsê jinê hatiye afirandin. Lê ew berhem weke keda zilam tê hesibandin û ev yek bixwe şîdeta herî mezine li hember jinan. Ez bang dikim, bila tevahî jin rabin ser xwe bêjin, ji şîdeta li ser jinê re na!”

‘Divê jin têkoşîna xwe xurt bikin’

Her wiha dayîka Helîm Îşlek jî li ser heman mijarê axivî û di destpêka axaftinên xwe de şîdet wek karek dijî mirovahiyê bi nav kir û wiha axivî: “Ez wek jinek ya wargehê şîdeta li ser jinan bi tûndî şermezar dikim. Ji destpêka mirovahiyê heta roja îro, ji aliyê zilam ve jin weke koleyekî hatiye dîtin. Her wiha weke amûrek a zarok çêkirinê tê dîtin. Lê em jin ne amûrek a zarok çêkirinê ne! Bila êdî jin vê yekê qebul nekin û têkoşîna heyî xurtir bikin.”

‘Bi azadiya jinê re azadiya civakê mîsoger bikin’

Her wiha Helîm Îşlek da zanîn ku jin dikare hemû karan bike û wiha axaftinên xwe domand: “Jin jiyane û bê jin jiyanek azad çênabe. Azadiya civakê bi azadiya jinê re dikare çêbibe. Bi saya Rêber Apo, jin bûye vîn, bûye şoreşger, karker û li her derê pêşengtiyê dike. Ji bo wê jî divê jinên ku heta niha li himber şîdetê bêdeng dimînin, li dijî vê hişmendiya zilam-dewlet derbikevin. Di roja me ya îro de jî hişmendiya zilam-dewlet naxwaze jin bibe xwedî vîn. Hertim dixwaze jin wek koleyekî be. Lê êdî dem hatiye ku jin azad bibe. Li çiyayên Kurdistanê jin şer dikin û xwedî li mîmarê azadiyê ango li Rêber Apo derdikevin. Ji bo wê peyama me zelal e, rabin ser piyan, li hember hişmendiya zilam-dewlet têbikoşin û bi azadiya jinê re azadiya civakê mîsoger bikin.”