Xwendevan û mamostayên Mexmûrê tecrîda li ser Rêber Ocalan şermezar kirin

Xwendevan û mamostayên Wargeha Penaberan a Şehîd Rustem Cûdî (Mexmûr) bi daxuyaniyekê tecrîda girankirî ya li ser Rêberê Gelê Kurd Abdullah Ocalan şermezar kirin û gotin: “Ji zîndanê derxistina Rêber Apo, deynê stuyê me û tevahî mirovahiyê ye.”

Xwendevan û mamostayên Wargeha Penaberan a Şehîd Rustem Cûdî (Mexmûr) bi daxuyaniyekê tecrîda girankirî ya li ser Rêberê Gelê Kurd Abdullah Ocalan bi tûndî şermezar kirin û bang li raya giştî kirin ku demildest ji bo şikandina tecrîdê rabin ser piyan.

Daxuyanî li ber derê Parka Şehîd Aryen Cûdî, bi tevlîbûna hezaran xwendevanan û bi deqeyek rêzgirtin destpê kir. Piştî rêzgirtinê daxuyanî ji aliyê xwendevanê bi navê Sîpan Yaman ve hat xwendin.

Daxuyanî wiha ye:

“Dagirkeriya Tirk xwe li ser xwîna Kurdan daye avakirin. Her wiha li ser xwîna Kurdan heta roja îro xwe dane jiyankirin. Rêber Apo ti caran serê xwe li ber dagirker û xwînmijan ne tewandiye. Rêber Apo tevahî jiyana xwe ji bo azadiya gelê bindest bikaraniye. Bi tecrîdê xwestin Rêber Apo ji gel û gerîla bidin dûrkirin. Lê armanca wan serneket û Rêber Apo plana wan vala derxist. Ji bo wê dijmin niha berê xwe daye çiyayên azad û her roj çekên qedexekirî li dijî gerîla dide bikar anîn. Lê gerîlayên Serokatî jî ev armanca wan vala derxist. Ji bo wê dijmin har û dîn bûye.

Divê em bizanin, parastina rûmeta gelê Kurd, parastina Rêber Apo ye. Bêdengkirina Rêber Apo, tunekirina mirovahiyê ye. Em bang li tevahî gelê Kurd û dostên Kurdan dikin, divê em ji bo parastina rûmeta xwe, hîn zêdetir têkoşîna xwe xûrt bikin. Heta ku Rêber Apo azad nebe, wê ti mirovahî azad nebe. Ger hun bixwazin di nava aramî û aştiyê de bijîn, werin em bi yek dengî dijî tecrîdê rabin û tecrîdê bişkînin.

Em bang li Neteweyên Yekbûyî dikin, ger hun bixwazin aramî di nava Rojhilata Navîn de çêbibe, demildest dewleta Tirk û kiryarên wan bê bandor bikin. Ger dewleta Tirk neyê bê bandor kirin, wê bibe bela serê tevahî cîhanê. Em wek Qada Perwerdê ya Mexmûrê dibêjin; ji zîndanê derxistina Rêber Apo, deynê stuyê me û tevahî mirovahiyê ye.”

Daxuyanî bi dirûşmeyên, “Bijî Serok Apo”, “Bê Serok Jiyan Nabe” û “Bijî Berxwedana Îmralî” bi dawî bû.