WEZARETA KOÇ Û KOÇBERAN OFÎSA XWE LI WARGEHÊ VEKIR

Hevberdevkê Komîteya Têkiliyên Ji Derve Bêwar Emîn: “Sedema serjimêriyên zêde ku di nava wargehê de çêdibin, nebûna NY ye. Wezareta Koç û Koçberan ofîsa xwe di wargehê de vekirin û êdî ti hincetên çênekirina nasnameyan nemaye’

Armanc Herekol

Hevberdevkê Komîteya Têkiliyên Ji Derve yê Wargeha Penaberan a Şehîd Rustem Cûdî (Mexmûr) Bêwar Emîn têkildarî serjimêriyên seranserî Iraq û Wargeha Mexmûrê hatin pêkanîn ji rojnama me re axivî û anî ziman ku Wezareta Koç û Koçberan ofîsa xwe li wargehê vekiriye.

‘Serjimêrî li tevahî Iraqê çêbû’

Bêwar Emîn di destpêka axaftinên xwe de têkildarî serjimêriyan ev zanyarî bi me re parvekirin: “Di van demên dawî de, li seranserî Iraqê ji aliyê Hikumeta Navendî ve serjimêriyek hate pêkanîn. Di vê serjimêriyê de jimara welatiyan hate zanîn û hem jî ev demek dirêjbû serjimêrî nehatibû kirin. Piştî ruxandina Seddam, hikumet xwe ji nû ve komî serhev dike. Ev serjimêrî di 3’ê qonaxan de hate pêkanîn. Ya yekem, mal hatin reqemkirin, ya duyem şênî hatin jimartin û di qonaxa sêyem de jî nêzî 70 pirs ji gel hatin pirskirin. Pirs jî di çarçoveya tenduristî, perwerde û aborî de bûn. Mirov dikare bêje, ev wek anketekî bû ku îstatîstîkek derbikeve holê. Ji ber ku ev mijar giştî Iraqê dihat pêkanîn, li Wargeha Mexmûrê jî hate pêkanîn. Ne tenê em, tevahî penaberên din jî vê pêvajoyê re derbaz bûne. Li wargehê jî ev yek qediya.”

‘Ji ber NY evqas serjimêrî çêdibin’

Bêwar di nava axaftinên xwe de sedema serhevdu serjimêriya di wargehê de çêdibin ji me re ragihand û wiha pêde çû: “Berê Neteweyên Yekbûyî serjimêrî dikir û êdî serjimêrî çênedibûn. Ji ber ku NY ew serjimêrî li wezaretan belav dikir. Lê ji ber ku niha NY li wargehê nîne, kîjan wezaret tê ji nû ve li gor wezareta xwe serjimêriyekî dike. Li ser hev jimartina gel, nerazîbûnek ji aliyê gel ve daye çêkirin, lê bila gelê me jî bizanibe, sedema wê nebûna NY ye. Ji ber wê her wezareta ku tê, neçare li gor xwe serjimêriyekî bigire. Wezareta Ticaretê van rojên dawî hat û serjimêriya xwe kir û li gor kesên ku nasnameyên wan heyî wê kartên erzaq çêbike. Wezareta Koç û Koçberan jî ji bo mijarên gaz û alîkariyên mirovî kar dike. Hindek alikariyên peryodîk hene û hindek alîkariyên ekstra hene, weke proje an jî alîkariyek cuda. Bi fermî di nava vê hefetyê de Wezareta Koç û Koçberan ofîsa xwe di wargehê de vekirin. Em jî êdî her roj dikarin pirsgirêkên xwe bi wan re nîqaş bikin. Ev yek em erênî dibînin. Heta niha ev yek nebû û me pirsgirêkên qanûnî û pirsgirêkên giştî bi çûyîna Bexda re hewil dida çareserbikin. Lê êdî em dikarin yekser li wargehê eleqeder bibin.”

‘Ti hincetên çênekirina nasnameyan nemaye’

Herî dawî Hevberdevkê Komîteya Têkiliyên Ji Derve yê Wargeha Mexmûrê Bêwar Emîn têkildarî pirsgirêkên nasname û gaz ev tişt gotin: “Ji bo pirsgirêkên nasname û gaz, hindek soz hatine dayîn ku çareser bikin, em jî vê yekê dişopînin. Heta niha hinceta wan ya çaresernekirina van pirsgirêkan, nebûna îdareyê bû. Lê êdî îdare jî heye û ti hincet nemane ku van pirsgirêkan çareser nekin. Emê hewilbidin ku çareserî di demek nêz de çêbibe û em li ser vê mijare timî xebat dikin.”