PEYMANGEHA ŞEHÎD KERÎM KATO BÛYE HÊVIYA CIWANAN

Peymangeha Şehîd Kerîm Kato ya li Wargeha Mexmûrê ji bo ciwanên wargehê bûye çavkaniya pêşketin û pêşxistinê. Endamên peymangehê dibêjin; “Alternatîfa zanîngehên pergala heyî, Peymangeha Şehîd Kerîm Kato ye.”

Armanc Herekol

Peymangeha Şehîd Kerîm Kato ya li Wargeha Penaberan a Şehîd Rustem Cûdî (Mexmûr) ku ev bi salane di xizmeta xwendekaran de ye, ji bo ciwanên wargehê bûye çavkaniya xwe pêşxistin û bûye alternatîfa zanîngehên pergala heyî.

Peymangeha Şehîd Kerîm Kato îsal jî bi rêjeyek zêde ya bi tevlîbûna xwendekaran re, dest bi perwerdeya xwe ya sala nû kir. Di peymangehê de rêjeya zêde ya jinan bala mirovan dikêşe û bi vê yekî re carekdin pêşengtiya jinan ya di civakê de xuya dike.

Têkildarî perwerdeya sala nû û girîngiya Peymangeha Şehîd Kerîm Kato ya di wargehê de, endamên peymangehê ji rojnama me re axivîn.

‘Çavkniya pêşketinê ye’

Yek ji mamosteyên peymangehê Zekiye Kaçan di destpêka axaftina xwe de anî ziman ku peymangeh alternatîfa zanîngehane û got: “Peymangeh wek du salan tê destgirtin. Sala destpêkê beşa îdeolojîk di hêla fikir û xwe rêxistinkirinê de tê dayîn. Sala duyem jî weke biranş tê destgirtin. Li vir jî li gor derfetan sê beş tê destgirtin mamostayî, tenduristî û ragihandine. Beşên tenduristî û ragihandin ji ber nebûna derfetan em nikarin bibin bersiv. Lê beşa mamostayî tê destgirtin. Ji ber ku hem xwendevan, mamostayî dixwazin û hem jî pêwsitî pê heye, em wê esas digirin. Kesên tên peymangehê ne tenê ji bo mamostayî tên, em ji bo tevahî sazî û komîteyên wargehê endaman perwerde dikin. Peymangeh jî ji bo pêşketin û pêşxistinê bingehek esase.”

Kesayetên zana avadikin

Zekiye Kaçan di nav axaftinên xwe de anî ziman ku belgeya zanîngehên pergala heyî, ji civakê re nabin bersiv û wiha pêde çû: “Min jî zanîngeh xwendiye, lê feydeya ku min ji peymangehê girtî, min jî wan zanîngehan negirt. Peymangeh çavkaniya çareseriya pirsgirêkên civakê ye. Kesê ku bixwaze ji civaka xwe re bibe alîkar û sûdekî bide civaka xwe, divê di peymangehan de bixwînin û xwe pêşbixin. Em li vir kesayetên zana û pêşketî avadikin. Îsal rêjeyek zêde serlêdana peymangehê kirin. Em ji vê rewşê gelek kêfxweş û şanazin.”

Jin zêdetir berê xwe didin perwerdê

Herî dawî Mamoste Zekiye Kaçan qala girîngiya jinan ya ku didin perwerdeyê kir û bi van gotinan dawî li axaftinên xwe anîn: “Em dibînin ku jin pitir dixwazin xwe pêşbixin. Ev yek jî nîşaneya pêşengiya jinan ya di civakê de îfade dike. Jinên wargehê timî ji bo malbat û civaka xwe dibin bersiv û di kar û xebatan de cih digirin. Ev yek jî bi saya fikir û felsefeya Rêber Apo hatiye rûniştkandin.”

‘Em ji civakê re dibin bersiv’

Her wiha xwendevana bi navê Çîmen Babat jî qala girîngiya peymangehê kir û wiha axivî: “Armanca peymangehê, kesayetên zana û jîr avakirine. Em di peymangehê de zanista civaka xwezayî dibînin. Her wiha tevahî ziraviyên pergala Modernîteya Demokratîk tê destgirtin. Ji bo me peymangeh ne bûyîna xwendevane, bûyîna endamê civakê ye. Em bi van perwerdeyan têdigihin ku rol û mîsyona me ya di civakê de çiye. Ji bo civakê çi pêwîste û çi kêm û kurtiyên wê hene, em lêkolîn dikin û çareser dikin.”

Çîmen Babat pirsa me ya ‘çima rêjeya jinan zêde ye’ bi gotina Rêber Apo ya ‘Dema jin azad be, civak jî azad dibe’, bersiv dide û wiha dawî li axaftinên xwe tîne: “Yên ku civakê ser lingan dihêle jinin. Ji bo wê jî jin timî dixwaze xwe pêşbixe. Em jî wek jin bang li herkesî dikin da ku xwe perwerde bikin û ji bo civaka xwe bibin bersiv.”