‘Hunera xwe pêşkêşî gelê wargehê dikin’

Endamê Navenda Çand û Hunerê ya Mexmûrê Yunis Dag diyar kir ku Navenda Çand û Hunerê ya  Mexmûrê amadekariyek mezin ji bo perwerdeyên çandê dikin û wiha got: “Ji ber ku yên perwerde dibînin pîraniya xwe xwedevanin tenê di havînê de derfetê wan yên beşdarbûna vê xebatê çêdibe.”

Jiyan Pîran

Parastina çanda civakê erkê her ferdek yê civakê ye. Ji bo bi cih anîna wî erkî kes dikare xwe yan jî ferdên malbata xwe teşwîqî xebatên çand û hunerê bike. Ji derveyî ferdên civakê erkê herî mezin yê dewlemendkirina çandê dikeve ser milê endamên çand û hunera wê civakê. Li ser vî bingehî Navenda Çand û Hunerê û Stêra Zêrîn ya Mexmûrê her sal di werza havînê de perwerdeyên amûrên mûsîkê, stran, şano û dîlan sazûman dikin û rêjeyek mezin zarok û ciwanên wargehê beşdarbûna  xwe ji van perwerdan re çêdikin.

Têkildarê amadekariyên perwerdeyên îsal, Endamê Navenda Çand û Hunera Mexmûrê Yunis Dag ji rojnameya me re axivî.

‘Bi dilxweşî û kelecanek mezin beşdarî perwerdê dibûn’

Endamê Navenda Çand û Hunera Mexmûrê Yunis Dag di destpêka axaftina xwe de diyar kir ku wek xebatkarên çand û hunerê plansaziyek berfireh ya perwerdekirina zarok û ciwanên wargehê dane pêşiya xwe û wiha got: “Wek tê zanîn wê di demek nêz de dibistanê wargehê bikevin betlaneya havînê. Ji bo wê jî wek endamên Çand-Hunerê û Stêra Zêrîn me dest bi amadekariyên perwerdeyên amûrên mûsîkê, stran, şano û dîlanê kirine. Em dixwezin zarok û ciwanên wargehê di aliyê çandî de bikin xwedî zanist û huner. Emê van perwerdeyên xwe li dibistana Şehîd Serhet û li Stêra Zêrîn bidin. Ciwan û xwendevanên wargehê salên derbazbûyî bi dilxweşî û kelecanek mezin beşdariya xwe ji van perwerdan re çêdikirin. Ji ber ku di havîna derbaz bûyî de jî di bin sêwana Stêra Zêrîn de gelek perwerde hatin dayîn. Hevîna derbazbûyî gav avêtinek bû. Em dixwazin di vê havînê de xebatên xwe yên perwerdekirina ciwanan berfirehtir bikin. Em piranî xebatên xwe yên perwerdekirina zarok û ciwanan di betlaneya havînê de didin destpêkirin. Ji ber ku yên perwerde dibînin pîraniya xwe xwendevanin tenê di havînê de derfetê wan yên beşdarbûna vê xebatê çêdibin.”

‘Rêjeya beşdarbûna xwendevanan geleke’

Yunis Dag di berdewama axaftinên xwe de destnîşan kir ku divê her kesek di aliyê xwe de sûdê bigihîne çanda xwe û wiha anî ziman: “Ji ber ku rêjeya beşdarbûna xwendevanan geleke em her sala di dawiya perwerdê de komek ya orkestirayê çêdikin. Piştî fêrbûnek baş ya wan xwendevanan kom tên çêkirin, ev kom di şahiyên wargehê de derdikevin ser dikê û hunera xwe pêşkêşî gelê wargehê dikin. Hefteyek piştî ku dibistan bikevin betlaneya havînê wê perwerdeyên me bên destpêkirin. Piranî amadekariyên me qediyane. Hevalên jin dikarin ji bo nav nivîsîna xwe serî li Stêra Zêrîn bidin, hevalên xort jî dikarin serlêdanê ji bo Navenda Çand û Hunerê bikin. Divê gelê me bi taybetî jî ciwanên me xwedî li çanda xwe derbikevin. Ji ber ku her diçe bişaftinên mezintir li ser çanda me tên pêkanîn û roj bi roj bi tinebûnên re rû bi bû dimîne. Her kesek di aliyê şêwaz û hunera xwe de dikare dewlemediyek mezintir bide çanda gelê Kurd. Ciwanên me di kijan aliyên çandî de xwe têrker bibînin divê xebatên çandî di wî alî de berfirehtir bike.”