‘LI BAKURÊ KURDISTANÊ EM GIHIŞTIN ARMANCA XWE’

Namzeta Hevşardara Elkê ya DEM partiyê Beybûn Aslan diyar kir ku hêza jinê ya pêşengiyê serkeftinê mezintir dike û wiha got: “Ti rewş, ti dem û zorî pêşiya têkoşîna jinê nagire. Dayîk û jinên xebatkar geh li gundan, geh ji li bajar û navçeyan bûn, kêliyek tenê jî ne rewestiyan.”

Jiyan Pîran

Wek tê zanîn di 31’ê Adarê de li Bakurê Kurdistanê û Tirkiyê hilbijartinên herêmî hatin kirin. Di hilbijartinê de partiya Kurdan DEM partî li bajar û navçeyên Kurdistanê serkeftinek mezin bidestxist. Têkildarî vê mijarê û pêşengtiya jinê ya di xebatên hilbijartinê de Namzeta Hevşardara Elkê ya DEM partiyê Beybûn Aslan ji rojnameya me re axivî.

‘Xwe di hemû aliyên xebatê de berpirs didîtin’

 Namzeta Hevşardara Elkê Beybûn Aslan di destpêka axaftinên xwe de daxuya kirin ku di her kêliya xebatên hilbijartinê de jin li pêşbûn, ji bo vê xebatê pêşengtî dikirin û wiha got: “Kar û xebatên jinan yên ji bo hilbijartinê hem li hemberî zoriyên jiyanê hem ji li dijî polîtîkayên AKP û MHP jin rolek sereke didin meşandin. Ti rewş, ti dem û zorî pêşiya têkoşîna jinê nagirin. Dayîk û jinên xebatkar geh li gundan, geh ji li bajar û navçeyan bûn, kêliyek tenê jî ne rewestiyan. Xwe di hemû aliyên xebatê de berpirs didîtin û xebatên xwe di asta herî baş de birêvedibirin. Bi gotinekê, bi şopandina siyastê yan jî  di rengdayîna mitîngan de cih girtin. Dayîk û jinên Kurd di pêvajoya hilbijartinê de li derê herkesê xistin û pêvajoya heyî ji herkesê re vegotin. Bi şev û roj ranewestiyan. Ji ber ku ev hilbijartin ji bo gelê me xwedî derketina li ziman, çand, huner, heqîqet û rastiya me bû. Ji bo ku em pêşerojek azad jiyan bikin. jinên xebatkar rol û mîsyonek mezin dan ser milê xwe û di pêvajoya hilbijartinê de kar kirin. Dema jin xurt be, xwedî hişmendî û di ferqa hêza xwe de, bibêje ez çidikim, ji bo çi dikim? wê bikarbe li beramberî hertiştî xwe pêşbixe. Pêşketina wê jinê pêşketina rêxistinê ye. Ji ber ku jin ji bo rastî û heqîqeta xwe têkoşînek bê hempa didin meşandin.”

‘Naxwazin jin di qada siyasetê tê de cih bigrin’

Beybûn Aslan di berdewam axaftina xwe de balkişand li ser serkeftina DEM partiyê ya di hilbijartinê herêmî de û wiha pêde çû: “Li Bakurê Kurdistanê em gihiştin armanca xwe. Ji ber ku AKP û MHP ne tenê li Bakurê Kurdistanê li Tirkiyê jî têkçû. Êdî hemû cîhanê jî hêza gelê Kurd dît. AKP û MHP ev demek dirêje polîtîkayên şerê tayber li ser bedena jinê dide meşandin. Naxwazin jin di qada siyasetê de cih bigrin û dixwezin jinê ji têkoşîna heyî dûrbixin. Lê pêştî vê hilbijartinê hêza AKP-MHP bê bandor ma. Êdî li hemû herêm û cihan komcivînên me destpê kirin e. Di van civînan de kêmanî û nebesiyên me yên di pêvajoya hilbijartinê de hatibûn jiyan kirin tên dest girtin. Ji bo pêşrojek mezintir em xwe rêxistin dikin û emê têkoşîna xwe mezintir jî bikin.”

Namzeta Hevşardara Elkê Beybûn Aslan di dawiya gotinên xwe de wiha got: “Pêşengtiya jinê ya di civakê de reng dide karê tê meşadin û serkeftinên bi heybetir dike. Jinên Kurd di ferqa hêza xwe de ne. Her ku diçe li hemberî polîtîkayên qirêj yên li ser jinê, dengê jinên bilintir dibe. Bila baş were zanîn jin bi qasî îradeya xwe xwedî baweriye, wê bi hêz û hêviyên xwe civakê rêxistin bike. Emê heta dawiyê jî li hemberî sîstemê xwedî helwest bin.”