KERÊ MAYÎNAN: PDK

Dîsa plan û projeyên dagirkeriyê ku bi salan e di meriyetê de ne û bi ser nakevin, berdewamin. Hêza xiyanetar ku em wek kerê mayênan lê dikin, di demên pêş de ango ber bi biharê ve wê carek din, bi kurtanên xwe yên cuda li ser kar bin.

Dewleta Tirk a dagirker û xwînmij, bi salan e ji bo ku Kurdistanê dagir bike û bi taybet jî Başûrê Kurdistanê bixe di bin kontrola xwe de û bi wê yekê re plana xwe ya Mîsak-ı Millî bi ser bixe, bi her cureyan, êrişên xwe berdewam dikin. Dewleta dagiker jî dizane, tenê astengiya li hember wan Tevgera Azadî ango parazvanên Kurdistanê PKK ye. Çawa ku faktor û rolê PKK’ê bi zelalî di vî şerê man û nemanê de tê zanîn, bi heman şêwayî rolê PDK’ê jî zelale û tê zanîn. Tişta ku PDK dike, xiyanet jî derbaz kiriye û êdî raste rast dijmintiya gelê Kurd dike. Ji şehîdxistina gerîlayên Xelîfanê bigire heta êrişên wan ên li Amediyê ku li dijî seyareyên gerîlayan, ji sîxurtiya wan bigire heta baregeh ji dagirkeran re çêkirine. Mirov bi rojan jî binivîse dawî lê naye. Divê em bizanin ku PDK çima vê dijmintiyê li gelê Kurd dike û hevkariya dagirkeran dike. Divê em baş bizanin, PDK dizane ku dawiya hikumdariya wî hatiye û êdî gelê Kurd ên Başûrê Kurdistanê bawerî bi wan nayne. PDK dizane, ger Kurd bibin yek wê binemala Barzaniyan ji holê rabe û saltanatiya wan bihilweşe. Lewma ti caran beşdarî xebatên yekîtiya Kurdan nabin û her cure astengiyan çêdikin.

Di van demên dawî de trafîkek ya hevdîtinan çêdibe û bi dehan hevdîtinên hatî zanîn û veşartî yên binemala Barzaniyan û rayedarên Iraqê bi dewleta Tirk a dagirker re çêdibin. Dewleta Tirk a dagirker li Iraq û Herêma Kurdistanê gelek civîn pêkanîn. Li gel serdana Musteşarê MÎT’ê Îbrahîm Kalin, Wezîrê Karên Derve yê hikûmeta şer a AKP-MHP’ê Hakan Fîdan û Wezîrê Parastinê Yaşar Guler ên ji bo Iraq û Herêma Kurdistanê, Serokê Giştî yê Heşd El Şeebî Falih Feyyad jî serdana Enqereyê kir. Naveroka hemû hevdîtinan jî, şerê li dijî Tevgera Azadiyê bû. Di dema Nêçîrvan Barzanî li Tirkiyeyê bû, dewleta Tirk êrişî Rojava û Başûrê Kurdistanê dikir. Li Silêmanî, Kelar û Şengalê bi Balafirên bê mirov û sîxurên ser erd, êrişên xwe dan berdewam kirin. Ev êriş eynika hevdîtinan bû. Wêneyên ku heman rojê hatine kişandin û rûkeniya Nêçîrvan Barzanî, nîşaneya plan û konseptên nû ne. Diyare, dewleta Tirk amadekariyan dike ku di biharê de dest bi operasyonek nû ya dagirkirina xaka Başûrê Kurdistanê bike. Ev yek ji aliyê rêxistinê ve jî wisa tê nirxandin. Ji bo pêkanîna vê plana xwe ya li dijî gelê Kurd, di demên dawî de berpirsên payebilind ên dewleta Tirk a dagirker serdana Bexdayê û Hewlêrê kirin. Divê em bizanin ku ev hevdîtin neyê xêrê ne û di aliyekî de jî divê em bizanin ku dewleta Tirk nekarî xwe li Herêmên Parastina Medyayê bigire û têkçûna xwe îlan kir. Lewma îro xwe davêje li ber lingên Iraq û YNK’ê. Dixwazin hikûmeta Iraqê, PDK û YNK’ê jî tevlî nava plana xwe ya nû bikin. Ji bo ku dewleta Iraqê beşdarî vê plana nû bikin jî, gelek zextan pêktînin û her rêyan diceribînin. Her wiha êriş û zextên li ser herêmên YNK’ê jî gefên dewleta Tirk û çavtirsandinek e. PDK jixwe hewceyî îknakirinê nake, bixwe xwediyê plan û projeyê ye.

Planek nû eşkere bû ku PDK bi awayekî aktîf li gel dagirkeran li dijî Başûrê Kurdistanê û Rojava, planeke qirêj a nû û hewldanên meşrûkirina dagirkeriyê zêde kiriye. PDK di çarçoveya senaryoyeke nû de bi fermana MÎT’ê bi ala Iraqê û bi navê nobedarên sînor ên hêzên Hêza 80’an ku ti Ereb têde nebûn hêz şandin Herêmên Parastinê yên Medyayê. Diyar bû ku PDK’ê beriya niha hêzên xwe yên taybet Zêrewan, Gulan û çeteyên Roj li hemû cihên ku dewleta Tirk a dagirker nikarîbûn bikevinê bi cih kiribûn. Vê carê jî Hêza 80’emîn ku 58 hezar pêşmerge di nav de ne, di çarçoveya plana ku bi hilberîna MÎT’ê re çêkirine, di bin ala Iraqê de û li ser navê nobedarên sînor şandin Herêmên Parastinê yên Medyayê. Ev yek jî nîşane û sînyalên operasyona biharê ye. PDK bi her cure derfetên îstîxbaratî, lojîstîk, ewlekarî, stargeh û veguhestinê dide dewleta Tirk a dagirker di vê planê de jî tevlî şer dibe. MÎT, CIA û MOSSAD li her cihê kardikin û bi Parastinê re ango îstîxabarata PDK’ê re xebat didin meşandin. Îran van rûdanan li hember stratejiya xwe ya Hîlala Şîa nerênî dibîne. Eşkere ye ku Îran bihêzbûna DYA, dewleta Tirk a dagirker û Îsraîl li Iraqê bi piştgiriya PDK’ê ji bo berjewendiyên xwe weke xeterî dibîne. Plan û konseptên nû di biharê de destpêdikin û ji niha ve amadekarî tên kirin. Kêm jî be bersivek nerênî ji aliyê Iraq û YNK’ê ve hate dayîna Tirkiyeyê, lê divê mirov bizane ku ev der Rojhilata Navîne û tevahî siyaseta cîhanê li vir tê meşandin. Bersiva Bafil Telebanî, bersivek di cih de bû û nîşaneya yekîtiyê bû. Jixwe ger mirov baş temaşe bike, wê mirov ji êrişên li ser Herêma YNK’ê bizane ku dewleta Tirk tişta ku dixwest ji YNK’ê negirt. Dest vala vegeriya. Lê ev helwest ne ya kesekî bû, ev helwest ya gelê Başûrê Kurdistanê bû. Lê mixabin di vê operasyona nû de dîsa rolê herî zêde dikeve li ser milê Kerê Mayînan ango PDK’ê.

Bi mizgîniya Newrozê ya Endamê Komîteya Rêveber a PKK’ê Mûrat Karayilan re, sedema liv û tevgera dewleta Tirk ya ji bo Bexda û Hewlêrê diyar bû.

Fermandariya Biryargeha Navenda Parastina Gel (NPG) bi daxuyaniyekê got; “Gerîlayên Azadiya Kurdistanê derfet peyda kiriye ku balafirên bê mirov û bi çek (SÎHA) yên dewleta Tirk ku her roj bi wan suîkast û komkujiyan pêk tînin, bînin xarê. Hêzên me bi giştî 15 SİHA anîne xwarê.”

Piştî vê mizgîniyê derket holê ku dewleta Tirk êdî ne ji hewa ne jî ji erdê ve nikare xwe li ber berxwedana gerîlayên azadiyê rabigre. Li gorî agahiyan, ji ber ku dewleta Tirk gihiştiye wê rastiyê ku êdî bi balafirên bê mirov jî nikare tiştek bike, lewma dixwaze Iraqê raste rast bixe nava şerê dijî tevgera azadiya Kurdistanê.

Her wiha tê gotin dewleta Tirk vê carê dixwaze li aliyê herêma Silêmaniyê jî weke Herêma Behdînanê xwe bicih bike, hêdî hêdî baregehên leşkerî bide avakirin. Ji bo vê jî di nava hemû hewldanan de ye, rojane gefan li YNK’ê dixwe û dixwaze YNK jî weke PDK’ê piştgiriyê bide dagirkirina Başûrê Kurdistanê. Hevserokê Konseya Rêveber a KCK’ê Cemîl Bayîk di peyama xwe ya ji bo Newroza Qendîlê, balkişand ser serdana rayedarên dewleta Tirk ya ji bo Iraqê û got; “NATO alîkariya Tirkiyeyê kir, lê têrê nekir, mala Barzanî alîkarî da têr nekir, ji bo vê jî niha bi Iraqê re hinek planan dimeşînin û li ser hinek xalan tifaqê dikin. Dewleta Tirk ji bo vê jî zextê li Iraqê dike, zextên ku dewleta Tirk û mala Barzanî li Iraqê dike, hinek encam digirin û hinek jî nagirin. Ev jî dide diyarkirin ku wê dema pêş, şerek mezin bê jiyankirin.” Wê di demên pêş de zelal bibe ka ew mayîn bi kerê ve biteqe an jî xwediyê wî kerî ve biteqe.

Armanc Herekol