NEWROZ RUHÊ FEDAYÎ YÊ CIWANAN E

 

Ciwanên Wargeha Mexmûrê cejna Newrozê li tevahî ciwanên Kurd pîrozkirin û bi ruhê Mazlum Dogan’an banga beşdarbûna pîrozbahiyên Newrozê kirin.

Armanc Herekol

Ciwanên Wargeha Penaberan a Şehîd Rustem Cûdî (Mexmûr) bi bûneya cejna Newrozê ji rojnama me re axivîn û dan zanîn ku Newroz ruhê fedayî yê ciwnane û bang li tevahî ciwanan kirin da ku bi coş û moralekî mezin berê xwe bidin pîrozbahiyên Newrozê.

Newroza serkeftinê

Hevberdevka Yekîtiya Xwendevanên Azad (YXA) Amara Bulut di destpêka axaftinên xwe de cejna Newrozê li mîmarê azadiyê Rêber Apo û tevahî jin û ciwanan pîroz kir û got: “Em hêvî dikin, ev Newroz bibe wesîleya azadiya Rêber Apo. Wê bibe wesîleya serkeftinê. Newroz ji bo me tê wateya bilindkirina şoreş û berxwedan ê. Newroz hêviya serkeftinê ye. Bihara gelan û cejna vejînê ye. Ev Newroz, Newroza azadiya fîzîkî ya Rêber Apo ye. Em bang li ciwan û jinên ciwan dikin ku bi vê ferasetê tevbigerin û beşdarî pîrozbahiyan bibin. Pêwîste tevahî ciwan li qadên pîrozbahiyê bersivek dîrokî bidin komplogeran. Emê wek ciwan, bi ruhê ciwanên şoreşger tevbigerin û Rêber Apo bi fîzîkî azad bikin.”

‘Di ferqa girîngiya Newrozê de bin’

Ciwanê bi navê Serhad Yaman jî di destpêka axaftinên xwe de cejna Newrozê li Rêber Apo û tevahî girtiyên azadiyê pîroz kir û ev tişt gotin: “Ez wek ciwanek yê Mexmûrê, vê Newrozê li Rêber Apo, girtiyên azadiyê, şervanên serê çiya û tevahî kesên ku ji bo azadiya fîzîkî ya Rêber Apo li ber xwe didin pîroz dikim. Bi hatina Newrozê re kelecanek di me de çêbûye. Newroz ji bo me sembola ji nû ve dayîkbûn û azadiyê ye. Ji ber ku gelê Kurd bi Newrozê re xwe naskiriye û li xwe vegeriyaye. Berxwedana zîndana Amedê bû meşaleyek ji bo me û em bi şewqa wê meşaleyê rêya xwe dibînin û tevdigerin. Bi vê bûneyê em cejna tevahî şehîdên xwe pîroz dikin. Divê em wek ciwan di ferqa girîngiya vê rojê de bin. Banga min ji ciwanan re ewe ku berê xwe bidin Newroza Amed û Qendîlê. Mizgîniya Heval Cemal ji bo me bûye kelecanek mezin. Em li benda wê mizginiyê ne.”

Newroza azdiya fîzîkî ya Rêber Apo

Têkildarî heman mijarê ciwana bi navê Yildiz Kara jî hestên xwe yên ji bo Newrozê wiha anî ser ziman: “Newroz ji bo me tê wateya berxwedan û têkoşînê. Ji ber ku ev roj wisa bi hêsanî nehatiye bidestxistin. Her wiha wisa bi hêsanî jî nayê pîrozkirin. Newroz bihar û vejîna gelê Kurd e. Ez vê Newrozê li Rêber Apo, girtiyên ji doza PKK-PAJK’ê, dayîkên aştiyê û tevahî ciwanan pîroz dikim. Hêvî û daxwaza me ji ciwanan ewe ku bi rûhek fedayî beşdarî vê Newrozê bibin. Her wiha divê di Newrozê de daxwaza azadiya fîzîkî ya Rêber Apo bê kirin û em dûbare cejna vejînê li tevahî gelên azadîxwaz pîroz dikim.”

‘Berê xwe bidin Amed û Qendîlê’

Herî dawî ciwanê bi navê Dilgeş Teyboga jî axivî û wiha hestên xwe bilêv kir: “Di serî de ez jî vê Nerozê li Rêber Apo, gerîlayên azadiyê û tevahî girtiyan pîroz dikim. Hatina Newrozê ji bo me moralek mezine. Ji ber ku Newroz nûbûn û vejîna me ye. Newroz dayîkbûna gelên Rojhilata Navîn e. Divê em bizanin ku meşaleya Newrozê bi kîjan zahmetiyan û zoriyan hatiye standin. Tenê em berê xwe dibin zîndana Amedê, emê bizanin ka Newroz çiqas girîng e. Ciwanên azadîxwaz agir berdan bedena xwe û nehiştin agirê Newrozê bê vemirandin. Newroz rûhê fedayî yê ciwanan e. Bi sê şikateyan Newroz hat berdewamkirin. Bangawaziya me ji bo tevahî ciwanan ewe ku beşdarî pîrozbahiyan bibin û rûhê ciwantî bidin hîskirin. Heval Cemal got, mizgîniyek heye. Divê em biçin Newrozê û bi wê kelecanê tevbigerin. Divê ciwanên Bakûr berê xwe bidin Newroza Amedê û ciwanên Başûr jî berê xwe bidin Newroza Qendîlê.”