‘VÊ HEYVA REŞ RONÎ BIKIN’

Çalakvanên greva birçîbûnê yên Mexmûrê: “Heta dilopek xwîn di laşê Kurdan de heye, heta zarokek yê Kurdan di landikê de mabe, wê li pey Serok û doza xwe bin. Heta ku em Serokê xwe di nava xwe de nebînin, em des ji doza xwe bernedin.”

Xurbet Tallî

Çalakvanên greva birçîbûnê yên Wargeha Penaberan a Şehîd Rustem Cûdî, têkildarî çalakiya xwe ji rojnameya me re axivîn.

‘15’yê Sibatê ji bo gelê Kurd rojekî reşe’

Çalakvana bi navê Fatma Yusif anî ziman ku ev heft heyîvin li wargeha Şehîd Rustem Cûdî çalakiyek ya nobetê ji bo Rêber Ocalan hatiye destpêkirin û wih peyîvî: “Ev bû 26 sal Serokê me di girava Îmraliyê de dîlgirtiye. Ev sê salin nehiştine ne malbat, ne parêzer û ne jî kesek serdana Rêbertî bikin, em bi ti awayî agahî ji Serokê xwe na bihîzin. Em ji bo Serokatiya xwe ketine çalakiya greva birçîbûnê, wê ve çalakî heta 15’yê Sibatê bidome. 15’yê Sibatê ji bo gelê Kurd rojekî reş û tarî ye. Ji bo vê pêwîste em Kurdên li tevahî cîhanê, dayîkên Bakûr yên ku zarokên wan di zindanan de ne û her roj cenaze derdikevin, rabin ser lingan û Serokê xwe bi fîzîkî azad bikin. Heta Serokatî di zindanê de be, azadî di vê cîhanê de çênabe.”

‘Cîhan hemû bi çav û guh bûn’

Fatma di axaftinên xwe de anî ziman ku Rêber Apo ne tenê serokê gelê Kurde, serokê tevahî mirovahiyê ye û wiha dawî li axaftinên xwe anî: “Cîhan avabûyî heta niha, ti serok wek Serokê me ne rabûyîne. Piştî parêznameyên Serokatî derket û şûnde, cîhan hemû bi çav û guh bûn, nû zanîn Kurd hene. Em wek gelê Kurd dibêjin êdî bese ji vê heyva reş re, em dixwazin Rêberê me bi awayek fîzîkî azad bibe, êdî ev heyva reş ronî bibe. Çima di vê cîhanê de her kes xwedî serokin, em wek Kurd bê serok, bê maf, bê ax û welatin? Em jî dixwazin bi Serokê xwe re, li welatê xwe bi awayek azad jiyan bikin. Heta dilopek xwîn di laşê Kurdan de hebe, heta zarokek yê Kurdan di landikê de mabe, wê li pey Serok û doza xwe bin. Heta ku em Serokê xwe di nava xwe de nebînin, em dest ji doza xwe bernadin.”

‘Hemû mafên Rêber Apo ji dest girtiye’

Çalakvanê bi navê Kendal Teyî jî têkildarî heman mijarê axivî û despêkê tecrîda girankirî ya li ser Rêber Ocalan bi tûndî şermezar kir û got: “Ev nêzî sih salin em li vê wargehê jiyan dikin. Di sala 1999’an de bi komployekî navnetewî Rêberê gelên Kurdistanê Rêber Apo dîl girtin û radestî dewleta faşîst a Tirk kirin. Ev sê salin bi tecrîdekî pir giran re rû bi rû ye û ji hemû mafên xwe yên mirovî bê par maye, nahêlin ne parêzer û ne jî malbat pêre hevdîtin pêkbînin. Dewleta Tirk hemû mafên Rêber Apo ji dest girtiye, bi ti awayî nahêlin peywendiyên Rêbertî bi derve re çêbibe. Ji ber wê, yê ku despêkê destê wan di nava vê komployê de, bi taybet weke CIA, MOSSAD’ê piştgirî dane û Rêbertî radestî dewleta Tirkiye kirine em wan şermezar dikin. Wek hemwelatiyên Wargeha Penaberan a Şehîd Rustem Cûdî em vê yekê bi ti şêweyî napejirînin.”

‘Em vê tecrîdê ti carî qebûl nakin’

Kendal di berdewama axaftina xwe de diyar kir ku ev nêzî heft mehin li wargeha Mexmûrê çalakiya nobetê ya dorveger hatiye despêkirin û wiha pêde çû: “Weke komek ya hemwelatiyên wargehê me dest bi çalakiya greva birçîbûnê ya sê rojan kiriye. Meşên ku îro li Bakûrê Kurdistanê hatine destpêkirin û ber bi paytexta Kurdistanê Amedê ve dimeşin, çalakiyên ku hatine lidarxistin û bi wê ve girêdayî çalakiyên ku li Ewropa jî hatine destpêkirin û ew jî ber bi Firansa ve birêketine silav dikin. Bi taybet em girtiyên di zindanan de çalakiya greva birçîbûnê dimeşînin pîroz dikin. Wek hemwelatiyên wargehê em vê tecrîdê ti carî qebûl nakin û emê her tim di nava çalakiyan de bin. Heta ku em rojekê ji beriya rojekê Rêbertiya xwe bi awayek azad di nava xwe de nebînin, em na rawestin.”

‘Em sala 2024’ê bixin sala fînalê’

Kendal Teyî di dawiya axaftinên xwe de bang li raya giştî kir û got: “Hemû kesên ku dibêjin em mafê mirovan diparêzin, em demokratin, heq û hiqûqê diparêzin, divê ji bo Rêbetiya me jî pêkbînin û xwedî li Rêbertî derbikevin. Jixwe wek gelê Kurdistanê jî hêvî û daxwazên me ewe ku em sala 2024’ê bixin sala fînalê, sala azadiya fîzîkî ya Rêber Apo û wekî her mirvên di cîhanê de em jî bi Rêberê xwe re bi awayek azad jiyan bikin.”