‘Xwedîderketina Rêbertî xwedîderkertina jinê ye’

Çalakvanên jin yên çalakiya nobetê ya li Wargeha Mexmûrê bang li jinan kirin da ku xwedî li Rêber Apo derbikevin û demildest tecrîda girankirî bişkînin û gotin: “Bila kes ne rûnin di mala xwe de, ne demê rûniştinêye dem dema fîzîkî azad kirina Rêbertiye. Çi dibe bila bibe heta azadiyê Rêbertî emê li ser lingan bin.”

Jiyan Pîran

Ji bo şikandina tecrîda girankirî û fîzîkî azad kirina Rêberê Gelê Kurd Abdullah Ocalan, ji 20’ê Tîrmehê ve li Wargeha Penaberan a Mexmûrê çalakiya nobetê hatiye destpê kirin. Çalakvanên jin yên di çalakiya nobetê de cih digirin ji rojnameya me re axivîn û diyar kirin ku çawan Rêber Apo ji bo jinan têkoşîn kiriye, pêwîste îro jin jî ji bo Rêber Apo têkoşînê bike.

‘Di bin tecrîtek girankirî de nayê girtin’

Gulîzar Şirîşeyî di destpêka gotinên xwe de diyar kir ku tecrîda girankirî di kesayeta Rêberê Gelê Kurd Abdulah Ocalan de li ser tevahî gelê Kurd tê pêkanîn û wiha got: “Ev tecrîd di salên dawî de hîn zêdetir û girantir bû. Ev demek dirêje ku bi ti şêweyî me agahî ji Rêberê xwe negirtiye. Şêniyên wargehê dem dem ji bo şikandina vê tecrîdê çalakiyên wek meş, daxuyanî, greva birçîbûnê pêkanîne û herî dawî ji li Saziya Malbatê Şehîdan çalekiya nobetê dane despêkirin. Wek jin em bêhtir cihê xwe di vê çalekiyê de digirin, armanca vê çalekiyê bi dawîkirina tecrîda girankirî ya ser Rêber Apo ye. Ti Rêberê ku pêşengtî ji civakê re dikin, di bin tecrîtek girankirî de nayê girtin. Ji ber ku mafê gelên bindest di parêze ew heqaretê li Rêbertiya me dikin.  Yên ku xwe bi navê parastina mafê mirovan bi nav dikin, ji Rêberê me re ker û kor e, xwe ji vê zilmê re bêdeng dikin. Wek dayîkek ya şehîdan em bi ti şêwazê gav paşde na avêjin û dest ji vê dozê bernadin. Rêbertî mafê jinê parast û got: ‘civak tenê bi yek şêweyî dikare xwe rêve bibe, ew ji bi jina azad re’ û li dijî sîstema desthilatdariyê derket. Ji ber ku bi ti şêwazî li hemberî wan desthilatdaran serî netewandiye, îro di bin tecrîtek girankirî de ye. Mafê her girtiyekê heye ku hevdîtinê bi malbat û  parêzerên xwe re pêkbîne. Em bang li hemû jinên Kurd dikin ku hemû bi hev re rabin ser xwe û tecrîda girankirî bişkînin.”

‘Heta azadiya Rêbertî emê li ser lingan bin’

Çalakvana bi navê Eyşê jî di destpêka axaftinên xwe de destnîşan kir ku divê demildest gelê Kurd ji bo şikandina tecrîda girankirî rabe ser xwe û  wiha pêde çû: “Rêbertî çavê hemû gelên bindest vekir. Em wek gelên bindest yên ku azadiyê dixwazin qasî ji me tê emê têkoşîna xwe bilind bikin û Rêbertiya xwe azad bikin. Di demê ku kesek navê Kurdistanê ne di anî ziman, Rêbertî ew nav anî ziman. Ew îro ji ber me di girtigehê de ye ji ber wê çi pêwîst bike divê em ji  bo azadiya Rêbertiya xwe bikin. Heta em saxin çi ji me bê xwastin emê bikin. Em bang li hemû gelê Kurd dikin ku bila kes ne rûne di mala xwe de, ne demê rûniştinêye dem dema fîzîkî azad kirina Rêbertî ye. Çi dibe bila bibe heta azadiya Rêbertî emê li ser lingan bin. Heta yek Kurd bimîne jî wê ev doz berdewam bike.”

‘Têkoşînek pîroze’

Herî dawî jî çalakvana bi navê Minewir Şirîşeyî jî bang li gelê Kurd kir ku xwedî li Rêberê Gelê Kurd Abdullah Ocalan derbikevin û wiha anî ziman: “Têkoşîna Rêbertiya me ya ku li grava Îmralî dide meşandin, têkoşînek pîroze. Ji bo ku em jî bibin layîqê vê têkoşînê pêwîste em jî wek gelê Kurd xwedî îdeayên mezin yên têkoşînê bin û di hemû kêliyên jiyanê de li ser lingan bin. Em bang li tevahî jinên Kurd û cîhanê dikin ku xwedî li Rêber Apo derbivekin. Li Rêbertî xwedî derketin li nasnama jinê xwedî derketin e.”