ÇALAKIYA MEXMÛRÊ 8 HEYV LI PEY XWE HIŞT

Çalakiya nobetê ya li Wargeha Penaberan a Mexmûrê ku di 20’ê Tîrmeha 2023’an de ji bo azadiya fîzîkî ya Rêber Apo hatibû destpêkirin, 255 roj li pey xwe hişt. Çalakvan dibêjin: “Rêber Apo xeta me ya sore û divê demildest tecrîda li ser Rêber Apo bê şikandin.”

Armanc Herekol

Çalakiya nobetê ya li Wargeha Penaberan ya Şehîd Rustem Cûdî (Mexmûr) ku di 20’ê Tîrmeha 2023’an de ji bo azadiya fîzîkî ya Rêberê Gelê Kurd Abdullah Ocalan hatibû destpêkirin, 255 roj li pey xwe hişt û niha jî bi koma 50’emîn berdewam dike.

Çalakvanên ku di çalakiyê de ne, ji rojnama me re peyivîn û banga çalakiyên hîn xurtir li gelê Kurd û dostên Kurdan kir.

‘Tecrîd bandorek mezin li me dike’

Çalakvana bi navê Xanim Babat ku niha ji bo azadiya fîzîkî ya Rêber Apo di çalakiya nobetê de ye, di serî de tecrîd bi tûndî şermezarkir û got: “Zêdeyî 3 salin me agahî ji Rêber Apo negirtiye, ji ber vê yekê em ji rewşa tenduristiya Rêberê xwe bi gûmanin. Em nizanin ka rewşa Rêber Apo di hêla tenduristî de çawan e. Wek gelê Kurd ev yek bandorek mezin li ser me çêdike. Ji ber ku Rêberê me hebûn û vîna me ye, ji bo wê jî em niha ji bo azadiya fîzîkî ya Rêber Apo di çalakiya nobetê de ne û em dixwazin demildest tecrîda heyî bê rakirin û êdî Rêber Apo bi fîzîkî di nav me de jiyan bike.”

‘Rabin ser xwe!’

Xanim Babat di nava axaftinên xwe de anî ziman ku tecrîd îrade şikandin û zilmek mezine, her wiha dijî mafê mirovane û wiha pêde çû: “Tecrîd rêbazek dijî exlaqê mirovan e. Ji ber wê yekî di ti pergalan de ne rewa ye. Ev tecrîda ku li ser Rêber Apo tê meşandin, heman demê de li ser tevahî gelê Kurd û gelên azadîxwaz tê meşandin. Em silav û hezkirinên xwe ji girtiyên azadiyê û dayîkên aştiyê re dişînin. Her wiha em çalakiya wan pîroz dibînin û serkeftinê dixwazin. Di pêvajoyek wisa girîng de çalakî lidarxistin û xwedî li Rêber Apo derketin, tişta herî pîroz e. Em dûbare bang li tevahî gelên azadîxwaz dikin ku demildest rabin ser lingan û ji bo azadiya fîzîkî ya Rêber Apo çalakiyan bikin. Her wiha banga min ji gelê Bakûr re ewe ku di 31’ê Adarê de herin ser sindoqan, vîna gelê Kurd nîşanî cîhanê bidin û derbeyekî li qeyûman bidin.”

‘Emê Rêber Apo bi fîzîkî azad bikin’

Her wiha çalakvanê bi navê Cûma Ozer jî wiha nêrînên xwe anîn ser ziman: “Wek tê zanîn ev demek dirêje, tecrîdek girankirî di kesayeta Rêber Apo de li ser tevahî gelê Kurd tê meşandin. Li dijî vê tecrîdê jî, li girtîgehan çalakiya greva birçîbûnê hatiye destpêkirin, li bajaran dayîkên aştiyê di çalakiya nobeta edaletê de ne û em wek wargeh jî di çalakiya nobetê de ne. Em piştgirî didin gerêlayên serê çiya, girtiyên azadiyê û dayîkên aştiyê. Wê ev çalakî bibin wesîleya azadiya fîzîkî ya Rêber Apo.”

‘Divê niha tecrîd bê şikandin’

Cûma di berdewamiya nirxandinên xwe de diyarkir ku agahî ji Rêber Apo negirtin, bandorek mezin li Rojhilata Navîn dike û wiha dirêjî da axaftinên xwe: “Sedema van qeyran û şerên heyî tecrîd e. Ger Rêber Apo ji derve buya, wê aştî û demokrasî hebûya. Mifta çareseriyê Rêber Apo ye. Dibe ku tecrîdek girankirî li ser Rêber Apo hebe, lê Rêber Apo fikrên xwe belavî cîhanê kiriye. Gelê Kurd bi saya fikir û felsefa Rêber Apo dikare xwe bi xwe rêvebibe û xwe biparêze. Divê em wek Kurd û dostên Kurdan ji bo azadiya fîzîkî ya Rêber Apo rabin ser piyan û têkoşîn bikin. Rêber Apo wateya jiyana me ye. Em bi fikrên Rêber Apo hene. Me çavên xwe bi fikrên Rêber Apo vekirye. Bi saya Rêber Apo em bûne xwedî vîn û maf. Rêber Apo xeta me ya sor a pêşveçûnê ye. Divê rojek ji ya din zûtir ev îzolasyona qirêj bê rakirin.”