JI BO BÎRANÎNA ŞEHÎD RÊZAN TÛRNÛVA HAT DESTPÊKIRIN

Di pêşengtiya Yekîtiya Xwendevanên Azad (YXA) de li Wargeha Penaberan a Mexmûrê tûrnûvaya fûtbolê bi dirûşmeya ‘Bi Ruhê Şehîd Rêzanan Serbixe Cenga Azadiyê’ hatiye destpê kirin. Di plansaziyê de tûrnûvaya voleybolê jî heye.

Armanc Herekol

Li Wargeha Penaberan a Şehîd Rustem Cûdî (Mexmûr) di 9’ê Mijdarê de, di pêşengtiya Yekîtiya Xwendevanên Azad (YXA) de, ji bo bîranîna Şehîd Rêzan Botan ku di 6’ê Tebaxa 2023’yan de li Herêmên Parastina Medya şehîd bibû, tûrnûvayek a futbolê hat destpêkirin. Dirûşmeya tûrnûvayê ‘Bi Ruhê Şehîd Rêzanan Serbixe Cenga Azadiyê’ ye. Wê di turnovayê de 7 tîm bên beramberî hev. Têkildarî tûrnûvayê ciwanên Wargeha Mexmûrê ji rojnama me re peyivîn.

Ciwan kêfxweşin

Têkildarî tûrnûvayê ciwanê bi navê Sîmar Tûrhan axivî û di serî de ji tevahî tîman re serkeftin xwest û wiha axivî: “Şehîd Rêzan Botan ji ber ku li vir xwendibû, ji bo bîranîna wî ev tûrnûva hatiye destpêkirin. Di kesayeta Şehîd Rêzan de em tevahî cangoriyên azadiyê bi minetdarî bibîr tînim û bejna xwe li ber keda wan ditewînin. Spor di her hêlê de başe û armanca me jî ewe ku sporê bidin hezkirin. Ji ber ku spor tendûristiya mirovan diparêze û ji bo laşê mirovan pir başe. Her wiha kêfxweşiyeke jî. Ciwanên wargehê ji sporê hez dikin û her demjimêr ev saha tijiye û dileyîzin. Ji ber ku ji fûtbolê hezdikin, lewma ev tûrnûva hat destpêkirin.”

Piştî fûtbolê, voleybol heye

Sîmar Tûrhan di dewama axaftinên xwe de da zanîn ku wê di pêşerojê de tûrnûvaya voleybolê jî bê destpêkirin û wiha axaftinên xwe bi dawî kir: “Wê di vê tûrnûvaya fûtbolê de, bi giştî 7 tîm bileyîzin û hamû jî xwendevanin. Ne tenê xort wê jin jî bileyîzin. Piştî fûtbola xortan, wê ya jinan jî bê leyîstin. Bi wê ve girêdayî, di pilansaziyê de voleybol jî heye. Tevlîbûna gel ji aktîvîteyên wisa re pir heye. Hem dixwazin bileyîzin û hem jî dixwazin temaşe bikin. Ev tûrnûvayên wisa her sal dû sê caran tên li darxistin. Em jî ji tevahî koman re serkeftinê dixwazin.”

Tûrnûvaya fûtbolê hatiye destpêkirin

Her wiha ciwana bi navê Zîlan Ozek jî li ser heman mijarê axivî û di destpêka axaftinên xwe de Şehîd Rêzan Botan ku di 6’ê Tebaxa 2023’yan de li Herêmên Parastina Medya şehîd bibû, bi rêzdarî bi bîr anî û got: “Ciwanên wargehê timî eleqederiyek mezin nîşanî sporê dane û spor ji bo ciwanên wargehê girînge. Ji ber wê jî niha tûrnûvayek a fûtbolê hatiye destpêkirin. Ev tûrnûva li ser navê Şehîd Rêzan Botan hatiye destpêkirin. Heval Rêzan li wargehê xwendibû. Em di kesayeta Şehîd Rêzan de tevahî şehîdan bibîr tînin. Piştî fûtbola xortan wê ya jinan jî bê destpêkirin. Em serkeftinê ji hemû tîman re dixwazin.”