Endamê Komîteya Karê derve yê wargehê Bêwar Unver: “Gotine emê di vê serjimêriyê de pirsgirek û pêwîstiyên jiyanî, perwerde, tenduristî, binesazî, jin û ciwanan bi giştî çareser bikin.”
Xurbet Tallî
Li Wargeha
Penaberan a Mexmûrê ev çar carin serjimêrî tê kirin. Li ser vê mijarê Endamê
Komîteya Karê Derve Bêwar Unver û hemwelatiya wargehê Oznûr Kaya ji rojnameya
me re axivîn.
Biryarek daye
Endamê
Komîteya Karê Derve Bêwar Unver di derbarê serjimêriya ku niha li wargehê hatî
destpê kirin de wiha axivî: “Ev lijneya Koç û Koçberan e, armanca wan ya vê
serjimêriyê tomarkirina ferd û malbatên di wargehê de ne. Niha weke wezareta
Koç û Koçberan ji hemû penaberên li Iraqê berpirse. Her wiha di hemû alîkariyên
jiyanî ku rêkxirawên netewî ji bo penaberan pêşwazî dikin de xwedî role. Lê
piştî êrişên DAIŞ’ê yên li ser wargehê û şûnde wezareta Koç û Koçberan ya Iraqê
alîkariyên weke erzaq, gaz û pêwîstiyên jiyanî yên nexweşan, perwerde, Şaredarî
û hwd bi giştî li ser me qut kirin. Li ser van xalan ev demeke dirêje em bi wan
re hevdîtin pêktînin, ev hevdîtin jî li ser bingehê ku carekî din wezareta Koç
û Koçberan bi erk û rola xwe rabe. Wezareta Koç û Koçberan jî ji bo ev
pêwîstiyên ji bo penaberan tê pêşwazîkin wargeh jî para xwe jê bigre, biryarek
daye. Ev biryar jî ji bo carek din wargeh vegere nav wê projeya ku alîkarî ji
bo wan jî bê dayîn û gotin ji bo em alîkariyê bidin wargehê, divê em
serjimêriyê bikin.”
Soza
çareserkirina pirsgirêkan dane
Unver di dewama
xaftina xwe de îşaret bi nerazîbûnên gel kir û wiha pêde çû: “Nerazîbûnên gel
yên ji bo vê serjimêriyê bê gûman aliyên xwe yên mafdar heye. Ji ber ku ji
2019’an heta niha her carekê di bin navê saziyek yê hikumetê de serjimêriyek hatiye
pêkanîn. Mînak; di bin navê Wezareta Navxweyî de, Wezareta Koç û Koçberan û Wezareta
Ticaretê de serjimêrî hatiye kirin. Di Serjimêriyên beriya niha de, ji bo
çareserkirina hinek pirsgirêkên wargehê soz dabûn lê pêk ne anîne. Gotine emê
di vê serjimêriyê de pirsgirekên pêwîstiyên jiyanî, perwerde, tenduristî,
binesazî, jin û ciwanan bi giştî çareser bikin. Bê gûman ev nerazîbûnên gel
heta astekê di cih de ye û Iraq jî wateyê didiyê. Wekî wargeh em ti carî li
himberî kar û xebatên îdarî yên hikumetê nebûne astenk, ji bo erka xwe pêkbîne jî
em bûne alîkar. Lê eger erkê xwe pêk ne îne, wê nerazîbûnên gel jî derbikevin.”
Bêwar Unver di
dawiya axaftinên xwe de wiha behsa rêjeya pêkanîna serjimêriyê kir: “Niha
serjimêrî bi awayek giştî bi encam bûye, bi qasî ji sedê 30 maye. Wek tê zanîn
debara xelkê wargehê li ser karkeriyê ye, ji ber wê hêjmarek zêde ji derve ye
ew jî wê van rojên pêş werin. Emê nerazîbûnên gel bi vê serjimêriyê re hîn
xurtir bidin diyar kirin. Piştî ku serjimêrî qediya emê bişopînin ka wê çi
encamê bi xwe re bîne. Sozên ku dane divê teqez pêk were, ger nebû emê wek gel bi
awayên cûda nerazîbûnên xwe bidin diyarkirin.
‘Tenê li ser
kaxezê maye’
Hemwelatiya wargehê Oznûr Kaya jî wiha qala serjimêriya
li wargehê hatî destpêkirin kir: “Serjimêriyên ku beriya niha ji aliyê Iraqê ve
hatibûn kirin, bi xwe mal bi mal geriyan. Her cara ku serjimêrî kirine jî, soza
pêkanîna xwestekên gelê wargehê dane lê em dibînin tenê li ser kaxezê maye. Li
rûxmê ku Hikumeta Iraqê dizane ev wargehekî penaberane, lê dîsa jî bi gotina
Tiriye û PDK’ê ya ku dibêjin wargehekî leşkeriye têne wargehê. Me bi van
serjimêriyan di xapînin! Niha em li ser axa Iraqê dijîn, di heman demê de em di
bin sêwana NY de ne jî. Li rûxmê ewqas êrişên hewayî yên dewleta Tirk li ser
wargehê çêbûne jî, lê ne di aliyê ewlehiyê de û ne jî di aliyê alîkariyê de tiştek
ji bo gel nahatiye kirin.”
‘Di seytereyan de tên astengkirin’
Oznûr Kaya di dawiya axaftinên xwe de ev tişt gotin: “Me ji
ber zilma dewleta Tirkiye gelek wargeh guhertin, ji wê demê heta niha ne NY ne
jî Iraqê destê alîkariyê dirêjî vî gelî nekiriye. Li wargeha me ji 2019’an heta
niha ev çar carin serjimêrî tê kirin. Di serjimêriyên ku li wargehê hatibûn
kirin de nasname ji bo xelkê wargehê hatibû çêkirin. Ev demek dirêje li ser dîroka
derketina nasnameyan re derbaz dibin. Piraniya gelê wargehê karkerin û diçin
derveyî wargehê, kar dikin. Ji ber ku dîroka nasnameyên wan sere derbaz bûne,
di seytereyan de tên astengkirin. Hêvî û daxwazên me ji Iraq û NY ewe ku ev
serjimêrî bibe ya dawî û hemû daxwazên gel bi vê serjimêriyê werin cih.”
0 Yorumlar