PDK XWÎN Û RÛMETA BAŞÛR DIFIROŞE!

Rojnamevanê Herêma Behdînanê Dara Metîna anî ziman ku PDK êdî raste rast, mil bi milê artêşa Tirk derdikeve operasyonan û rûxmê ewqas êriş, xiyanet, bikaranîna çekên kîmyawî û taktîk nukleerî jî gerîla ji berxwedana xwe tawîz nade û her roj bi pisporî û moralekî bilind çalakiyên bi bandor lidardixe.

Armanc Herekol

Rojnamevanê Herêma Behdînanê Dara Metîna têkildarî xiyaneta PDK’ê û berxwedana dîrokî a gerîlayên HPG û YJA STAR’ê ji rojnama me re nirxandin kir û diyarkir ku PDK xwîn û rûmeta gelê Başûr pêşkêşî dagirkeran dike!

‘Dîrokek demdirêj a xiyaneta PDK’ê heye!’

Rojnamevan Dara Metîna di destpêka axftinên xwe de bilêvkir ku xiyaneta PDK’ê ne di van rojên dawî de destpêkiriye û got: “Dîrokek demdirêj a xiyaneta PDK’ê bi taybet a Mala Barzanî, li hember gelê Kurd heye. Her wiha têkiliyên Mala Barzanî ya bi dewleta Tirk re her ku diçe zêde dibe û êdî Mala Barzanî bûye parçeyek ji artêşa Erdogan. Ji ber ku hem aborî, hem siyasî û hem jî di her hêlê de ketine di bin desthilatdariya Erdogan de. Malbat û rayedarên PDK’ê wek waliyek ê şerê dewleta Tirk tevdigerin.”

Dewleta Tirk rolê PDK’ê diyar dike

Dara di nava axaftinên xwe de bibîrxist ku di sala 2021 û 2022’an de dewleta Tirk rol dabû PDK’ê da ku li hember gerîla yekser bi dewleta Tirk re tevbigere û wiha axaftinên xwe berdewam kir: “Rolê ku di sala 2021-2022’an de dewleta Tirk dayî PDK’ê, yekser li dijî PKK’ê şerkirin bû. Wan deman PDK’ê rê ji bo dewleta Tirk vekir, amûrên wan xistin qadên gerîla û tevahî lojîstîka wan dabîn kir. Bi wê ve girêdayî, di baragehên xwe de parastin. Gelek qadên ku dewleta Tirk nekarî cenazeyên xwe derbixe, PDK çû cenazeyên wan derxist. Ewqas xwe rûreş kirin. Îsal jî dewleta Tirk dema ku zanî nikare bi tang, top, balafir, çekên kîmyawî û çekên taktîk nukleerî gerîla têk bibe, roleke mezintir da PDK’ê. Ew rol jî ewe ku êdî çi dibe bila bibe, wê PDK raste rast tevlî şer bibe û gavên pratîk bavêje.”

Dara Metîna da zanîn ku van demên dawî de tevgerek a zêde ya PDK’ê heye û li hin qadan baragehan ji artêşa Tirk re çêdike û wiha behsa kûrahiya xiyaneta PDK’ê dike: “Di van demên dawî de, li Rojavayê ava Zap’ê ku jêre tê gotin qada Şehîd Delîl, PDK li wir hinek baragehên nû ava dike. Van baragehan jî ji bo leşkerên Tirk avadikin. Bê goman, her ku diçe tevgera PDK’ê zêde dibe. PDK hem li Rojavayê Zap’ê baragehan çêdike û hem jî, li qada Zap’ê rûxmê ku gelek carin hatine şiyarkirin jî, rê ji artêşa dagirker re çêdikin.”

PDK tevlî operasyonan dibe

Dara di nav axaftinên xwe de bal kişand li ser vekişîna artêşa Tirk û da zanîn ku cihên artêşa Tirk jê vekişiyane carek din êriş destpêkirine û ew leşkerên ku hatine şer jî ji baragehên PDK’ê yên li Metînayê bi rê ketine û wiha qal dike: “Êrişa berfireh a herî dawî ya dewleta Tirk a li ser Zap, Metîna û Avşînê, bi helîkopter an jî ji aliyê Bakûr ve leşker nehatin, yekser ji baragehên PDK’ê bi meşê hatin. Xwestin tola binketina xwe a li Zap’ê hilînin. Lê rûxmê ewqas êriş û xiyanetê jî, gerîlayan derbên giran li dagirkeran xist û armanca wan vala derxist. Her wiha li Xakûrkê, qada Lêlikanê dema ku gerîlayan çalakiyek mezin lidarxistî ku di encamê de gelek dagirker hatibûn kuştin, artêşa Tirk bi hêzên PDK’ê ve daketibûn operasyonê. Êdî bi hev re derdikevin operasyonan.”

‘Gelê Başûr divê bêdengiya xwe bişkîne’

Herî dawî Rojnamevanê Herêma Behdînanê Dara Metîna qala berxwedana ji pola a gerîlayan kir û da zanîn ku gerîla rûxmê êriş, xiyanet, çekên qedexekirî jî ji berxwedana xwe tawîz nade û bi van gotinan dawî li axaftinên xwe anîn: “Raste ji her aliyê ve êriş û xiyanet heye. Lê ya di dîrokê de dimîne, berxwedan û têkoşîna gerîla ya li dijî wan êrişan û xiyanetê ye. Gerîla bi morelek bilind û bi pisporî şer dike û tola hezaran salan dihilîne. Gerîlayên Rêber Apo ji bo gelên bindest li ber xwe dide, ji bo wê divê gel jî li gor vê zanabûnê tevbigere. Taybet gelê Başûr divê bizane kî diparêze û kî difiroşe! Gerîla bi salane diparêze û PDK jî bi salane difiroşe. PDK rûmet û xwîna şehîdên gelê Başûr pêşkêşî dagirkeran dike. Divê gelê Başûr li dijî van xwînmij û bê exlaqan bertekên tûnd nîşan bidin û xwedî li xwîna şehîdên xwe derbikevin.”