ARMANCA ME AFIRANDINA JIYANEK AZAD E

Endama Komîteya Jinolojî ya Mexmûrê Sabiha Onar têkildarî kar û xebatê xwe yê dawî axivî û got: “Em hewl didin xwe bigihînin hemû ferdên civakê ku bikaribin wan di aliyê zanista jinolojiyê de perwerd bikin.

Jiyan Pîran

Li ser armanca xwe gihandina hemû ferdên civakê û perwerde kirina wan ya di derbarê zanista jinolojî de ev demek dirêje Komîteya Jinolojî ya Mexmûrê dest bi xebatek berfireh kirin e. Têkildarî vê xebatê Endama Komîteya Jinolojî ya Mexmûrê Sabiha Onar ji rojnameya me re axivî.

‘Em jin û zilaman perwerde dikin’

Sabiha Onar di destpêka gotinê xwe de daxuyakirin ku ji bo xwe gihandina hemû ferdên civakê dest bi perwerdekirina xebatkarên komînan kirine û wiha got: “Me beriya vê çend dewreyên perwerdê ji bo hevalên xort yên wargehê taybet li ser zanista jineolojiyê vekirin. Vê carê me xwest em jin û zilêman li ser zanista jineolojî û rastiya jineolojiyê ku çawan dikarin bi hev re jiyan bikin perwerde bikin. Xebatkarên ku di perwerdeyê de guhertin û veguhertinê di kesayeta wan de pêşdikevin bi me re nîqaş dikin. Armanca me ya sereke ewe ku em di hevjiyana azad a jin û mêr de jineolojî bigrin dest û jiyana civakê li ser wî bingihê sazûman bikin e. Demê me kêm bû ji bo wê me waneyên bingihîn dan. Di perwerdê de mijarên taybet ên wek ‘Jineolojî çiye, Jin û zanist, di kesayeta jin û mêr de hevjiyana azad,  hevserokatî, erk, endamtî û malbat’ hatin dest girtin.”

‘Armanca me malbatek demokratîk e’

Sabiha Onar di berdewama axaftina xwe de balkişand li ser girîngiya perwerdeya zanista jineolojiyê ya ji bo civaka exlaqî û polîtîk pêwîst û wiha anî ziman: “Herê zêde mijara malbatê bala endamên perwerdê dikişand û dixwestin di wê mijarê de bibin xwedî zanist. Ji ber ku sîstemê herî zêde dest avêtiye malbatê û di malbatê de xwe sazûman kiriye. Li ser vê yekê jî endamên perwerdê dixwezin xwe bigihînin malbata demokratîk ya ku civaka exlaqî û polîtîk bi xwe avadike. Em di perwerdeyên xwe de nakevin kûrahiya dîrokê. Ji ber ku em dixwezin bi pirsgirêkên jiyanî re mijûl bibin û ji bo wan bibin bersiv. Me perwerde li ser daxwaza semtan li semtan da destpêkirin. Em dixwazin di demê pêş de tax, tax perwerdên xwe bidin domandin. Em li ser daxwaz û pêwîstiyên civakê perwerdeyên xwe didin destpêkirin. Em dixwazin civakê bikin xwedî hişmediyek zanista jineolojiyê. Em naxwazin zanista jineolojî di teoriyê de bimîne. Em dixwazin zanista jineolojiyê di jiyanê de bi cih bikin û li gorî wê zanistê jiyana xwe  bi şêwe bikin.”    

Sabiha di dawiya axaftina xwe de destnîşan kir ku ew di perwerdeyê de xwe naskirina kes esas digrin û wiha got: “Em dixwazin wek jineolojî kes xwe nas bike. Dema her kes xwe nas bike, bi xwezayî jiyana nû jî tê afirandin. Em dixwazin xwe bigihînin hêza cewherî ya kes. Li ser vê divê her neferek xwe di aliyê zanista jineolojiyê de perwerde bike.”