Barzanî: Erdogan ferman dide, Rêveberiya Başûr jî pêktîne

Siyasetmedar û nivîskarê Kurd Eyûb Barzanî, têkildarî hevdîtina Serokê Herêma Kurdistanê Nêçîrvan Barzanî û Serekkomarê Tirkiyeyê Recep Tayyîp Erdogan de got: “Rastiya hevdîtinê bi kûrtasî mirov dikare bêje, Erdogan ferman daye û Nêçîrvan jî çû bi cih bîne. Desthilata Başûr ji bo pêşketina Kurdistanê astengiyek mezine. Dem hatiye ku êdî ev desthilat bê rûxandin û dem dema serhildanê ye.”

Armanc Herekol

Siyasetmedar û nivîskarê Kurd Eyûb Barzanî ji ajansa me re qala armanca hevdîtina Serokê Herêma Kurdistanê Nêçîrvan Barzanî ya bi Serekkomarê Tirkiyeyê Recep Tayyîp Erdogan re kir û eşkere kir ku di hevdîtinê de ti gûftûgo nehatine kirin, fermanên Erdogan hene û Nêçîrvan Barzanî jî çûye pêkbîne.

‘Yek ferman dide, yek jî pêktîne’

Eyûb Barzanî da zanîn ku ev hevdîtin ne hevdîtinek ji rêzê bû û got: “Dewleta Tirk ti caran Kurdan qebûl nake û di hevdîtinan de jî diyar dibe, ti prosedûrên fermî pêknehatine û bi van hevdîtinan bêrêzî li Kurdan tê kirin. Daxuyaniya ku Serokatiya Herêma Kurdistanê ya li ser hevdîtinê dayî ez bawer nakim û ne raste. Ya rastî ewe ku Erdogan ferman daye Nêçîrvan û Nêçîrvan jî çûye bi cih bîne. Ji ber ku Tirkiye vê yekê na veşêre. Tirkiye Herêma Kurdistanê nas nake û li gor wê nêz dibe. Di hevdîtinan de ti gûftûgo nînin, ferman hene û Nêçîrvan çûye pêkbîne. Di wê hevdîtinê de dû alî nînin, herdû jî yekin. Yek ji wan ferman dide û yek jî pêktîne.”

‘Rêveberiya Başûr li gor Erdogan kar dike’

Barzanî da diyarkirin ku Nêçîrvan di her hêlê de pişta xwe li Erdogan germ dike û wiha peyivî: “Dibe ku gelek kes bêjin, çima Nêçîrvan di demek wisa aloz de çû gel Erdogan, divê hemû kes bizanibin ku Erdogan gotiye Nêçîrvan were û ew çûye. Nêçîrvan dixwaze wisa nîşanî Iraqê bide ku pişta wan li Tirkiyê germe. Bi van hevdîtinan gefan li Dadgeha Federal a Iraqê dixwin. Ti biryarên Rêveberiya Herêma Kurdistanê nemaye û dewleta Tirk kengê û çawa bixwaze, wan li gor xwe dide xebitandin. Tirkiyê ji berê vê yekê serweriya Başûrê Kurdistanê xistiye di destê xwe de. Di Iraqê bixwe de jî, gelek tevlîhevî heye.”

‘Heta ku desthilat neyê rûxandin, wê ti caran aramî çênebe’

Herî dawî siyasetmedar û nivîskarê Kurd Eyûb Barzanî di nava axaftinên xwe de bilêvkir ku Tirkiye ji xwe re xûlaman digere û wiha pêde çû: “Dewleta Tirk siyasetekî qirêj di nava Kurdan de dide meşandin û ji xwe re li xûlaman digere. Desthilata li Başûr, desthilatekî şexsî ye. Ji ber vê şêwaza desthilatdariyê, rê nayê dayîn ku tifaqek a Kurdan çêbibe. Desthilata Başûr ji bo pêşketina Kurdistanê astengiyek mezine. Ti berpirsyartiyek a Rêveberiya Başûr nîne. Heta ku ev desthilat neyê rûxandin, wê ti caran aramî çênebe. Dem hatiye ku êdî ev desthilat bê rûxandin û dem dema serhildanê ye.”