‘DIVÊ XWENDEVAN NEBIN XIZMETKARÊ TEKNÎKÊ’

Endamê Rêveberiya dibistana amadeyî ya Şehîd Koçerîn Mamosta Mûstafa Ergen: “Li Mexmûrê bi fikir û felsefeya Rêber Apo perwerde tê dayîn. Li gor salên borî rêjeya waneyên xwendevanan ketine û divê di dema nû de ev kêmanî bi hevdû temamkirina mamosta, malbat û xwendevanan bê derbaskirin.”

Armanc Herekol

Dibistanên Wargeha Penaberan a Şehîd Rustem Cûdî (Mexmûr) di 12’ê Çileyê de ketin betlaneya nîva salê û tevahî xwendevanên wargehê karnameyên xwe bi kelecanekî mezin wergirtin.

Têkildarî rewşa perwerdê û xwendevanan Endamê Rêveberiya dibistana amadeyî ya Şehîd Koçerîn Mamosta Mûstafa Ergen ji rojanama me re axivî û bang li malbatan kir da ku hîn baştir bi zarokên xwe re eleqeder bibin.

‘Bi fikir û felsefa Rêber Apo perwerde dibin’

Mamosta Mûstafa di destpêka axaftinên xwe de diyar kir ku wan rûxmê êriş û planên qirêj ên li ser wargehê jî, nîva salê ya perwerdeyê qedandine û got: “Dijmin ji bo ku wargeha me belav bike û xwendevanên me ji holê rabike, her cûre êrişan pêktîne. Ji ber ku xwendevanên me bi zimanê xwe dixwînin, ev yek jî ji bo dijmin wek gefek mezin e. Zimanê Kurdî li her derê qedexeye û her roj ji ber axaftina Kurdî êşkence û girtin çêdibin. Em wek Mexmûr ev bi salane bi zimanê xwe perwerde didin û dibînin. Êrişên li ser zimanê Kurdî, em şermezar dikin. Li wargehê bi fikrên Rêber Apo zarokên me tên perwerdekirin. Bê gûman zor û zehmetiyên vê yekê jî hene, ji ber ku yek ji cihê herî girîng ê wargehê qada perwerdeyê ye. Bi zimanê xwe xwendin û perwerdekirin, serkeftina herî mezin e.”

‘Zêde bikaranîna teknîkê xeter e’

Ergen da diyarkirin ku îsal di xwendevanan de lewazî çêbûne û sedema wan jî wek mamosta û malbat destnîşankir û wiha pêde çû: “Xwendevan pira di navbera mamosta û malbatê de ye. Ji bo wê jî divê mamosta û malbat hevdû temam bikin. Lewaziyên ku di xwendevanan de çêbûne, sedema xwe ji zêde bikaranîna telefon, sernesekinandina malbat û mamostayan tê. Di roja me ya îro de bikaranîna telefonê ketiye destê zarokên temen biçûk. ev jî bi xwe re xeteriyek mezin tîne. Lê bi destpêkirina dema nû re emê wek qada perwerdê pêngevên nû bavêjin û wan lewaziyan bidin derbaskirin. Zarokên me divê nebin xizmetkarê teknîkê. Divê malbatên me di derbarê rewşa zarokên xwe de, bibin xwedî berpirsyartî û bi zarokên xwe re bibin alîkar. Divê telefonan ji wan qût bikin, televîzyonê kêm bikin û nehêlin heta derengiya şevê bimînin li kolanan. Divê em bizanibin ku em bi saya şehîd û Rêber Apo hene. Ji bo ku em bikarin bibin layiqê wan divê em xwe pêşbixin.”

‘Mamosta, malbat û xwendevan divê hevdû temam bike’

Endamê Rêveberiya dibistana amadeyî ya Şehîd Koçerîn Mamosta Mûstafa Ergen di dawiya axaftinên xwe de anî ziman ku bêhndana 15 rojî ne ji bo razanê ye û divê xwendevan, malbat û mamosta di van rojan de kêm û kurtiyên xwe lêkolîn bikin û wiha axaftinên xwe domand: “Divê xwendevanên me li xwe vegerin û kêmasiyên xwe bizanibin û derbasbikin. Li gor salên berê rêjeya xwendevanan a waneyan ketiye û ev yek divê piştî bêhndanê bên derbaskirin. Ev yek bi malbat, mamosta û xwendevan dikare bê derbaskirin. Xwendevanên ku waneyên wan ketîn, divê li ser waneyên xwe bişixûlin û kêmaniyên xwe derbas bikin. Malbat divê hîn zêdetir xwedî li zarokên xwe derbikevin. Mamosta jî divê hîn zêdetir perwerdeyê li xwendevanan bidin hezkirin û bidin fêmkirin. Bi hevdû temamkirina malbat, xwendevan û mamosta wê di dema nû de encamên hîn baştir derbixe holê.”