‘Karkirin pîroze’

Jinên wargehê têkildarî dewreya perwerdeya dirûnxanê peyîvîn û diyar kirin ku ji bo her jinek bikaribe xwe li ser piyan biger pêwîsete xwe fêrî her karî bike. Her çi kar be eger jinek bixwaze dikare bi serkeftî pêkbîne. Ji ber ku karkirin ne şerme pîroze.

XURBET TALLÎ - ROJEV

Li Wargeha Penaberan a Mexmûrê dewreya perewerdeya dirûnxanê ya ku di bin sêwana Wexfa Jinê de hatî destpêkirin du hefte li paş xwe hişt. Di vê dewreyê de 15 jin xwe fêrî karê dirûnê dike. Têkildarî karê dirûnxanê Emîne Şaxî ku bi salên dûr û dirêj bi karê dirûnxanê ve mijûl dibe, di vê dewreya perwerdê de wekî mamoste ders dide komek jin. Her wiha Eylem Kara jî ku nû di dirûnxanê de xwe fêrî karê dirûnê dike, ji rojnama me re axivîn.

Perwerdeya li dirûnxanê ji her jinekê re vekiriye

Emîne Şaxî di destpêka axaftina xwe de bal kişand li ser dewreya perwerdê ya ku li dirûnxanê hatî destpêkirin û wiha got: “Ev demek dirêje ez di vê dirûnxanê de kar dikim, karê ku em dikin jî di bin sêwana Wexfa Jin de tê birêvebirin. Ji ber ku piranî xwendevan û xebatkarin, ji bo wê em her sal di bêhndana havînê de dewreyên perwerdeya dirûnê didin destpêkirin. Ev dewreyên perwerdê yên ku em li dirûnxanê didin destpêkirin, ji bo her jinekê vekiriye. Me vê havînê jî pêwîstî bi dewreyekê dît ji bo wê me ev dewre da destpêkirin. Destpêka perwerdê ji ber pileya germahiyê ya zêde me nekarî em roj perwerde bidin me şev dida. Lê di van demên dawî de kêm jî be hinek rewşa hewayê hêniktir bûye û êdî em roj perwerdeya xwe dibînin.”

‘Em heftiyê şeş rojan perwerde didin’

Emîne di dewama axaftina xwe de diyar kir ku ew heftiyê şeş rojan perwerde didin û wiha pêde çû: “ Em tenê roja înê nayên perwerdê, ji ber ku karê me girêdayî elektirîkê ye em neçarin karê xwe li gorî demjimêrên ku elektirîk heyî eyar bikin. Ji bo wê jî em di demjimêr 14:00’an de destbi perwerdê dikin heta 16:00’an didome. Berê ji aliyê NY û saziyên xêrxwaz ve carnan alîkarî dihat dayîna vê saziyê, wan deman me dikaribû ku karê xwe bi awayek hîn baştir bimeşînin. Lê niha ji ber bêderfetiya heyî em nikarin li gorî tê xwestin kar bimeşînin, rûxmê hemû bêderfetiyan jî me ti carî karê xwe ne rawestandiye.”

Emîne Şaxî ev bang kir: “Banga me ji bo hemû jinan ewe ku xwe fêrî hemû karan bikin û her wiha pêşiya zarokên xwe jî vekin ku ew jî di saziyên wek dirûnxane, atolye, Kevana Zêrîn, Çand û hwd de cih bigre.”

‘Beriya ku em bên vêderê me tiştek nedizanîn, lê niha em kirasan didirûn’

Her wiha Eylem Kara ya ku di vê dewreyê de xwe fêrî karê dirûnê dike axivî û got: “Beriya ku em bên vêderê me tiştek nedizanî, lê niha em gihiştin astek wisa ku em êdî dikarin kirasan bidirûn. Ez di wê hêviyê de me ku bi demê re emê hîn zêdetir fêrî tiştên nû bibin. Armanca me ewe ku dema em baş fêrbûn, em bixwe dewereya perwerdê ji jinan re vekin. Banga min ji bo hemû jinên wargehê ewe ku di malên xwe de ne rûnin, kîjan jin dikare çi karî bike bila bike. Ji bo ku bikaribe hem zarokê xwe xwedîbike û hem jî bikaribe xwe li ser lingan bigre pêwîste xwe fêrî hemû karekê bike. Ne tiştek wisaya ku divê di saziyekê de yan li cihek din wî karî bike, dikere di mala xwe de jî wî karî bike. Ji ber wê jî karkirin ne şerme berovajî karek pîroze.”