Koalîsyona Navnetewî ya li dijî DAIŞ’ê qetilkirina zarokên li Hesekê şermezar kir

Fermandarê Koalîsyona Navnetewî ya li dijî DAIŞ’ê  John Brennan li dijî qetilkirina 4 zarokên li Hesekê di êrişa hewayî de hatîn qetilkirin bertek nîşan da û êriş şermezar kir. Brennan diyar kir ku SÎHA’yan li Hesekê komek keçên ciwan ên voleybolê dilîstin hedef  girtiye.

Fermandarê Koalîsyona Navnetewî ya li dijî DAIŞ’ê  John Brennan bertek nîşanî êrîşên li ser Bakur û Rojhilatê Sûriyeyê da. Brennan têkildarî êrîşa 18’ê tebaxê ya li Hesekê bi balafira bêmirov a bi çek (SÎHA) daxuyaniyek da.

Brennan wiha tîne ziman: “Êvara 18’ê Tebaxê, sîstema firokeyên bêfirokevan ên çekdar komek keçên ciwan ên ku voleybolê dilîstin kir hedefa êrîşên xwe. Ew zarok di çarçoveya bernameyekê de bi awayekî çalak ji aliyê Neteweyên Yekbûyî ve li Hesekê tê piştgirîkirin û perwerdekirin.  Ez vê êrişê şermezar dikim. Em ji malbatên şehîdan re sersaxiyê dixwazin.

Zêdebûna şer û pevçûnên leşkerî li vê herêma ku metirsiya DAIŞ’ê lê berdewam e, li bakurê Sûriyê tevliheviyê çêdike . Em bang li hemû aliyan dikin ku demildest rageşiyê kêm bikin û dawî li çalakiyên ku destkeftiyên Koalîsyona li dijî DAIŞ’ê bidest xistiye dixe xeterê, bînin.”

Fermandarê Koalîsyona Navnetewî ya li dijî DAIŞ’ê  John Brennan destnîşan nekiriye ku êriş ji aliyê kê ve pêk hatiye.

Di roja 18’’ê Tebaxê de ji alî balafirên bêmirov ên dewleta Tirk ve li Hesekê dibistanek hate hedefgirtin û di encama êrîşê de 4 zarok şehîd bûbûn û 11 kes jî birîndar bûbûn.