Wezîrê Karê hundir ê Hikûmeta Herêma Kurdistanê demek beriya niha bi daxuyaniyekê ragihandibû ku hêza wan wek hikûmet, têrê nake ku pêşiya êrişên dewletên dagirker bigirin.
Her
çiqas ev daxuyanî ne cihê baweriyê jî be, lê em wisa bihesibînin ku hêza wan
têrê nake ku pêşiya êrişên ji derve ber bi hundir ve pêktên, bigirin. Lê tê
zanîn ku êriş tenê ji derve ber bi hundir ve pêk nayên. Ma balafirên keşfê yên
dewleta Tirk a faşîst ji Bakur tên êrişî Şengal, Mexmûr, Silêmanî û Herêmên
Parastina Medya dikin? Ne, wek tê zanîn ku baregeha wan balafiran li Hewlerê,
di dibin parastina PDK’ê de ye. Dîsa tê zanîn ku îstîxbarata wan deveran jî ji
aliyê PDK’ê ve tê dayîn. Ma hikûmeta herêmê di guhê ga de raketiye ku nizane?
An henekên xwe bi eqlê welatiyan, gelê Kurd dikin? Dîsa ma ew qas bêhêze ku
nikare pêşiya wan êrişên namerdane bigire? Em wisa bigirin dest ku hêza wan têrê nake pêşiya îstîxbarat dayîn û êrişên balafirên keşfê
bigire. Lê hikûmeta herêmê dikare pêşiya êrişên ku li Silêmanî û Hewlerê, li
hember welatparêzên ku ji Bakur û Rojhilatê Kurdistanê xwe spartin Başûr,
bigire. Ma qey nikare? Eger nikare, wê demê hikûmet ji bo çiye? Madem nekare
pêşiya êrişên ku derve û hundir pêktên bigire, wê demê çima heye? Çima navê
hikûmet li xwe kiriye? Eger hêz tunebe, wê demê tu ferqa reşreşeyek (bostan
korkuluğu) û hikûmeta herêmê tuneye. Reşreşe jî bikêr tê, rol dileyîze. Lê
hikûmeta herêmê ne di çareseriya pirsgirêkên navxweyî yên civakê û ne jî pêşî
girtina êriişên nemerdane de rola xwe dileyîze. Ne ku nikare. Nav hikûmeta
herêma Kurdistanê ye, lê heta hikûmet di bin siya xanedana barzanî û çeqelên ku
li derdora wê xanedaniyê de kom bûne dernekeve, ne pêkane ku ji bo herêmê jî ji
bo tevahî Kurdistanê jî tiştek erênî bê kirin. Ev heqîqeteke ku nayê
înkarkirin.
Jixwe
qasî ev daxuyanî ne cihê baweriyê be, ewqas jî manîdare. Ji ber ku ev daxuyanî,
tam jî di dema hikûmeta Iraqê biryar da ku leşkerên xwe li ser sînorê Bakur û
Rojhilatê Kurdistanê bicih bike de, hat dayîn. Divê mirov guman nêzîkî vê
biryarê jî bibe. Ji ber ku her çiqas bin navê pêşî li girtina êrişên dewletên
faşîst biryar hatibe girtin jî, armanca wan ne pêşî li girtina êrişan e. Eger
bi rastî jî rast û dûristbûya wê destpêkê ji hundir ve destpê kiriban. Ji ber
ku eger gotin di cih de be, diz di hundirê malê de ye. Yanî wekî me li jor anî
ziman ji hundir ve jî êriş pêktên, hem ji aliyê balafirên keşfê ve, hem ji erdê
ve bi destê MÎT’ê reşkujî pêktên û hem jî baregehên hundir (Tirk) komkujiyê
pêktînin. Ma qey baregehên Tirkan ên Bakur, ew komkujiya turîstên Ereb a Perexê
pêkanîn? Tevahî cîhanê dît ku baregehek hundir a dewleta faşîst ew komkujî
pêkaniye. Hem em ferz bikin ku ev biryar ji bo pêşî li girtina êrişên
dagirkeran hatiye girtin û pêşî li êrişên ku bejahî tên jî asteng kir. Ê baş e,
êrişên hewayî wê çawabin? Wê çawa pêşiya êrişên hewayî bigirin? Ma qey
balafirên şer û helîkopter ji bejahiyê ve derbasî xaka Başûrê Kurdistan û Iraqê
dibin? Ka bêjin hûn ê çawa pêşiya wan bigirin? Dê em wisa bihesibînin ku we,
pêşiya balafir û helîkopterên ku ji derve jî tên girtin. Baş e, hûn ê çawa
pêşiya êrişên hundir bigirin? Lewra divê mirov guman nêzîkî vê biryarê bibe. Ji
ber ku di vê derê de rast û dûristî tuneye. Vê derê armanc ne parastina xaka
Başûrê Kurdistan û Iraqê ye.
Bager Ronî
0 Yorumlar