Li Eyn Îsa wesayîtek hate bombebarankirin û 2 endamên Hêzên Ewlekariya Hundirîn şehîd bûn

Hêzên Ewlekariya Hundirîn ragihand ku di êrişa hewayî ya li dijî wesayîta li Eyn Îsayê de, 2 endamên wan şehîd bûn û 2 jî bi giranî birîndar bûne.

Balafireke bêmirov a bi çek a dewleta Tirk a dagirker li nêzî Kampa Koçberên Girê Spî wesayîtek hedef girt.

Hêzên Ewlekariya Hundirîn a Bakur û Rojhilatê Sûriyê têkildarî hedefgirtina wesayîtê daxuyaniyek da.

Di daxuaniyê de ev agahî tên dayîn:

“Di bombebarana dewleta Tirk a dagirker a li Eyn Îsayê de 2 endamên hêzên me şehîd bûn.

Ji ber bêdengiya navneteweyî li hember êrışên dubare yên dagirkeriya Tirk li ser herêmên me, êrişên dewleta Tirk a dagirker berdewam dikin. Vê sibehê balafirên bêmirov hêzên me yên li Eyn Îsayê dema ku erka xwe pêk dianîn, kirin hedef. Di encamê de endamên me Beşar Mihemed Elî Bozan û Cîhan Mihemed Mistefa şehîd bûn, 2 endamên me jî bi giranî birîndar bûn.

Ev êriş erka me ya parastina gelê me asteng nake, em ê di oxira wê de tiştên giranbiha feda bikin.”