Xazî Feysel: Ev pêvajo derfetekî zêrîne ji bo Kurdan

 Fermandarê Hêzên Xwebexş yê Pêşmergeyên YNK’ê ya Herêma Mexmûrê Xazî Feysel, êrişên dewleta Tirk ên li dijî Bendava Tişrînê şermezar kir û da zanîn ku Kurd di pêvajoyek zêrîn re derbas dibin û Kurd bi êrişan tune nabin.

Armanc Herekol

Fermandarê Hêzên Xwebexş yê Pêşmergeyên YNK’ê ya Herêma Mexmûrê Xazî Feysel têkildarî êrişên dewleta Tirk ên li dijî Rojavayê Kurdistanê û pêvajoya niha ji Rojnews’ê re axivî û bang li tevahî aliyên Kurd kir da ku yekitî û yekrêziya xwe çêbikin.

‘Li Rojava, roj li me hildaye’

Xazî Feysel di destpêka axaftinên xwe de ragihandina azad ji ber nûçe, serkeftin û rojeva rast ya Rojavayê Kurdistanê belavî cîhanê dike minetdariyên xwe anî ser ziman û got: “Ev pêvajo, pêvajoyekî hestiyare. Di nîv sedsala borî de ev derfeta 4’ane ku dikeve destê gelê Kurd. Li gor min ev derfeta vê carê, derfetekî çareseriyêye û gelek girînge. Ji bo wê jî divê tevahî rêveberiyên her çar parçeyên Kurdistanê bi hev re yekbin û pişta hev bigirin. Divê yekbin û bi yek peyamî bi cîhanê re baxivin. Divê yekitiyek wisa bi hev re bikin ku xwîna şehîdên pêşmerge, gerîla û şervanên Kurdan vala neçe. Ji bo parastina xak û gelê Kurd, me gelek şehîd û qurbanî dane. Îro rojekî pir girînge. Li Rojava, roj li me hildaye. Divê em di ferqa vê derfetê de bin. Divê Kurd gelekî hesas nêzî pêvajoyê bibin. Li dijî dagirkerên Tirk divê em bibin yek.”

‘PDK bila rupelek nu ji xwe re veke’

Feysel di nava axaftinên xwe de qala Kurdan kir û destnîşan kir ku gelê Kurd aştî, azadî û demokrasiyê dixwaze û wiha pêde çû: “Em ne li dijî Ereb, Tirk û Farisanin. Em wek gelê Kurd, gelekî aştîxwazin. Tê zanîn ku Serok Bafil bang li Mesûd Barzanî kiribû da ku li gel Mazlûm Ebdî rune. Van rojan civînek ya Mesûd Barzanî û Mazlûm Ebdî çêbû. Ev yek cihê kêfxweşiyê ye. Ji bo me rojekî nu ye. Derfetek dîrokî li pêşiya me ye. PDK tê zanîn li gel dewleta Tirk cih digire, em dibêjin werin rupelek nu ji xwe re vekin û li gel Kurdan ango li gel Mazlûm Ebdî û Bafil Telebanî cih bigirin. Gelê Kurd pêwistî bi yekrêziyê heye.”

‘Bi şer em tune nabin’

Fermandar Xazî di berdewamiya axaftinên xwe de bal kişand ser êrişên li dijî berxwedêrên li Bendava Tişrînê û ev peyam da: “Em rojane berxwedana Bendava Tişrînê dişopînin. Rojane dewleta Tirk a dagirker êrişî xelkê me yê di berxwedanê de dike. Gelek şehîd çêbûne. Duh û îro jî êrişî sivîlên li ser bendavê kirin. Dewleta Tirk ti caran dest ji vê dijmintiya xwe bernade. Dewleta Tirk çareserî û serkeftina xwe di şerê li dijî Kurdan de dibîne. Nexêr, bi şer em tune nabin û vîna me jî na qede! Wek gerîla, pêşmerge û şervan em çiqas xwîn birêjin ji bo me xizmeta gele. Em ji bo gelê xwe xwîna xwe dirêjin. Wê êrişên dewleta Tirk ên li dijî gelê me yên Rojava bi encam nebe, wê sernekevin. Em heta dawî li gel xelkê xwe yên Rojava ne.”

‘Divê em yekgirtî bin’

Fermandarê Hêzên Xwebexş Xazî Feysel axaftinên xwe bi van gotinan dawî kir: “Divê hemu kes bizane, em li dijî teror û dagirkeranin. Em ne netewekî wisa ne ku ji şer hezbikin. Em dixwazin di nav aştî û azadiyê de bijîn. Di pêvajoya Mam Celal, Heval Apo, Heval Mazlûm û Heval Cemal de jî me daxwaza aştiyê dikir û em niha jî aştiyê dixwazin. Bi şer çareserî nabe, lê ev xwîna ku em dirêjin ji bo gel û welatê me ye. Em bi serbilindî şehîdan bi bîr tînin. Carek din ez peyama xwe zelal dibêjim; divê em yekgirtîbin. Bi yek ziman û peyam tevbigerin. Ev pêvajo ji bo me derfetekî zêrine. Divê em vê derfetê baş bikar bînin.”