Şehîdê Ked û Demokrasiyê Hecî Yusif Gundikremoyî hat bibîranîn

Li Wargaha Penaberan a Mexmûrê Hecî Yusif Gundikremoyî yê ku di 2’Nisana 2024’an de jiyana xwe ji dest dabû, wek Şehîdê Ked û Demokrasiyê hat îlan kirin.

Li Wargaha Penaberan a Şehîd Rustem Cûdî (Mexmûr) hişedarê Navenda Çand û Hunerê Hecî Yusif Gundikremoyî yê ku di 2’Nisana 2024’an de di encama nexweşiyekê de jiyana xwe ji destdayî, wek Şehîdê Ked û Demokrasiyê hat îlan kirin.

Merasîma bîranînê li Saziya Malbatên Şehîdan a Mexmûrê bi amadebûna malbat û xelkê wargehê û bi girtina deqeyek rêzgirtin ji bo tevahî Şehîdên Azadiya Kurdistanê destpê kir.

Piştî rêzgirtinê endamê Navenda Çand û Hunerê ya Mexmûrê Xelîl Hilalî li ser ked û jiyana Şehîd Hecî Yusif axivî û wiha got: “Hevalê me Hecî xwedî ked û têkoşînek mezine. Di nava gelek xebatên cûda yên wargehê de cihê xwe girtiye û kedek ya wî ya mezin heye. Heta dawî bi Serokatî, rêxistin û şehîdên xwe ve girêdayî bû. Bavê şehîd û şervana ne. Hêjayê Şehîd bûnê ye.”

Li ser navê malbatê jî kurê Şehîd Hecî Yusif Gundikremoyî, Bêwar Gundikremoyî axivî û wiha pêde çû: “Li ser bavê xwe axaftin û keda wê vegotin ji bo min gelek zehmete. Ji ber ku kedek mezin ya 65 salan li pey xwe hêla. Ti caran teredûdek cûdatir jiyan nekir û di rêya xwe de safî bû. Hem wek malbat hem ji wek civak em xwedî şehîd û şervanin. Bavek di hemû kêliyên jiyana xwe de li ser xet û têkoşîna şehîd û şervanên xwe meşiya ye û di meşa xwe de jî kedek mezin daye. Em bi hêza bavê xwe, xwe li ser lingan digirin. Emê heta dawî şopdarê şehîdên xwe bin.”