Hunermenda Kurd Nûarîn: “Divê PDK, Malbata Barzanî û hemû rêveberiya Başûrê Kurdistanê yên ku di van leyîstokên qirêj de cihê xwe digirin dest ji van leyîstokan berdin, ji ber ku ev yek nayê qebûl kirin û ji bo wan şermezariyekî mezine.”
Xurbet Tallî
Hunermenda Kurd Nûarîn têkildarî êrişên dewleta Tirk a bi
hevkariya PDK’ê re li ser pêşengên gelê Kurd û tevahî Kurdistanê dimeşînin ji
rojnameya me re axivî.
‘Ji vî gelî lêborînê bixwaze’
Hunermend Nûarîn di destpêk axaftinên xwe de êrişên
dewleta Tirk yên li ser pêşeng û qehremanên gelê Kurd tê meşandin, her wiha
xiyaneta PDK’ê ya li hemberî gelê Kurd bi tûndî şermezar kir û wiha got: “Gelek
dijminên Kurdan hene, mirov dikare bêje bi qasî dostên me ewqas dijminên me jî gelekin.
Lê dema mirov dibêje dijmin, di serî de dewleta dagirker a Tirk û gelek
dewletên ku li hemberî van êrişan xwe ker, kor û lal kirine ku naxwazin di vî
alî de bêdengiya xwe xirb bikin tê bîra mirov. Lê tişta ku ji aliyê gelê Kurd ve
nayê qebûlkirin û mirov naxwaze bîne ziman jî ewe ku kesên em dibêjin birayên
me ne, ji xwîna me ye di nava van êrişên qirêj de cih digirin û hevkariya
dewleta Tirk a dagirker dikin ku di serî de Malbata Barzanî PDK ye. Mirov çawan
dikare xiyanetê li gelê xwe, li xwişk û birayê xwe bike? Ev zarokên ku
têdikoşin, ji bo her çar aliyê Kurdiyanê ye. Lê çawan dibe ku mirov piştgiriyê
nede vê yekîtiyê û xiyanetê li gelê xwe bike? Dema mirov vana tîne ziman jî dilê
mirov di êşe, ji ber ku mirov dizane dijmin dijmin e, qaşo tû dibêjî ez Kurdim
lê bi xwe xiyanetê li xwişk û birayên xwe bikî. Em ne tenê wek hunermend, wesfê
me çi dibe bila bibe em dibêjin bila êdî PDK dest ji van lîstikên xwe yên qirêj
berde û ji vî gelî lêborînê bixwaze. Jixwe êdî bi gotinan jî lêborîn nayên
qebûl kirin, ji ber ku xiyanetên gelek mezin kirine. Divê ji bo yekîtî,
serkeftin, azadiya gelê Kurd û azadiya Serokê gelê Kurd di nava xebatan de bin
ku bikaribin xwe bidin efû kirin.”
‘Em vê mîsyona xwe bi cih bînin’
Nûarîn di dewama axaftinên xwe de îşaret bi dagirkeriya
dewleta Tirk jî kir û wiha pêde çû: “Dewleta Tirk a faşîst serî li her rê û
rêbazên qirêj da, lê gelê Kurd bi têkoşîna xwe, bi gerîla û qehremanên xwe ev
lîstikên wan vala derxistin. Îro dixwazin van lîstikên qirêj bi destê
rêveberiya Başûrê Kurdistanê, gelê Kurd, pêşneg û qehremanên gelê Kurd tine bikin. Gelê Kurd bi salane li berxwe
dide, qehermanên gelê Kurd bi salane têkoşîn dikin, ewqas destkeftiyên ku me li
her çar aliyên Kurdistanê di serî de li Rojavayê Kurdistanê bidestxistine,
pêwîste em xwedî lêderbikevin ku
bikaribin yekîtiya xwe avabikin. Pêwîste di vî alî de çi dikeve li ser
milê me, em bi hevre pêk bînin. Divê em di her alî de xebat bidin meşandin ku
em bikaribin van lîstikên qirêj vala derbixin. Her wiha em bikaribin hem Serokê
xwe, hem gelê xwe û hem jî welatê xwe azad bikin. Di aliyê mîsyona hunermendan de
Rêber Apo digot; ‘Hunermend pêşeng û wijdanê vî gelî ye’, divê em van gotinan
ji bîr nekin. Eger Rêber Apo mîsyonek bi vî awayî daye me, pêwîste em vê
mîsyona xwe bi cih bînin. Divê em di her xebatê de cihê xwe bigirin. Ji bo em
bikaribin gelê xwe şiyar bikin û tevlî nava çalakiyan bikin, ev platform be yan
medya civakî be, çi dibe bila bibe divê em di nava hewildanan de bin. Wek
hunermend em dikarin bi rêya hunera xwe gelek karan bikin. Mînak, her
hunermendek dikare bi stiranên xwe, bi şano, sînema, wêne, govend û hwd dikarin
van lîstikên qirêj vala derbixînin.”
Hunermenda Kurd Nûarîn bi van gotinan dawî li axaftinên
xwe anî: “Banga me ji bo tevahî gelê Kurd bi taybet ji bo hunermendan ewe ku em
wek hunermend, jin, welatparêz û dostên gelê Kurd di her alî de, di her
platforman de nêrînên xwe bînin ziman ku em van êrişan qebûl nakin û bi tûndî
şermezar bikin. Divê PDK, Malbata Barzanî û rêveberiya Başûrê Kurdistanê yên ku
di van lîstikên qirêj de cihê xwe digirin dest ji van lîstikan berdin, ji ber
ku ev yek nayê qebûl kirin û ji bo wan şermezariyekî mezine.”
0 Yorumlar