RÊBER APO BINGEHÊ PERWERDEYA RAST E

Komîteya Perwerdê ya Xweser bi tevlîbûna 120 delegeyan 6. Konferansa xwe lidarxist. Mamoste Hezar Nerexî têkildarî konferansê got: “Di konferansê de rewşa perwerdê, xwendevan, mamoste û malbatan hatin nirxandin. Di konferansê de diyar bû ku tekane rêya perwerdeyek bi tendurist û azadiya jinê, mîsogeriya azadiya fîzîkî ya Rêber Apo ye.”

Armanc Herekol

Di 25’ê Tebaxê de li Wargeha Penaberan a Şehîd Rustem Cûdî (Mexmûr) bi tevlîbûna 120 delegeyan 6. Konferansa Komîteya Perwerdeya Xweser hat li darxistin. konferans bi kelecanek mezin destpêkir û bi nîqaş, nirxandin û pêşniyarên dewlemend, bi serkeftî dawî bû.

Mamoste Hezar Nerexî têkildarî naveroka 6. Konferansa Komîteya Perwerdê ya Xweser, ji rojnama me re peyivî û anî ziman ku ew bi saya Rêber Apo û keda şehîdan heta vê astê hatine.

Armanc azadiya fîzîkî ya Rêber Apo bû

Hezar Nerexî di destpêka axaftinên xwe de 6. Konferansa Komîteya Perwerdê ya Xweser diyarî Rêber Apo û tevahî jinên şoreşger kir û got: “Bi tevlîbûna 120 delegeyan, me konferansa xwe li darxist. Di pêvajoyek wisa girîng de, li darxistina konferansek wisa ji bo me cihê kêfxweşiyê ye. Bi dehan mêvan jî tevlî konferansa me bûn û ji bo wê em şanazbûn. Armanca me ya sereke mîsogerkirina azadiya fîzîkî ya Rêber Apo bû.”

Keda Rêber Apo û şehîdan ji bîr nekin!

Nerexî diyar kir ku perwerde ji bo her netew û civakê hêmana bingehîne û wiha pêde çû: “Perwerde, yek ji lingên herî girîng ê civakê ye. Ji ber ku civakek bê perwerde, civakek bê rêxistinkirî ye. Wek wargeh jî, em pir bi şansin ku bi zimanê zikmakî perwerde didin û dibînin. Hêza me ya sereke perwerdeya me ye. Ger em perwerdê esas negirin, wê di hêla jiyanî û siyasî de gelek lewazî û kêmaniyên me rûbidin. Bi saya Rêber Apo û şehîdan, em niha bi zimanê xwe perwerde dibînin. Ev yek xeyalê tevahî Kurdan e. Ji bo wê divê em ti caran Rêber Apo û şehîdên ku canê xwe di vê rêyê de feda kirî ji bîr nekin. Wan şehîdan çand, ziman, nasname, hebûn û vîna me parastin. Ger em wan ji bîr bikin, emê nebin xwedî jiyanek azad.”

Ji bo pêşxistinê nîqaş kirin

Hezar di nava axaftinên xwe de da zanîn ku di konferansê de perspektîfên Rêberê Gelê Kurd Abdullah Ocalan ên li ser perwerdê hatin xwedin û wiha behsa naveroka konferansê kir: “Raporên kar û xebatên du salan hatin xwendin. Xebatên du salan hatin nirxandin, rexne û rexnedayîn derketin pêş. Her wiha taybet tecrîda girankirî ya li ser Rêberê Gelê Kurd Abdullah Ocalan hat şermezarkirin. Şert û mercên Îmraliyê hatin nirxandin û ji bo ku tecrîd bê şikandin, pêwistî bi çi heye hatin gotûbêjkirin. Rewşa perwerdê, mamosteyan, xwendevanan û malbatên xwendevanan hatin nirxandin. Kêm û kurtiyên ku di perwerdeyê de hatine jiyankirin, hatin rexnekirin û alternatîf hatin avakirin. Bi giştî baş derbazbû, li ser bingehê pêşxistinê nîqaş hatin meşandin. Plansazî ji bo demê pêş hatin girtin.”

Herî dawî Mamoste Hezar Nerexî diyarkir ku biryarên hatine girtin û rexneyên ku hatine kirin, li ser sekinîn çêbibe û tekane rêya perwerdeyek bi tendurist û jiyanek aram, azadiya Rêber Apo ya fîzîkî ye.