Li Mexmûrê Şehîd Viyan û Bahoz hatin bi bîranîn

Li Wargeha Mexmûrê gerîlayên HPG û YJA-Star’ê Viyan Ozgur (Serkeftin Demîr) û Bahoz Çiya (Erdal Marangoz) ku li cih û demên cûda şehîd bibûn, bi merasîmekî girseyî hatin bi bîranîn. Di merasîmê de malbata Şehîd Viyan got: “Em wek malbat pir bi şansin ku Viyan keça me ye. Keça min xeta berxwedanê hilbijartiye û li ber xwe daye. Em wek malbat bi keça xwe şanazin.”

Gerîlayên HPG û YJA-Star’ê Viyan Ozgur (Serkeftin Demîr) ku di 21’ê Nîsana 2023’an de li Zapê şehîd bibû û Bahoz Çiya (Erdal Marangoz) ku di 2’ê Gulana 2023’an de li Mêrdînê şehîd bibû, li Wargeha Penaberan a Şehîd Rustem Cûdî (Mexmûr) bi merasîmekî girseyî hatin bi bîranîn.

Merasîm li Saziya Malbatên Şehîdan bi tevlîbûna sedan şêniyên wargehê û bi deqeyek rêzgirtin destpêkir. Piştî rêzgirtinê nasnameya gerîlayên şehîd hatin xwendin û li ser navê gelê amade, Hevşaredara Mexmûrê Fatma Bîlen axivî û di destpêka axaftinên xwe de sersaxî ji Rêberê Gelê Kurd Abdullah Ocalan, şervanên li serê çiya li berxwedidin û ji tevahî gelê welatparêz re xwest û got: “Em tevahî şehîdên komkojiya Hewlêrê bi bîrtînin û bejna xwe di ber keda wan de ditewînin. Heval Viyan zarokek a Mexmûrê bû û em bi şahadeta wê pir bi xemgînin. Dijmin di her hêlê de êrişî Tevgera Azadî dike. Em li rastiya xwe xwedî derdikevin û loma em berdelan didin. Em divê xwedî li şehîdên xwe derbikevin û li ser rêya wan bimeşin. Serê Rêber Apo û tevahî welatparêzan saxbe.”

Li ser navê malbata Şehîd Viyan bavê şehîd, Sedîq Spêrtî axivî û anî ziman ku xwedî li şehîdan derketin erka her welatparêzekî ye û wiha axivî: “Em di serî de dibêjin, serê Rêber Apo, şervanên serê çiya û tevahî gelê Kurd saxbe. Şehîd Viyan ne tenê keça mine, keça tevahî gelê Kurd e. Em wek malbat pir bi şansin ku Viyan keça me ye. Keça min xeta berxwedanê hilbijartiye û li ber xwe daye. Em wek malbat bi keça xwe şanazin. Li wargehê di her malekî de şehîd hene û ev yek ji bo me serbilindiye. Em dûbare dibêjin, serê Rêber Apo û tevahî malbatên welatparêz saxbe.”