‘Armanca êrişên dewleta Tirk di kesayeta jinê de tinekirina civaka Kurd e’

Endama Koordînasyona Meclîsa Îştar a Wargeha Penaberan a Mexmûrê Pakîstan Bîlen diyar kir ku armanca êrişên dewleta Tirk di kesayeta jinê de tinekirina civaka Kurde û got: “Pêvajoya ku li Rojhilata Navîn taybet li Kurdistanê tê jiyan ne ji rêzê ye. Em wek jin li kuderê dibin bila bibin pêwîste xwe perwerde bikin, rêxistin bikin, pêşbêxin ku civakê zana bikin.”

XURBET TALLÎ

Dewleta Tirk a dagirker bi her awayî ve berê xwe daye xaka Kurdistanê. Li gel êrişên xwe yên bi balefiran û bikaranîna çekên kîmyawî û bombeyên qedexekirî, di nava civakê de jî êriş û zextê li jinê dike. Rojane li seranserê bakurê Kurdistanê jin tên qetilkirin, li Rojhilat jin tên qetilkirin, li Rojava jinê tên revandin û destdirêjî lê tên kirin. Armanc di kesayeta jinê de civak û kêmenetewên ku li Rojhilata Navîn hene tine bikin.

Têkildarî vê yekê Endama Koordînasyona Meclîsa Îştar a Wargeha Penaberan a Şehîd Rustem Cûdî (Mexmûrê), Pakîstan Bîlen ji ajansa Rojnews re axivî.

‘Armanc di kesayeta jinê de tinekirina civakê ye’

Pakîstan Bîlen di destpêka axaftina xwe de êrişên ku li dijî jinan tên pêkanîn şermezar kir û diyar kir ku wê ev hêzên desthilatdar ti carî ne gihijin armanca xwe û got: “Dema em li giştî rewşa heyî temaşe dikin ev êrişên dewleta Tirk yên ku li Kurdistanê tên pêkanîn, armanca wan ya sereke di kesayeta jinê de tinekirina civaka Kurd e. Em dibînin li Bakûrê Kurdistanê rojek nîne ku jinek neyê qetilkirin yan jî rastî êrişan neyê. Li Tirkiyê her jina ku bikaribe li hemberî vê hişmendiyê têkoşînekê bike, ji bo bêdengkirina wê yan destdirêjî lê tê kirin yan jî tê dîlgirtin. Gotina Rêbertî ya ku dibêje ‘Sedsala 21’an sedsala jinê ye’ vê yekê bi awayek zelal radixe berçavan ku çima jin dibin hedefa êrişan.”

‘Şoreşa ‘Jin, Jiyan, Azadî’ bûye tirsa dilê dijmin’

Bîlen di dewama axaftina xwe de da zanîn ku dewleta Tırk têkoşîn û berxwedana jinan a di her qadê de ji bo xwe weke astengiyekê dibîne û wiha domand: “Rewşa ku em niha têde ne, şer û êrîşên ku li tevahî Kurdistanê tên meşandin ne ji rêzê ne. Bi taybet şoreşa ku di şexsê Jîna Emînî de li Rojhilatê Kurdistanê hatî destpêkirin yek ji wan mînakane ku li her derê belav bûye. Eger serhildana ku heyî bi berzkirina dirûşma ‘Jin, Jiyan, Azadî’ didome, ev diyardike ku astekî diyar ya jinan çêbûye. Şoreş û serhildanên ku bi taybet dibin pêşengtiya jinan de çêdibin, dewleta Tirk a dagirker ji bo xwe wekî astengiyekê dibîne. Dizanin sedsala 21’an sedsala jinan e. Ji bo xwe gihandina vê serkeftinê helbet jin di her alî de xwe perwerde û rêxistin dikin. Dewleta Tirk vê rêxistinbûna jinan hezim nake, ji bo wê êriş dike. Ji bo em bikaribin van rastiyên ku heyî derbixin holê, divê em wek jin hîn zêdetir têbikoşin.”

‘Çavkaniya berxwedanê fikir û felsefeya Rêbertiye’

Bîlen her wiha balkişand li ser têkoşîna gerîlayan û got: “Têkoşîna ku bi salane li serê çiyan tê domandin, ger di aliyê jinê de bê destgirtin mirov dikare bêje xwedî zanisteke, ji xwe de çênebûye. Ew hêz û vîna heyî çavkaniya xwe ji fikir û felsefeya Rêbertî digire. Niha ruxmê karanîna çekên kîmyawî, bi rojan, bi mehan bê ronahî û bê xwarin mayînê jî, lê ji ber ku fikir û felsefeyek heye, ev jî hêza berxwedan û têkoşînê dide.”

Pakîstan Bîlen di dawiya axaftina xwe de bang li jinan kir ku wek jin li kuderê dibe bila bibe pêwîste xwe perwerde bikin, rêxistin bikin, pêşbêxin ku civakê zana bikin û wiha bi dawî kir: “Divê di vê sedsalê de serkeftinê bi dest bêxin, yan dibe di dema bê de ev şans bi destê me nekeve.”