Li Zaxo; Xeta Netewa Demokratîk Hatiye Hedef Girtin

Gotina ku; "di osmanliyan de leyîstok xilas nabin" vegotina rastiya hişmendiya wan dike. Dewleta Osmanliyan xwe bi hişmendiya qirkirinê avakiriye û pêşde biriye. Di roja me ya îro de jî Dewleta Tirk û şefê faşîst Erdogan jî bi xeyalên ji nû de pêkanîna Osamanliya û bi hişmendiya Îttihat Terakî stratejiya wan ya bingehîn çî ye, neyartiya li hember Kurdane û li ser vê bingehê hebûna xwe di domînin. Ev 99 sale ji bo ku gelê Kurd qir bikin, tine û îmha bikin tiştek ne meya ku pêk ne anîne. Wê demê ez pirs dikim gelo hûn di roja me ya îro de ferqek dibînin? 

Bi hezaran salane gelê Kurd tên qetilkirin. Di dîroka Kurdan de roj nîne ku ne hatibin qetilkirin. Li ser xaka Mezopotamya ji şerê cîhanê yê yekemîn yê ku di sala 1914'an de hatibû destpêkirin heta roja me ya îro komkujî, talan, qirkirin, kuştin, wêrankirin, penabertî li ser gelê Kurd, Suryan, Ermenî, Asurî û kêm netewan her tim hatiye pêkanîn û tê pêkanîn jî. Bê guman komkujiya ku di 20’ê Tîrmehê de li Zaxo (Peraxê) li ser cihê seyrangehê ji hêla dewleta Tirk ya barbar ve pêkhat û di encama wê de 9 welatiyên Ereb jiyana xwe ji dest dan û 29 jî birîndar bûn, ne cara yekeme. Siyaseta ku şefê faşîst Erdogan li Kurdistanê û Rojhilata Navîn dixwaze pêkbîne, berfireh kirina dagirkerî û hişmendiya xwe ya osmanî ya nû ye. 

Ji bo ser navê Kurd- Kurdistanê pêşketin çênebe, têkoşîn û berxwedanî ava nebe her tiştê dikin. Em ji bîr nekin di komploya Navdewletî de Barzanî û PDK rolek mezin leyîstiye. 3'ê Tabaxa sala 2014'an de PDK gelê me yê Êzidî  radestî çeteyên DAÎŞ kir. Îro jî bi ser çeteyên DAÎŞ'ê Erdogan re xwîna Kurdan di rişîne. Belê eve yê ku xwîna me erzan dike? Wê demê ez jî dixwazim pirsek bikim, ji bo ku xwîna me erzan nebe, ti kes li ser xwîna me jiyan neke, rant neke em çidikin? Çend rondika di rişînin, çend belayan dixwînin û ji xwe re di rûnin?

Bê guman komkujiya ku li Zaxo (Peraxê) pêkhat gelek aliyên xwe hene. Pêwîstî pê heye ku mirov rast bixwîne û rast şîroveya wê bike. Bê guman bi awayekê plankirî ev komkujî hatiye pêkanîn. Ezê jî di aliyekê wê bigrim dest. Rêber Apo di gelê Kurd de şoreşa civakî, çandinî û demokratîk afirand. Ev yek jî ji bo demokratîkbûyîna Rojhilata Navîn hêzek mezin derxistiye holê. Her çiqasî ji hêla pergala baviksalarî ve dîroka mirovahiyê hatibe berovajî kirin jî lê her tim têkiliyek dîrokî di navbera gel, civak û netewan de heye. Di rastiya xwe de jî têkiliyek dîrokî di navbera gelê Ereb û Kurdan de heye. Bi paradîgmeya Rêber Apo ya Netewa Demokratîk re ji her deman zêdetir gelê Kurd-Ereb nêzî hevbûne û yekîtiyek di navbera wan de hatiye avakirin. Bê guman ev yek jî bi ked, têkoşîn û berxwedaniya Rêber Apo re hatiye avakirin. Di xeta netewa demokratîk de gelê Kurd-Ereb çiqasî hevgirtinek bi hêz, zanist pêşbêxin ev yek wê di Rojhilata Navîn de bandoriyek bi hêz  li ser civak, gel û baweriyên cuda jî çêbike.

Li Rojavayê Kurdistanê îttîfaqa stratejîk ya di navbera gelê Kurd-Ereb de avabûye wê li ser bingeha hişmendiya xeta netewa demokratîk çarenûsa gelên Rojhilata Navîn diyar bike. Wê demê mirov pir rehetî dikare bibêje ku komkujiya li Zaxo (Peraxê) ji hêla dewleta faşîst ya Tirk ve pêkhatiye, li hember xeta netewa demokratîk pêşketiye. Ji ber ku di nava civakan de hevgirtin, yekîtiyek civakî, siyasî, aborî, leşkerî avabibe wê tevahî plan û hesabên dewleta Tirk ya dagirker, faşîst têkbibe û xeyalên wê jî hilweşîne. Di rastiyê de xwast gelê Ereb dijberê gelê Kurd ango tevgera azadiya Kurd rake. Ji ber ku di rastiyê de netewa ku pêşengtî ji xeta natewa demokratîk re dike û wê bike jî gelê Kurd e.

Bertekên gelê Ereb li hember komkujiya Zaxo danyîn raber kirin, cihê şanaziyê ye. Ger ku îro hikûmeta Iraq li hember vê rewşê serî li Konseya ewlekariyê ya Neteweyên Yekbûyî da ev encama berxwedaniya gel e. Serkeftin di rêxistinbûyîn, yekgirtin, yekitî û berxwedaniya gel û gelan de ye.

GULAN AVRÊL - ROJEV