Endamên Konseya Ewlekariyê ya NY dewleta Tirk şermezar kir

Endamên Konseya Ewlekariyê ya Neteweyên Yekbûyî (NY) komkujiya dewleta Tirk a dagirker ya li gundê Perex ê Zaxo ku di encamê de 9 geştiyaran jiyana xwe ji dest dan û 33 kes jî birîndar bûn şermezar kirin.

Konseya Ewlekariyê ya Neteweyên Yekbûyî (NY) têkildarî komkujiya dewleta Tirk a 20’ê Tîrmehê li gundê Perex a Zaxo pêkanî civînek lidar xist. Di civînê de gelek nûnerên welatên cîhanê helwesta xwe li beramberî komkujiyê anîn ziman.

Nûnerê Emerîka di civîna Konseya Ewlekariyê ya Neteweyên Yekbûyî de ragihand ku Washington êrişa li ser Zaxoyê şermezar dike û got: “Kuştina xelkê sivîl qebûl nakin. Daxwaz dikin ku rêz ji bo serwerî û xaka Iraqê re bê girtin. Xelkê Iraqê şayenî pêşerojekê geşe.”

Di heman demê de Îmarat jî destnîşan kir ku li ser daxwaza Iraqê piştgiriya runiştina lezgîn dikin û ragihan: “Piştgiriya lêkolîn û tedbîrên Iraq pêktîne dikin. Tekezî li ser rêzgirtina li serwerî û yekparçetiya axa Iraqê dikin.”

Her wiha nûnerê welatê Îrlanda jî êrişa li ser Zaxo şermezar kir û got: “Hevxemiya xwe bi gelê Iraqê re parvedikin û piştgiriya serweriya Iraqê dikin.”

Nûnerê welatê Gabonê jî êrîşa li ser Zaxo û komkujiya li dijî sivîlan şermezar kir û got: “Êrîşên li ser sivîlan nayên qebûlkirin û binpêkirina yasayên navneteweyî ye.”

Nûnerê Hindistanê jî got: “Êrîşa li ser Zaxo eşkere binpêkirina serweriya xaka Iraqê ye. Divê rêz ji yekparçetiya xaka Iraqê re bê girtin. Em piştgiriya aştî û aramiya Iraqê dikin.”

Nûnerê Norwêcê jî daxwaz kir ku derbarê êrîşa Zaxoyê de lêkolîneke zelal were kirin.

Nûnerê welatê Gana daxwaz ji civaka navdewletî kir ku piştevaniya hewlên Iraqê ji bo lêkolînkirina êrîşa Zaxoyê bikin.

Di heman civînê de nûnerê Meksîka helwestên xwe wiha anî ziman: “Em dilgiraniya xwe û hevxemiya xwe bi gelê Iraqê re parve dikin. Armanckirina sivîlan binpêkirina yasayên navdewletî ye.”

Nûnerê Fransa diya rkir ku Parîs piştevaniya Iraq û xelkê wê dike.

Nûnerê Kenyayê ragihand ku armanckirina sivîlan li Zaxoyê binpêkirina yasayên navdewletî ye.

Nûnerê Rusyayê got: “Em piştevaniya ewlekarî û aramiya Iraqê dikin û rêz li serweriya wê digirin.”

Her wiha nûnerê Brîtanya jî got ku piştevaniya lêkolîna Iraqê ya derbarê êrîşa li ser Zaxoyê dikin.

Nûnerê Çînê jî daxwaz kir ku di lêkolînê de alîkariya Iraqê bê kirin.

Nûnerê Brezîlyayê jî eşkere kir ku binpêkirina serweriya Iraqê ne rewa ye.