CPT’iyê encama lêkolîna êrişa Bamernê ragihand

Rêxistina Tîmên Avakirina Aştiya Civakê ya Emerîkayê (CPT) encama lêkolînên li ser kuştina 2 zarokên li Bamernê ragihand. Li gorî CPT’iyê, zarok ji aliyê dewleta Tirk ve hatine qetilkirin.

Di 26’ê Gulana 2022’an li herêma geştiyariyê ya Zêwe ya Bamernê ya Amediyê di bombebarana dewleta Tirk a dagirker de 2 zarokên bi navê Yusif Hacî û Revend Hoşyar Muhsîn jiyana xwe ji dest dan û zarokek jî birîndar bû. Bi sedan kes li cihê festîvalê bûn û artêşa Tirk raste rast ji baregehên xwe yên di nava xaka Başûr de, xelkê sivîl da bû ber topan.

Piştî êrişê PDK’ê yek ser bûyer xist stûyê gerîlayên PKK’ê. Dije Terora PDK’ê wê demê ragihand ku êriş ji aliyê gerîlayên PartiyaKarkerên Kuristanê ve pêkhatiye. Piştî wê HPG’ê bi daxuyaniyek ragihand ku dewleta Tirk êriş pêkaniye, herî dawî gerîlayên azadiyê ji bo tolhildana her 2 zarokan çalakiyek dijî baregeha dewleta Tirk ya li Sîrê a ser bi Şeladizê pêkanî bûn.

CPT: Êriş ji aliyê dewleta Tirk ve pêkhatiye

Rêxistina Tîmên Avakirina Aştiya Civakê ya Emerîkayê (CPT) li ser bûyerê lêkolîn dabû destpêkirin û lêkolîna CPT’iyê bi encam bû. Li gorî CPT’iyê êriş ji aliyê dewleta Tirk ve pêkhatiye.

CPT’iyê bi daxuyaniyekê encama li ser êrişa Bamernê ku 2 zarok tê de jiyana xwe ji dest da bûn, ragihand. CPT dibêje; “Li gorî belgeyên bi destê me ketî û herêma ku êriş têde pêkhatî, derdikeve holê ku egera herî zêde êriş ji aliyê dewleta Tirk ve pêkhatiye.”

CPT’iyê di dewamê de balkêşa ser agahiyên xizmên zarokan dayî wan û wiha hate gotin; “Malbatên her 3 zarokan dibêjin, wê roja ku êriş pekhatî, hertim dengê balafirên bê mirov ên dewleta Tirk ku li ser wê herêmê digeriyan, dibihîstin. Yanî balafir li ser cihê festîvalê digeriyan, cihê festîval lê pêkhatî jî, tenê 800 metre ji baregeha dewleta Tirk ya li Bamernê dur bû.”

Di dewama daxuyaniyê de tê gotin; “Êrişa bi topan ya dijî cihê leyîstina zarokan û gerana balafiran di yek demî de bû. Gorî me bi qest festîval hatiye hedef girtin û xwestin ziyanên canî çêbibin.”

Di dawiyê de hate gotin ku çiyayê Metîna ku tê gotin top ji wir ji aliyê PKK’ê ve hatine avêtin jî, niha dibin desthilatdariya leşkerên Tirk û Hikumeta Herêma Kurdistanê deye.