LI ÎMRALIYÊ BERXWEDAN HEYE!

Li Îmraliyê her ku diçe tecrîd û êşkenceya li ser Rêber Apo giran dibe. Wek tê zanîn ji dîlgirtina Rêber Apo heta niha, timî hevdîtin dihatin qedexekirin û dijmin naxwaze gel û Rêber Apo ji hevdû agahî bigire. Ev polîtîkaya qijêr ya gel û Rêber Apo ji hevdû qutkirinê ji destpêka dîlgirtina Rêber Apo ve di meriyetê de ye. Armanca sereke ya vê polîtîkayê, tirsa komplogeran a ji hêza Rêber Apo bûye. Ji ber ku hêzên komploger di wê zanabûnê de ne ku gel bi Rêber Apo ve girêdayî ye. Lewma ev tecrîd û êşkenceya ku ev 25 salin di kesayeta Rêber Apo de tê pêkanîn, li ser tevahî gelên azadîxwaz û bi taybet jî li ser gelê Kurd dibînin.

Ev zêdeyî 3 salane ango 1154 rojin agahî ji Rêber Apo nayê sitandin. Ne malbat û ne jî parêzer nikarin hevdîtinê bi Rêber Apo re pêkbînin. Her roja ku Rêber Apo di bin wê tecrîdê de be, ewqas gelê Kurd jî di bin wê êşkenceyê de ye. Bi dîlgirtinê nekarin gel û Rêber Apo ji hevdû bidin qutkirin, niha jî bi rêbazên dijî mafê girtiyan nêzî Rêber Apo dibin û bi hincetên cezayê disiplînê çend heyvan carekî qedexeyên hevdîtinê didin Rêber Apo û bi vê yekî sucê xwe yê li hember Rêber Apo qaşo wek rewa didin nîşandan. Lê em van kiryarên namerdane bi binketina wan a li Herêmên Parastina Medyayê û binketina wan a di hilbijartinan de didin girêdan. Ji ber ku pergala AKP-MHP-PDK’ê di şerê li dijî gerîla de têk çû û di hilbijartinan de jî ev yek eşkere bû.

Herî dawî Dadgeriya Înfazê ya Bûrsayê, serlêdana parêzer û malbatan a ji bo hevdîtinê bersivand û Dadgeriyê diyar kir ku di 28’ê Adarê de Serokatiya Lijneya Disiplînê “cezayê disiplînê” li Rêber Ocalan biriye. Hat zanîn ku biryar di 12’ê Nîsanê de teqez bûye. Parêzerên Rêber Apo ev yek weke astengkirina hevdîtinê bi navkirin û em jî vê yekê wek Endamê Komîteya Rêveber a PKK'ê Dûran Kalkan gotî, ji bo astengkirina biryara ji nû ve darizandina DMME'yê vê dibînin. Biryara DMME'yê ya ji nû ve darizandina Rêber Apo vala derxistin û nehiştin ev biryar were pêkanîn. Dadgeha Mafê Mirovan a Ewropayê beriya çed salan ji bo ji nû ve darizandina Rêber Apo biryar dabû, lê biryara xwe bi cih ne anî. Konseya Ewropa, hikûmeta Tirkiyeyê, DMME, CPT, yanî NATO û dewletên Yekîtiya Ewropayê, her wiha Neteweyên Yekbûyî, hemû dewlet li gorî hev tevdigerin. Van komplogeran astengkirin ku Rêber Apo di sala 25'an de ji nû ve bê darizandin. Di vir de sûcekî hevpar heye. Ji ber ku gotina 'Li Îmraliyê tecrîd nîne û her tişt baş bi rê ve diçe', her wiha li ser van gotinan bêdengiya CPT, nîşan dide ku pişta wan qewîm e. Ev rêbaz li gor zagonên navdewletî yên girtiyan, sucekî mezine û divê ji aliyê CPT ve rastiya heyî bê eşkerekirin ku li girtîgehê tecrîd û êşkence heye.

CPT qaşo Komîteya Pêşîlêgirtina Êşkenceyan e, bûye parçeyek ji hikmetê û mirov dikare bêje bûye hevkarê tevahî bê mafiyên li girtiyan tên kirin. Rol û mîsyona ku dikeve li ser milê CPT çine û kiryarên ku niha dike çine, ger rastî jî edalet hebe divê niha CPT bê darizandin û hesaba vê bêdengiya xwe ya li hember Rêber Apo û girtiyên siyasî bide. Di pergala tecrîdê de heta niha ti guhertin nîne û her ku diçe jî ev suc tê dirêjkirin. Herî dawî CPT daxuyaniyek da û mirov dikare bêje li xwe mikurhat û got, 'Em organa rêveberiyê ne. Yanî organeke rêveberiyê ya ser bi Konseya Ewropayê ya girêdayî dewletan e. Em raporê didin wan. Eger ew bixwazin wê bê eşkerekirin, nexwazin wê neyê eşkerekirin. Erk û hêza me nîne ku em raporekê jî eşkere bikin'. Bi vê daxuyaniyê CPT bixwe eşkere kir ku bûye saziyek ser bi hikumeta AKP-MHP'ê, ji ber wê nikarin raporekê jî eşkere bikin. CPT dibêje ez Komîteya Pêşîlêgirtina Êşkenceyê me, gelo em jî pirs dikin, li Bakurê Kurdistan û Tirkiyeyê ewqas êşkence heye, girtî tên tacîzkirin û zilmek mezin heye, her wiha girtî bi awayekî gûman têne kuştin û înfazên wan tên şewitandin, gelo CPT pêşiya kîjan êşkenceyê digire? CPT komîteya pêşîlêgirtna êşkenceyane yan komîteya çavlêgirtina êşkenceyan e?

Ya esas ewe ku mirov bi tirsa wan, li ser wan de biçe. Tenê yek rê heye û ew rê jî Rêber Apo daye nîşanî me, berxwedana topyekune. Tenê berxwedan dikare me bigihijîne serkeftinê. Di vê mijarê de pêwîste hertim gelê azadîxwaz şiyar be û li dijî van qedexeyên hevdîtinê û tecrîdê bertekên herî mezin nîşan bide. Dijmin diwaze vê tecrîdê wek mijarek normal bide nîşandan. Lê divê gelê azadîxwaz bi bertekên herî tûnd bersiv bide û li komplogeran bide hîskirin ku Rêber Apo ne bi tenê ye!

Armanc Herekol