‘Êdî tiştekî bi navê Kurd û Kurdistan namîne’

Hewa Buldan têkildarî dirûtina cilên jinan yên Kurdî axivî û got: “Ji ber ku gelê Kurd bi wê çandê, bi van cil û bergan, bi zimanê xwe yê Kurdî tê naskirin. Eger ev çand tine bibe, êdî tiştekî bi navê Kurd û Kurdistan namîne, ji ber wê divê ev çanda me ya Kurdî bê berdewam kirin û parastin.”

Xurbet Tallî

Çand di milê etmolojî de peyvekî latîniye û tê wateya çandiniyê ango çand ji çandiniyê tê û gelek wateyên çandê hene. Tiştên ku civakekê ji civaka din cûda dike re çand tê gotin. Di destpêkê de guhertin û veguhertinên di jiyana wan de çêdibin, adet û teqalîtên wan, huner, çand, bawerî, feraset,  tevger, cil û berg, dawet, xwarin û vexwarin ango her tişta ku mirov di dîrokê de afirandî, Madî û Manewî, Kevneşopî, ziman, mîmariya wan, rêbazê jiyanê û hwd jiyandikin û ji neslekî veguhestina neslê din re dibêjin çand. Di vê wateyê de em dikarin bêjin çand ruhê civakê ye.

Têkildarî dirûtina cil û bergên jinan yên Kurdî, hemwelatiya Wargeha Penaberan a Şehîd Rustem Cûdî (Mexmûr) Hewa Buldan ku ev zêdeyî deh salin cilên jinan yê Kurdî didirû ji rojnameya me re axivî.

‘Ez tenê cilên jinan didirûm’

Hewa Buldan di destpêka axaftinên xwe de qala fêrbûna xwe ya dirûtina cil û bergên jinan yên Kurdî kir û anî ziman ku wê bi xwestek dest bi dirûtina cilên Kurdî kiriye û wiha got: “Ji destpêkê ve xwesteka min ya dirûtina cilan hebû, lê min li wargehê dest bi dirûtina cilên Kurdî kiriye û ev zêdeyî deh salin ez cilên Kurdî didirûm. Ez cilên normal yên nava malê nadirûm, tenê cilên Kurdî yên jinan ên herêma Colemêrgê û Behdînan didirûm. Ji ber ku ti derfetekî min yê wisa nîne ku ez xwe fêrî dirûtina şal û şapikan bikim û dirûtina wan jî ji bo min zehmete, ji ber wê ez tenê cilên jinan didirûm. Bi dirûtina van cilan ez debara malbata xwe dikim. Gelek kes dibêjin; çima tû modelekî din çênakî? Ez dibêjim; ez ti modelan naxim nava cilên Kurdî. Ka cilên Kurdî | berê çawan hatine çêkirin, divê ji niha û şûnde jî bi heman awayî bêne çêkirin. Kî cilên Kurdî bîne gel min û bêje ji bo me modelekî cûda çêbike, ez modelan naxim nava cilên Kurdî. Ez li dijî modelên ku dikevin nava cilên Kurdî me.

‘Em rê nedin cilên me yên Kurdî bên xirabkirin’

Buldan di dewama axaftinên xwe de da diyarkirin ku ew ji derveyî rojên taybet û rojên dawetan jî cilên Kurdî didirû û wiha pêde çû: “Di mehên ku dinya germ de hinek navber dikeve dirûtina cilan, ji derveyî wê ez hertim cilên jinan yên Kurdî didrûm. Ez cilên zarokan nadirûm, ji ber ku ez di malê de bi tenê me, hem karê malê û hem jî karê di nava wargehê de dikim, hinekî zehmet dibe. Em dibînin bi pêşketina tekînîk û teknolojiyê re cilên Kurdî jî ji Kurdîbûna xwe hinekî derketiye, divê em rê nedin cilên me yên Kurdî bên xirabkirin. Ji ber ku cilên me yên Kurdî cilên taybetin û ji demê berê heta niha wekî çandekê hatiye û em bi vê çandê tên naskirin.”

 ‘Divê çanda Kurdî neyên tinekirin’

Hewa Buldan di dawiya axaftinên xwe de ev tişt got: “Çi dibe bila bibe divê çanda Kurdî, cil û bergên Kurdî neyê tinekirin, bi yek kesî jî mabe wê ev çand bê domandin. Banga min ji bo hemû herêman ewe ku nehêlin çanda Kurdî bi taybet çanda cil û bergên Kurdî bê windakirin û bila li ser rastiya xwe bên berdewamkirin. Her wiha ez di wê hêviyê de me ku ev nifşê nû jî vê çanda Kurdî berdewam bike. Ji ber ku gelê Kurd bi wê çandê, bi van cil û bergan, bi zimanê xwe yê Kurdî tê naskirin. Eger ev çand tinebibe, êdî tiştekî bi navê Kurd û Kurdistan namîne, ji ber wê divê ev çanda me ya Kurdî bê berdewam kirin û parastin.”