CIVAK BI JINÊ AZAD DIBE

Xebatkarên mêr ên Wargeha Mexmûrê 8’ê Adarê Roja Jinên Kedkar ên Cîhanê li tevahî jinên şoreşger û welatparêz pîrozkirin û gotin: “Wek Rêber Apo gotî, jin azad nebe civak azad nabe.”

Armanc Herekol

Xebatkarên mêr ên Wargeha Penaberan a Şehîd Rustem Cûdî (Mexmûr) 8’ê Adarê Roja Jinên Kedkar ên Cîhanê li tevahî jinan pîrozkirin û bang li mêran kirin da ku di 8’ê Adarê de li kêleka jinan dirûşmeya ‘Jin Jiyan Azadî’ berz bikin.

‘Jinan ji paradîgmaya Rêber Apo sûd wergirt’

Xebatkarê bi navê Salih Şirnexî di destpêka axaftinên xwe de 8’ê Adarê li Rêber Apo û tevahî jinan pîrozkir û got: “Em di wê baweriyê de ne ku wê 8’ê Adarê bibe sersalek ya aramî û aştiyê. Wê 8’ê Adarê di tevahî Kurdistanê de bibe sersala azadiya fîzîkî ya Rêber Apo. Dema ku paradîgmaya Rêber Apo derketî, gelek jinên cîhanê ji vê paradîgmayê sûd wergirt. Jin û mêr dema ku di kesayeta xwe de azadiyê peyda bike, dikare hevjiyana azad jî peyda bike.”

‘Jin li cewhera xwe vegeriya’

Salih Şirnexî di dewama axaftinên xwe de da zanîn ku mêr ji jinê bindestire û wiha pêde çû: “Hişmendiya kapîtalîst ku di serê mêran de dayî çandin, nahêle ku mêr hevjiyanek azad di kesayeta xwe de çêbike. Bi paradîgmaya Rêber Apo, em dikarin xwe ji vê hişmendiyê rizgarbikin û hevjiyanek azad bijîn. Bi derketina gerîlayên Azadiya Kurdistanê re, jinan xwe pêşxist û li cewhera xwe vegeriya. Ez carekdin 8’ê Adarê li Rêber Apo, gerîlayên Azadiya Kurdistan û tevahî jinan pîroz dikim. Projeya Jineolojî, projeyek dîrokî ye. Ez bang li tevahî mêran dikim da ku perwerdeya Jineolojî bibînin û kesayetiyek azad di xwe de bidin çêkirin. Her wiha bang dikim, di 8’ê Adarê de dakevin kolanan û li kêleka jinan dirûşmeya ‘Jin Jiyan Azadî’ berz bikin.”

‘Bi avabûna PKK’ê re jinan xwe naskir’

Her wiha xebatkarê bi navê Mihemed Elî Oremarî jî têkildarî heman mijarê peyivî û di serî de wî jî 8’ê Adarê li tevahî gerîlayên jin pîrozkir û wiha axivî: “Roja 8’ê Adarê nêz dibe û em jî vê rojê li tevahî dayîk û jinan pîrozdikin. Beriya PKK’ê jî 8’ê Adarê hebû, lê evqas girîngî pê nedihat dayîn. Bi derketina PKK’ê re girîngî hat dayîna vê rojê. Ev jî bi saya Rêber Apo çêbû. Ji ber ku Rêber Apo gelek nirx dide jinan û ji bo azadiya jinan têkoşîn dide meşandin. Bi avabûna tevgera jin re, jinên Kurd xwe naskir.”

‘Jin azad be, civak azad e’

Mihemed Elî Oremarî di berdewamiya axaftinên xwe de bilêvkir ku hişmendiya mêr-dewlet nahêle jin azad be û ev bang li mêran kir: “Bi saya Rêber Apo ev roj tê pîrozkirin û nirxek tê dayîna jinan. Lê heta niha jî, ji aliyê mêr û dewletê ve jin tên qetilkirin. Divê jin û mêr di nava jiyanek hevpar de bijîn. Ji bo wê jî divê jin bê azadkirin û bi azadkirina jinê re civak jî azad dibe. Ez bang li mêran dikim, ji bo azadiya jinan têbikoşin. Dubare ez cejna 8’ê Adarê li tevahî dayîkên şehîdan, şervanên jin û tevahî jinan pîroz dikim.”