Şêniyên Wargeha Mexmûrê têkildarî bûyera Xelîfanê diyarkirin ku dewleta Tirk li Herêmên Parastinê yên Medyayê nikare serbikeve û dibêjin: “Têkçûna dewleta Tirk berbiçave ku nikare pêş de biçe. Dewleta Tirk xwest bi hevkariya PDK’ê binketina xwe binûximîne, ger hevkariya PDK’ê nebe Tirkiye nikare gavek jî pêş de were.”
Komek gerîlayên ku ji pênc kesan pêkdihat li Xelîfanê di encama êrîşa balefira bê mirov û bi çek ya dewleta Tirk de bi hevkariya PDK’ê ketin kemînê. Di encamê de 3’ê gerîla şehîd ketin û 2 jî bi birîndarî ketin destê hêzên PDK’ê û heta niha jî ti agahiyek ji wan nehatiye girtin. Têkildarî vê mijarê şêniyên Wargeha Mexmûr ji ajansa me re axivîn.
‘Tekane rêya me têkoşîne’
Mihemed Elî Soydan di destpêka axaftina xwe de êrîşên dewleta Tirk a dagirker bi bîr xist û wiha got: “Êrişa ku vê dawiyê li Xelîfanê çêbûyî ne ya yekê ye û ne ya dûwê ye ku mala Barzan bi hevkariya dewleta Tirk pêktîne. Mirov dikare bêje hinek malbatên wek Mala Barzanî ji bo berjewendiyên xwe yên kesî û malbatî her tim li gel dijmin cih girtine. Weke gelê Kurd helwesta me li hemberî bûyerekî bi vî awayî zelale. Li beranberî van bêmafiyan jî gelê Kurd qasî ku tê xwestin helwest nîşan nadin. Wek wargeh ev bi salane li beramberî neheqî û dagirkeriyên bi vî awayî têkoşîn dikin.”
Mihemed Elî herî dawî ev bang li xelkê Başûr kir: “Ev bûyera ku ji aliyê dewleta Tirk a dagirker ve bi hevkariya PDK’ê li Xelîfanê çêbûyî, ji bo kêfxweşkirina dewleta Tirk bû. Banga min ji bo gelê Başûr ewe ku divê li hemberî van êrîş û dagirkeriyên dewleta Tirk bêdeng nemînin.”
‘Bi teknolojiya xwe ya pêşketî li çiyayên azad asê mane’
Her wiha Hezar Uçar jî hêrsa xwe ya li hemberî êrişa ku li Xelîfanê çêbûyî wiha anî ziman: “Carek din bi hevkariya PDK’ê dewleta Tirk a dagirker komek gerîla li Xelîfanê kir hedef. Di encamê de 3 gerîla şehîd ketin û 2 gerîla ji aliyê PDK’ê ve hatîn dîlgirtin. Heta niha ti agahî wan gerîlayan nehatiye girtin. Tevî ku ewqas bangawazî jî hatin kirin, her wiha Tevgera Azadiyê ji bo bi PDK’ê re nekeve nava pevçûna dilnizmî jî tevdigere, lê ev bûyer hêjî nehatiye zelal kirin. Têkçûna dewleta Tirk berbiçave ku nikare pêş de biçe. Ji ber wê jî ne bi pesindayîna xwe, ne bi hêza xwe ya leşkerî, ne bi teknîk û teknolojiyê, ne jî bi siyasetê nikarin li hemberî vîna gerîlayên Tevgera Azadiyê li ber xwe bidin. Rûxmê ku ewqas çekên kîmyawî yên cûr be cûr li ser gerîla bikar tîne jî, lê li beranberê vîna gerîlayên Tevgera Azadiyê nikare bi ser bikeve. Di vir de ya ku di destê wan de dimîne tenê hêza PDK’ê ye. PDK tenê li ser berjewendiyên xwe yên kesî, malbatî û eşîrtî tevdigere. Dewleta Tirk jî vê lewaziya PDK’ê baş dizane, ji bo wê vê yekê ji xwe re bi awayekî sîstematîk bikartîne. Ev bû sê car li Xelîfanê heman bûyer rû dide, em baş dizanin ku bûyerên bi vî awayî ger ne bi hevkariya PDK’ê be, bi awayek hêsan ne pêkane.”
‘Êriş û xiyaneta îro tê kirin, dîrok ji bîr nake’
Hezar Uçar bi van gotinan dawî li axaftina xwe anî: “Êrişên ku îro tên kirin wê dîrok ti carî ji bîr neke. Dixwazin bi xiyanet û kiryarên xwe yên qirêj ên li hember çand û Neteweya Kurd, Tevgera Azadiyê ya ku ji bo tevahî mirovahiyê canê xwe feda dike tine bikin. Her wiha hewl didin bîr û baweriya felsefeya Rêber Apo ku bingehê xirabkirina koletiya mirovahiyê ye ji holê rakin. Li ser vî bingehî her kesekî ku dibêje ez mirovim li kudera cîhanê dibe bila bibe pêwîste li hemberî van êrişan bi taybet li hemberî PDK’ê bêdeng nemînin.”
.JPG)
0 Yorumlar