Jinên Mexmûrê: Ji tecrîdê re bêjin na!

Jinên Wargeha Penaberan ya Şehîd Rustem Cûdî (Mexmûr) têkildarî tecrîda ku li ser Rêberê Gelê Kurd Abdullah Ocalan tê meşandin gotin; “Ji ber ku Rêber Apo aştî û aramiyê dixwaze, xistina nava çar dîwaran de. Divê hemû Kurd û azadîxwaz, êdî ji tecrîdê re bêjin ‘Êdî bes e’.

NÊRGIZ KARA - ROJEV

Tecrîda li ser Rêberê Gelê Kurd Abdullah Ocalan roj bi roj girantir dibe, dewleta Tirk a dagirker bi ti awayî nahêle malbat û parêzer serdana Îmraliyê bikin û Rêber Ocalan bibînin. Agahî ji Rêberê Gelê Kurd Abdullah Ocalan nayê girtin. Nerazîbûna dijî tecrîda li ser Rêber Apo her ku diçe mezin dibe. Jinên Wargeha Penaberan ya Şehîd Rûstem Cûdî Mexmûrê derbarê tecrîdê ji Rojnews re axivîn.

Destpêkê jina bi navê Helîm Bulut axivî û tecrîda ku li ser Rêber Apo bi tundî şermezar kir û got: “Hevalên ku li hember her cûre êrişên niha di çeperan de li berxwe didin silav dikim û bejna xwe li hember şehîdan ditewînim. Gotinek heye ku dibêjin; ‘av disekine, lê dijmin nasekine’ pêwiste em jî li hember wan dijminan têkoşîn bikin û rêya azadiyê bibînin. Em dizanin ku li cihê Kurd hebe, li cihê ku navê azadiya Kurdan têre derbas bibe dijmin dikeve dewrê û nahêle xweşî ji xwe re bibînin. Armanca wan ya sereke ewe ku em Kurd tinebibîn, lê ew bixwe jî dizanin ku çi bikin bila bikin em tine nabin.”

‘Em çiqas li berxwebidin, emê ewqas nêzî serkeftinê bibin’

Helim di dawiya axaftina xwe de anî ziman ku pêwiste gelê Kurd bibe yek, li şehîd û şervanên xwe xwedî derbikevin: “Pêwîste em di hemû aliyan de li hember zilmê têkoşîn bikin û em hertim bi şehîd û şervanên xwe re bin. Wek gelê Kurd divê em yekitiya xwe çêbikin ma heta kengê emê bên parçekirin? Dema mirov temaşe dike dibîne ku têkoşînek heye, berxwedanek heye lê ne têrkere ji bilî azadiyê tiştek li pêşiya me nîne Yan Azadî, Yan Azadî. Bi taybet jî azadiya fîzîkî ya Serokatiya me. Bi fikir û felsefeya Rêbertî ev ronahî çêbû. Mirovê nezan zana kiriye, mirovê bê çav û guh bi çav û guh kiriye, mirovên bê ling û bê dest bi ling û bi dest kiriye. Emê heta dawiyê li ser xeta ku Serokatiyê xêz kirî bimeşin, ji ber wê jî em dizanin ku serkeftin wê ya me be. Pêwiste em li Serokatiya xwe xwedî derbikevîn. Çi mirovê ku bêje ez Kurdim, pêwîste rabe ser xwe. Em çiqas berxwedan bikin, emê ewqas nêzî serkeftinê bibin.”

‘Ka demokrasî’

Her wiha jina bi navê Qedriye Ulaş jî anî ziman ku çalakiyên tên kirin têrker nîne û got: “Di serî de ez silavên xwe ji Rêbertî, gerîlayên ku li ser çiya li berxwe didin re dişînim. Ev tecrîda ku li ser Serokatiya me tê meşandin em bi tûndî şermezar dikin. Ev 24 sale dewleta faşîst a Tirk Serokatiya me di nava çar dîwaran de zîndan kirine. Ev dewlet û hêzên ku dibêjin em aştîxwazin, em demokratin, ka aştî û demokrasiya wan? Sedemê girtina Serokatiya me cîhan hemû jî dizane, ji fikir û ramanên wî ditirsin ji ber wê ew xistine di navbera çar dîwaran de. Çalakiyên ku tên kirin ji bo vê pêvajoyê û tecrîda ku li ser Serokatiya me tê meşandin ne têrkerin.”

Qedriye herî dawî ev bangawazî kir: “Bangawaziya me ji dewlet û hêzên ku dibêjin em demokratin ewe ku di demek nêz de hemû li dijî vê tecrîdê rabin û azadiya Rêber Apo mîsoger bikin. Êdî em dibêjin bese ji vê tecrîdê re, pêwiste cîhan û kesên xwedî wijdan jî rabin ser xwe.”