‘JINELOJÎ CIHÊ ZANIST Û RÊXISTINÊ YE’

Jina ciwan Rûken Botan ya ku beşdarî perwerdeya Jineolojî dibe, têkildarî perwerdeya ku dibîne axivî û got: “Di vê perwerdeyê de em bi zimanê dayîka xwe daxivin, hem di aliyê kesayet de û hem jî di aliyê fikir de hevdû baştir nasdikin.”

Xurbet Tallî

Li wargeha penaberan a Mexmûrê di sala 2016’an de Komîteya Jineolojî hat avakirin. Komîteya Jineolojî ji sala hatî avakirin ve di nava wargehê de ji bo pêşxistin û rêxistinkirina jinan xebatên cûr be cûr dimeşîne. Komîteya Jineolojî ji bo zanista Jineolojî û girêdayî giştî xebatên pergalê, dem dem dewreyên perwerdê vedike.

Bi qasî sê salane komîteya Jineolojî ji bo endamên xwe her heftê du şevan perwerde dide. Mijarên ku di perwerdê de têne nîqaşkirin wiha ne; Li ser dîroka têkoşîna jin, hevjiyana azad, zanista Jineolojî, bi vê ve girêdayî li ser 9 rehendên paradîgmaya Netewa Demokratîk, 5 rêgezên birdoziya rizgariya jin, perwerde têne dayîn. Her wiha jinên ku beşdarî perwerdeyê dibin lewaziyên xwe yên heyî nîqaş dikin, digihijin biryarekê û bi wî awayî perwedeya xwe didomînin.

 Rûken Botan ku endameke beşdarî perwedeya Komîteya Jineolojî dibe, ji rojnameya me re axivî û bang li jin û dayîkên Wargeha Mexmûr kir ku ji bo xwe zana bikin pêwîste beşdarî dewreyên perwerdeyê yên Jineolojî bibin.

‘Ji pêşeroja xwe bê agahî ye’

Rûken Botan diyar kir ku ev perwerde heftiyê dû rojan, sêşem û çarşemê şev demajimêr 20:00 heta 22:00’an tê dayîn û wiha peyîvî: “Beriya ku ez beşdarî perwerdeya Jineolojî bibim jî ev perwerde hebû. Di vê perwerdeyê de wek jin em xwe bi xwe mijarên xwe diyar dikin. Em li ser mijarên ku têde kêm mayîn nîqaşdikin, digihijin biryarekê û li ser wan mijaran perwerde dibînin. Di vê perwerdeyê de em bi zimanê dayîka xwe daxivin, hem di aliyê kesayet de û hem jî di aliyê fikir de hevdû baştir nasdikin. Dema ez beşdarî vê perwerdeyê bûyîm, me pirtûka Heval Helmet ya Dîroka Kurdistanê xwend. Dema me ev pirtûk xwend, me ferq kir ku di hinek mijaran de agahiyên me nîne. Ji ber ku eger mirov dîroka xwe nizanbe wê nikaribe pêşeroja xwe jî bi rêve bibe, her wiha ji pêşeroja xwe bê agahî ye. Ji bo wê jî me bi pirtûka Dîroka Kurdistanê re zanî ku dîrok ji bo me çiqasî girînge û em dikarin pêşerojê çibikin, ji dîrokê çawan ders derxînin. Bi wê ve girêdayî di erdnîgariya Kurdistê de em têgihiştin ku kîjan ol, bawerî, çand û civakan çawan jiyankirine. Dema ku mirov dîroka xwe nasdike, civaka ku di nav de jiyan jî dike çawabûna wê û ji kîjan astê hatiye vê astê, hîn baştir fêhmdike. Her hevalekê ji vê pirtûkê mijarek girt ser milên xwe û li ser semîner dan. Dema mirov li Jineolojî temaşe dike, dibîne ku Jineolojî zanebûn, hêz û rêxistin çêdike.”

‘Civakbûyîn û komînalbûyînê jî bide avakirin’

Rûken Botan di dawiya axaftinên xwe de ev tişt gotin: “Di vê perwerdeyê de me di nava xwe de nîqaş kir ku ji bo em bikaribin xwe di anîna ziman de baş bidin îfadekirin, me pêwîstî bi perwerdeya telafûskirin, xweş axiftin, xîtabet û rast axaftina di tîpên zimanê Kurdî de jî dît û em niha wê dersê dibînin. Di vê perwerdeyê de wek jin hevdû teşwîqkirin, her wiha hêz dayîna hev û hevdû hîn baştir fêhmkirin jî çêdibe. Bi wê ve girêdayî wek jin êdî wê hêzê di xwe de dibîne û bi derdor re civakbûyîn û komînalbûyînê jî dide avakirin. Banga min ji bo hemû jinên ciwan û dayîkên wargehê ewe ku ji bo bikaribin di aliyê xwe îfadekirin û zanebûnê de pêşbêxin, beşdarî dewreyên perwerdeyên Jineolojî bibin.”