DEWLETA TIRK RÛXMÊ ERDHEJÊ JÎ ÊRIŞ DIKE

Şêniyên Wargeha Mexmûrê: “Em sersaxiyê ji mexdûrên erdhejê re dixwazin û ji birîndaran re jî şîfayê dixwazin. KCK û HPG’ê biryardan ku ji ber erdhejê çalakiyên leşkerî rawestînin, ev biryar biryarek exlaqî ye. Lê belê rûxmê erdhejê jî artêşa hov a Tirk bi çekên qedexekirî û kîmyawî êrişên xwe bê navber berdewam dikin.”

Armanc Herekol

KCK’ê û HPG’ê bi daxuyaniyekê ragihandin ku hêzên wan ji ber erdhejê çalakiyên xwe rawestandine. Lê belê rûxmê vê biryarê jî artêşa Tirk bê navber êrişî gelê Kurd dike û bi çekên qedexekirî êrişên xwe berdewam dike.

Şêniyên Wargeha Penaberan a Şehîd Rustem Cûdî (Mexmûr) têkildarî vê biryara KCK-HPG’ê û nêzikatiyên dewleta Tirk a li beramberî gelê Kurd, ji rojnama me re axivîn û dan zanîn ku ti caran dewleta Tirk dest ji dijmintiya gelê Kurd bernade.

‘Bi zanabûn Kurd hiştin dibin wan xerabeyan de’

Dayîka Hacer Mijînî di destpêka axaftinên xwe de sersaxî ji mexdûrên erdhejê re xwest û got: “Em şifaya xêrê ji birîndaran re dixwazin. Beriya ku erdhej çêbibe, ev erdhej dihat nîqaşkirin û dihat zanîn wê erhejek wisa çêbibe. Lê belê rûxmê vê yekê jî, dewleta Tirk a hov ti xebat nekir. Dewleta Tirk xaniyên xirabe û ne sererast çêkirin, di xaniyan de ti parastina dijî erhejê nînin. Piraniya kesên ku jiyana xwe ji dest dayîn Kurdin. Em sersaxiyê ji wan re dixwazin û em dizanin dewleta Tirk bi zanabûn Kurd hiştin bin wan xirbeyan de. Dewleta Tirk, Kurd hiştin di bin wan xirbeyan de û ti alîkarî nedan wan. Heta niha jî dewlet nahêle gel biçe alîkarî bide mexdûran. Ev nêzikatiyên dijminane, ji berê de heye û wê ti caran dijmintiya dewleta Tirk a li dijî Kurdan xilas nebe.”

‘PKK partiyek exlaqî û wijdanî ye’

Dayîka Hacer têkildarî biryara KCK û HPG’ê ya ku ji ber erdhejê rawestandina çalakiyên leşkerî ev tişt gotin: “Gerîla zarokên me ne û biryara wan di cih de ye. Ji ber ku PKK partiyek wijdanî û exlaqî ye, ji bo wê jî wisa nêz dibe. Ger bê xwestin wê gerîla biçe wan mexdûran jî ji bin wan xirbeyan derbixin. Ji ber ku PKK ya gele. Lê belê dewleta Tirk berovajî PKK’ê ye, dewleta Tirk dijî gel e. Gerîla ji ber erdhejê got, em çalakiyên leşkerî lidarnaxin û emê bikevin di pozîsyona parastinê de. Lê dewleta Tirk rûxmê vê erdhejê jî her roj êrişî gelê Kurd û Tevgera Azadiyê dike. Rojane çekên kîmyawî bikartînin. Ev rastiya dewleta Tirk e.”

‘Sedema evqas miriyan dewlete’

Her wiha li ser heman mijarê Mihemed Salih Kadûnî jî axivî û di destpêka axaftinên xwe de diyar kir ku ji ber xemsariya dewleta Tirk ewqas kesan jiyana xwe ji dest dane û wiha axivî: “Erdhejek mezin çêbû û gelek kesan jiyan xwe ji destdan. Em wek gelê Mexmûrê sersaxiyê ji malbatan re dixwazin û şifayê ji birîndaran re dixwazin. Bûyerek gelek mezine, sedema evqas miriyan jî dewleta Tirk e. Ji ber ku ti tedbîrên dijî erdhejê nehatine girtin.”

‘Tirkiye dewletek a çeteyan e’

Herî dawî Mihemed Salih behsa nêzikatiyên dewleta Tirk a li dijî Kurdan kir û wiha axaftinên xwe domand: “KCK û HPG’ê ji ber erdhejê biryar dan ku çalakiyên leşkerî nekin. Ev biryar biryarek wijdanî û mirovî ye. Lê em dibînin di nava evqas aloziyan de jî, dewleta Tirk a hov êrişî Kobanê dike û li çiyayên Kurdistanê çekên kîmyawî bikar tîne. Dewleta Tirk, dewletek ya çeteyan e, ti wijdan û exlaqê wan nînin. Carekdin jî dewleta çeteyan rûyê xwe yên qirêj nîşanî tevahî mirovahiyê da. Em van êrişan şermezar dikin û em bang li OPCW dikin ku êdî li erk û berpirsyartiyên xwe rabin.”